Protestat kundër rritjes së çmimit të naftës dhe produkteve ushqimore kanë hyrë në ditën e tretë. Të enjten ishte dita e parë e protestës, ku në shesh u mblodhën shumë qytetarë, të cilët paralajmëruan se këto protesta do të vazhdojnë deri në marrjen e vendimeve të duhura për ta.
Në rrjetet sociale qarkullojnë foto të ndryshme ku ftohen të gjithë që të dalin në protestë. Madje nuk kanë shpëtuar as “memet” e ndryshme dhe të shumta, të cilat nxisin qytetarë nga e gjithë Shqipëria për t’u bashkuar në shesh.
Për të tërhequr vëmendjen e publikut e për t’iu bashkuar protestës janë përdorur mesazhe gazmore. Më e fundit, që po bën xhiron e rrjetit, është një ‘meme’ që lidhet me Donald Veshajn, i cili është personazhi më i komentuar i momentit në showbiz.
“Zbulohet e dashura e re e Donaldit”, shkruhet te thirrja për qytetarët. Ky postim është bërë viral në median sociale dhe shpërndarë në shumë faqe duke marrë parasysh edhe ngjarjet e fundit të medias rozë.
“Tani që kam vëmendjen tënde. Sot protestohet për rritjen e çmimeve. Mos mungo ora 17:00 tek Kryeministria”, vijon thirrja.
Por jo vetëm kaq, pasi edhe shkodranët kanë përdorur një mënyrë të tillë që të kenë vëmendje më të madhe për protestën. Dje ata kanë ‘ftuar’ disa nga emrat më të njohur të showbizzit shqiptar. Bora Zemani, Donald Veshaj, Beatrix Ramosaj dhe Ilir Shaqiri janë disa nga personazhet në posterin që po qarkullon në rrjetet sociale.
“Do të jemi afër bashkisë Shkodër, kemi VIP-at, për rininë që ka dëshirë me na u bashku. Ju presim, të protestojmë për rritjen e çmimeve!”, thuhet në njoftim. Natyrisht që këta emra nuk do të jenë realisht pjesë e protestës, por posteri ka pasur për qëllim të ironizojë çështjet më të rëndësishme, sidomos për brezin e ri. Duke ditur reagimin që publiku ka për këta personazh, ata i kanë bërë pjesë të posterave të tyre. E për të parë reagimin që kjo ironi ka pasur, mbetet për t’u parë.
