Aktori i mirënjohur Robert Ndrenika feston sot 79-vjetorin e lindjes.
Robert Ndrenika lindi në Tiranë, më 10 Janar 1942. Ka qenë ndër aktorët që ka pasur ngarkesën më të madhe në teatër dhe kinematografi. Talenti i aktorit tejet të dashur për të gjitha brezat spikati që në vitet e para të jetës së tij. Mes interpretimesh të shumta, Ndrenika është vlerësuar për një sërë rolesh të rëndësishme gjatë karrierës së tij. Në vitin 1979, Ndrenikës iu akordua titulli “Artist i Merituar” dhe në vitin 1988 titulli “Artist i Popullit”.
Është nderuar me Kupën për Aktorin më të Mirë në Festivalin Kombëtar të Teatrit, më 1994, për rolin e Di Spetes në shfaqjen “Magjia e Madhe”, te De Filipos dhe në Festivalin e Filmit të vitit 1979, për rolin e Prefektit në filmin “Koncert në vitin 1936” dhe një sërë vlerësimesh të tjera.
Urime të shumta kanë vërshuar në drejtim të tij ditën e sotme nga mbështetës, artistë, miq e familjarë. Mes figurave publike që kanë uruar aktorin e madh është Arbana Osmani e cila teksa ka postuar një foto krah tij në Instagram, ka shkruar:
"Gëzuar ditëlindjen mjeshtër! Çfarë privilegji të të kem si të ftuar special ne programet e mia “Dua të të bëj të lumtur” rikthehet në 6 shkurt në Top Channel dhe bashkë me të do të rikthehen edhe Artistët me A-të madhe (si Ndrenika) të këtij vendi", ka shkruar ajo.
