Kryeministri Hristijan Mickoski nuk deshi të komentojë nëse anëtarët e Këshillit Gjyqësor do të mbanin seancë në të njëjtën kohë kur deputetët do të diskutonin për interpelancën e pesë anëtarëve të tyre, që do të thotë mosrespektim i punës dhe vendimeve të Parlamentit. Sipas Kryeministrit, seanca në dhomën ligjvënëse dhe ajo në këshillin gjyqësor janë aktivitete të ndara.
“Lërini anëtarët e Këshillit Gjyqësor të bëjnë punën e tyre, Kuvendi ka punën e vet, unë do t’i ndaja këto dy gjëra dhe këto dy aktivitete. Nuk do të doja të komentoja nëse kjo do të nënkuptonte respektimin apo mosrespektimin e një vendimi të Parlamentit, duke pritur që deputetët të prononcohen dhe vetëm atëherë mund të komentojmë”, deklaroi Hristijan Mickoski.
Përveç interpelancave për anëtarët e Këshillit Gjyqësor të zgjedhur nga Kuvendi që do të jenë në rendin e ditës të martën, deputetët në periudhën e ardhshme do të duhet të diskutojnë dhe vendosin edhe për iniciativën e Qeverisë për shkarkimin e prokurorit publik shtetëror Lupço Kocevski, i cili dje tha se nuk ndjen se kishte bërë ndonjë gabim profesional. Sipas Mickoskit, prokurori ka të drejtë në qëndrimin e tij, por thotë se personalisht nuk pajtohet me të.
“Le të presim që çështja të dalë para deputetëve, dhe vetëm atëherë mund të komentojmë se çfarë do të diskutohet dhe debatohet dhe cilat janë këto argumente që praktikisht do të sfidojnë ose mohojnë deklaratën ose qëndrimin e Kocevskit. Mund të them se absolutisht nuk pajtohem me qëndrimin dhe mendimin e tij, por ky është vetëm mendimi im, por nuk vendos, ata që e zgjodhën vendosin, ata janë deputetët në Kuvendin e Maqedonisë”, shtoi Hristijan Mickoski.
Propozimi për shkarkimin e Kocevskit tani është para anëtarëve të këshillit të prokurorëve publikë, dhe pasi të formohet një mendim, ai do të votohet nga deputetët që do të vendosin për largimin e tij. Kryeministri gjithashtu tha edhe se janë të ditur gjykatësit dhe prokurorët që punuan për qeverinë e mëparshme dhe penguan drejtësinë, por ai vuri në dukje se ajo kohë kishte kaluar dhe se qëllimi i kësaj Qeverie ishte rivendosja e integritetit të sistemit të drejtësisë. .
