Deputeti i LSDM-së, Fatmir Bytyqi, i drejtoi pyetje direkte kryeministrit Hristijan Mickoski, duke kërkuar përgjigje për transparencën në procesin e tërheqjes së investimeve të huaja dhe dhënies së beneficioneve për investitorët, duke theksuar se transparenca nuk është vetëm parim etik, por edhe bazë për besim dhe mbrojtjen e interesit publik.
Bitici kujtoi projektin e parkut me erë të Alcazar Energy, me vlerë 500 milionë dollarë, i cili duhet të jetë një nga më të mëdhenjtë në rajon, duke sqaruar se projekte të tilla janë të mirëseardhura, por shoqërohen gjithmonë me nevojën e transparencës, e cila është baza e besimit, si dhe detyrimin për të mbrojtur interesin publik.
“Qytetarët kanë të drejtë të dinë: sipas cilës bazë ligjore po realizohet ky investim? Çfarë beneficionesh ofrohen për investitorin dhe nëse jepen, në cilën seancë të Qeverisë janë miratuar ato? Transparenca në këtë kontekst nuk është vetëm parim etik, por është edhe bazë për të siguruar që vendimet të merren në mënyrë të duhur dhe në interes të të gjithë qytetarëve”, i tha deputeti Bytyqi kryeministrit Mickoski, duke i kujtuar se Maqedonia e Veriut tashmë ka një ligj për Investime Strategjike, të krijuara vetëm për raste të tilla.
Bytyqi përkujtoi se ky ligj parasheh procedura dhe kritere të përcaktuara qartë për investime që janë të një rëndësie të madhe.
