Mbretëresha e DRAG “The Vivienne”, e cila fitoi një seri të RuPaul’s Drag Race UK dhe luajti në Dancing on Ice, ka vdekur në moshën 32-vjeçare.
James Lee Williams, e njohur si drag queen The Vivienne, ka ndërruar jetë në moshën 32-vjeçare, raporton noa.al duke cituar BBC.
Publicisti Simon Jones tha se performuesja, e cila ndërroi jetë gjatë fundjavës, ishte “një person jashtëzakonisht i dashur, me zemër të madhe dhe e mrekullueshme”.
The Vivienne fitoi serinë e parë të RuPaul’s Drag Race UK në vitin 2019.
Jones kërkoi privatësi për familjen e saj dhe tha se detaje të tjera nuk do të publikohen në këtë moment.
Gjyqtarja e RuPaul’s Drag Race, Michelle Visage, e përshkroi lajmin për vdekjen e The Vivienne si “zemërthyese”.
Në një postim në rrjetet sociale, Visage shkroi: “E qeshura jote, zgjuarsia, talenti dhe drag-u yt. I kam dashur të gjitha, por më së shumti e kam dashur miqësinë tonë.
Ishe një dritë për kaq shumë njerëz… Të dua, e dashura ime. Do të më mungosh pafundësisht.”
Ylli tjetër i Drag Race UK, Bimini Bon Boulash, gjithashtu reagoi ndaj lajmit duke shkruar në Instagram: “Jam kaq e tronditur, më vjen shumë keq.”
Cheryl The Queen, më parë e njohur si Cheryl Hole, e cila mori pjesë në të njëjtën seri të Drag Race si The Vivienne, ndau gjithashtu deklaratën në Instagram, duke shkruar: “Do të të dua përgjithmonë, Viv.”
Jones tha se këto ishin fjalë që “nuk kishte dashur kurrë t’i shkruante”.
“Asnjë nuk më ka bërë të qesh aq shumë sa Viv. Gjenialiteti i saj komik dhe zgjuarsia e saj ishin të pakrahasueshme,” tha ai.
“Jam kaq krenar dhe me fat që Viv ishte një pjesë kaq e madhe e jetës sime çdo ditë për pesë vitet e fundit.”
Williams lindi në Uells dhe mori emrin e saj të skenës për shkak të dashurisë për veshjet Vivienne Westwood.
Përveçse fitoi Drag Race, The Vivienne u rendit e treta në edicionin e vitit 2023 të Dancing On Ice dhe interpretoi si Wicked Witch of the West në një turne të Mbretërisë së Bashkuar dhe Irlandës të muzikës The Wizard of Oz.
Ajo e ripërsëriti rolin në West End në teatrin Gillian Lynne vitin e kaluar.
Në një postim në Instagram për Boxing Day, The Vivienne ndau një seri fotosh, duke shkruar: “Momente të paharrueshme të vitit 2024”.
