Balerini i njohur shqiptar, Eno Birko, ka ndërruar jetë në rrethana tragjike mëngjesin e sotëm.
Ai i dha fund jetës duke u hedhur nga kati i pestë i pallatit ku banonte në zonën e ish-Bllokut.
Birko, një nga figurat më të spikatura të skenës së Teatrit të Operas dhe Baletit për shumë vite, ishte i njohur për talentin e tij të jashtëzakonshëm si balerin, por edhe për luftën e tij me sfida personale.
Artist i shkëlqyer dhe një njeri i ndjeshëm, Eno kishte kaluar një periudhë të vështirë në jetën e tij, të shoqëruar nga përballja me depresionin dhe varësinë nga alkooli.
Në vitin 2010, një operacion i hernies diskale e detyroi të tërhiqej nga rolet si solist kryesor, duke i sjellë një krizë të thellë emocionale dhe izolim nga jeta artistike.
Megjithatë, në një intervistë të dhënë më 2016, Birko tregoi se kishte arritur të triumfonte mbi depresionin dhe të rikthehej në skenë, duke dhënë mesazhe frymëzuese për të gjithë ata që përballen me sfida të ngjashme.
Largimi i tij ka lënë një boshllëk të madh në skenën artistike dhe një dhimbje të thellë te ata që e kanë njohur si artist dhe mik.
