Ka ndërruar jetë në moshën 81-vjeçare këngëtarja e famshme italiane, Milva. Ajo vdiq dje në Milano dhe lajmin e ka konfirmuar vajza e saj, Martina Corgnati, për ANSA, duke shpjeguar se nëna e saj kishte qenë e sëmurë prej disa kohësh. Këngëtarja dhe aktorja e madhe, emri i vërtetë i së cilës ishte Ilvia Maria Biolcati, jetonte në Milano me sekretaren e saj të besuar, Edith dhe me të bijën Martina, një kritike arti.
Milva njihej me nofkën "La Rossa" për ngjyrën e kuqe të flokëve të saj. Ajo ka shkelur skenat në të gjithë botën duke bërë më shumë se 60 albume.
E lindur në Goro, Emilia Romagna, më 17 korrik 1939, gjatë karrierës së saj ajo ka marrë pjesë 15 herë në Festivalin e Sanremos, një rekord i pjesëmarrjeve që ajo e mban së bashku me Peppino Di Capri, Toto Cutugno dhe Al Bano.
Në vitin 2010, pasi nxori albumin e tretë të shkruar dhe prodhuar për të nga Franco Battiato, me titull 'Non conosco nessun Patrizio', menjëherë u bë një nga 20 albumet më të shitura duke thyer rekorde në Itali. Ky album njoftoi edhe lamtumirën e saj në skenë, pas gjysmë shekulli karrierë.
Familja aktualisht po organizon lamtumirën e fundit dhe funerali do të mbahet privat.
Një muaj më parë, më 26 mars, Milva mori vaksinën e koronavirusit, duke dhënë një mesazh të rëndësishëm për të gjithë.
"Unë vaksinohem, sepse kujdesem për jetën time dhe të të tjerëve", shkroi ajo në faqen e saj në Facebook, "Bëjeni edhe ju. Duhet t’i kthehemi jetës së mëparshme, dhe të përqafojmë të dashurit tanë. Së bashku ne mund t’ia dalim për ta mposhtur këtë virus”.
