Charlize Theron iu është përgjigjur thashethemeve se i është nënshtruar një operacioni plastik dhe për komentet e saj është vlerësuar veçanërisht në rrjetet sociale.
Aktorja ka folur në një intervistë për revistën Allure, për spekulimet se ka kryer procedura kozmetike .
“Fytyra ime po ndryshon. Dhe më pëlqen që fytyra ime po ndryshon dhe po plaket. Njerëzit mendojnë se kam bërë një lifting të fytyrës. Ata pyesin: ‘Çfarë i ka bërë fytyrës?’. Në fakt unë dua të përgjigjem: ‘Unë vetëm po plakem! Kjo nuk do të thotë se kam bërë një operacion të keq plastik. Kjo është pikërisht ajo që po ndodh’”, ka deklaruar 48-vjeçarja.
Sado që Theron e do pamjen e saj natyrale, ajo shtoi se nuk i kritikon individët që zgjedhin kirurgjinë estetike. Ylli i “Atomic Blonde” vuri në dukje se si gratë e tjera e përqafojnë plakjen në mënyrën e tyre dhe u bëri thirrje individëve që ta pranojnë këtë vendim.
Duke folur për “standardin e dyfishtë” të plakjes midis burrave dhe grave, Charlize vuri në dukje se e përbuz konceptin se burrat plaken si vera, ndërsa gratë plaken si lulet e mbledhura.
Fansat e lavdëruan aktoren për pikëpamjen e saj pozitive ndaj plakjes duke e quajtur një ikonë.
Edhe pse e ka përqafuar plakjen në mënyrën e saj, ajo pranoi se ekziston një aspekt i plakjes që është më i vështirë për t’u mësuar – ndryshimet e saj fizike.
