Mësimi në shkollën fillore “7 Marsi” të fshatit Çellopek të komunës së Bërvenicës sot nisi në prani të policisë dhe inspektorëve para oborrit të shkollës. Kjo, pas paralajmërimeve të ministres së Arsimit Vesna Janevska për kontroll lidhur me veshjen e fëmijëve në festën e 28 Nëntorit, me uniforma të UÇK-së dhe armë plastike në duar. Drejtori i shkollës tha se shfaqja ishte e zakonshme dhe nuk ka pasur kurrfarë tendence për përçarjeje apo nxitjen e tensioneve ndëretnike. Ai dënoi pjesëmarrjen e numrit të madh të policëve dhe inspektorëve në shkollë.
“Shfaqje e fëmijëve asgjë më tepër, nuk ka pasur prapavijë as politike as të përcjellim ndonjë mesazh ndarjeje apo luftë mos dashtë Zoti. Thjesht ishte shfaqje manifestim për fëmijët për shënimin e datave historike të shqiptarëve që festohen në gjitha shkollat e trojeve shqiptare. Flas nga prizmi i udhëheqësit të institucionit dhe me shumë të drejtë e them dhe me shumë vlerë për kohezionin në shkollën tonë si nga prindërit, të punësuarit, nxënësit dhe gjithë komuniteti që marrëdhëniet janë të shkëlqyera, kanë qenë dhe do jenë edhe në të ardhmen. Në rajon jemi shembull i kohezionit ndëretnik”, deklaroi Jasin Reka, Drejtor i Sh.F.”7Marsi” Çellopek.
Tentuam të marrim prononcim edhe nga inspektorati shtetëror i Arsimit se përse kishin ardhur, por pa përgjigje.
Përse Keni ardhur?
“Një pyetje shkurt, për çfarë keni ardhur për çfarë vizite bisedohet?
“Inspektorati Shtetëror i Arsimit jemi nuk kemi çka të komentojmë… pastaj do shohim”, u përgjigj njëri nga inspektorët.
Kanë reaguar edhe shefi i Sektorit të Arsimit i Komunës së Bërvenicës dhe kreu i komunës. Kërkojnë që çështja të mos keqpërdoret nga politika.
“Vërtetë ndoshta nuk është dashur të ndodh ajo por ka ndodhur sipas mendimit tim rastësisht. Marrëdhëniet ndëretnike janë të mira tek ne me vite, këta nxënës të kësaj shkolle maqedonase gati tre muaj mësojnë në Çellopek, kështu që do ishte mirë të mos rriten tensionet. Absolutisht nuk ia vlen të merren me këtë por ka ndodh shkaku i rasteve të tjera që gjithë i dimë dhe e përdorin këtu për t’i ngritur tensionet. Po përdoret maksimalisht politikisht rasti. Unë nuk dua të paragjykoj por dihet vijnë zgjedhjet lokale dhe rriten tensionet”, tha Xhelal Ahmeti, përgjegjës për arsim në komunën e Bërvenicës.
“Që kur jam kryetar unë marrëdhëniet janë shumë të mira dhe tani nuk duhet të ngremë tensione për një shfaqje të thjeshtë. Ne nuk përkrahim këto gjëra por inspektorati është në terren, çka të vendosin në rregull është ndërsa ne si komunë nuk kemi kompetenca të dënojmë drejtorin por as edhe që duam ta dënojmë. Tensionet janë nga politika. Unë jam pjesë e një partie politike, por s’duhet ta përdorim këtë ngjarje për prishje të marrëdhënieve ndëretnike që janë të shkëlqyera”, deklaroi Jovica Ilievski, Kryetar i komunës së Bërvenicës.
Vendimi i Inspektoratit të Arsimit lidhur me kontrollin e jashtëzakonshëm në shkollën “7 Marsi” në Çellopek pritet të mësohet ditëve në vijim.
