Vitin e kaluar, aktorja Florence Pugh, vetëm 27 vjeç, vendosi të ngrijë vezët e saj. Ajo e zbuloi këtë vendim gjatë një interviste në podcast-in ‘She MD’, duke shpjeguar se e mori këtë hap pasi zbuloi një diagnozë të papritur: sindroma e vezores policistike dhe endometrioza, dy gjendje që mund të ndikojnë në pasjen e fëmijëve. Përpara se ta kuptonte këtë, Florence kishte pasur disa "ëndrra të çuditshme": «Kisha një ndjesi që duhej të kontrolloja të gjithë trupin tim. Trupi im po më fliste».
Kështu, ajo vizitoi gjinekologen Thaïs Aliabadi, ku zbuloi se vuante nga këto dy gjendje, duke shpjeguar dhimbjet e vazhdueshme që përjetonte çdo ditë.
Doktoresha e pyeti nëse kishte bërë ndonjëherë një numërim të vezëve, një pyetje që e la aktoren të habitur: «Mendova: Jo, çfarë do të thuash? Jam kaq e re. Pse më duhet të numëroj vezët?»
Pas analizave, mjekja konfirmoi diagnozën dhe sugjeroi që Pugh të bënte kriokonservimin e vezëve, në rast të vështirësive të mundshme në të ardhmen. Për Florence ishte një moment tronditës: «M’u duk absurde, sepse familja ime është si një makineri për prodhimin e fëmijëve. Mamaja ime pati fëmijë rreth të 40-ave. Gjyshja ime lindi fëmijë për një kohë të gjatë... Ndërsa unë po merrja informacion krejt ndryshe: në moshën 27-vjeçare duhet të nxirrja vezët dhe ta bëja shpejt. U ndjeva vërtet e hutuar».
Tani, megjithatë, ajo ndihet «me fat dhe e lumtur» që e zbuloi gjendjen e saj në kohë. Sepse, siç thotë vetë: «Kam dëshiruar të kem fëmijë që kur isha e vogël». Për më tepër, është e lumtur që vendimi i saj ka ndikuar edhe te të tjerët: «U tregova miqve të mi çfarë po përjetoja, dhe disa prej tyre shkuan të kontrolloheshin. Disa zbuluan se kishin të njëjtat probleme si unë».
