Deputetja e Frontit Europian Ilire Dauti, ka reaguar pasi Qeveria tërhoqi Ligjin për arsim të mesëm, në të cilin parashihej intonimi i himni maqedonas në fillim dhe përfundim të vitit shkollor.
Dauti thotë se është e lumtur që Qeveria e ka kuptuar se gjërat nuk ndërtohen nga kulmi, por nga baza.
“Kërkova fjalë për të shprehur kënaqësinë që kemi normal si deputetë të Frontit Europian, por mbi të gjitha edhe si përfaqësues të qytetarëve të cilët këto ditë poashtu po aq sa ne kanë qenë të shqetësuar me njërin nga propozim ligjet i cili ishte pjesë e debatit publik, por edhe brenda Kuvendit të Republikës së Maqedonisë së Veriut. E kam fjalën për Ligjin për arsim të mesëm i cili në disa pika shkon në kundërshtim me kohezionin ndëretnik që duhet ta kemi dhe respektin reciprok”.
“Prandaj unë e përshëndes këtë kthjellim të Qeverisë, të Ministrisë për Arsim dhe Shkencë dhe padyshim dua të them që edhe në të ardhmen do të duhet që ligjet të cilat janë të karakterit të kësaj natyre, por edhe të ligjeve të tjera do të duhet të përmbajnë një debat shumë më të gjërë ashtu që në fund të fundit të gjithë ato ligje të cilat sillen nga të gjithë ne të jenë në shërbim të gjithë qytetarëve”, tha Dauti.
