Reperi dhe producenti i njohur Sean "Diddy" Combs ka reaguar pas një aktakuze të re ndaj tij, ku prokurorët e akuzojnë për trafikim dhe shfrytëzim të grave për prostitucion nga viti 2009 deri në 2024.
Sipas dokumenteve gjyqësore, Combs akuzohet se ka transportuar qëllimisht disa viktima, përfshirë punonjëse seksi, brenda dhe jashtë vendit për qëllime shfrytëzimi seksual. Prokuroria gjithashtu pretendon se ai ka ushtruar një model të vazhdueshëm abuzimi ndaj grave, përfshirë dhunën verbale, emocionale, fizike dhe seksuale.
"Combs manipuloi gratë për të marrë pjesë në akte seksuale të organizuara prej tij," thuhet në aktakuzë. "Ai siguroi pjesëmarrjen e tyre duke u shpërndarë drogë, duke kontrolluar karrierat e tyre, duke shfrytëzuar mbështetjen financiare dhe duke përdorur frikësim e dhunë."
Megjithatë, avokati i tij, Marc Agnifilo, e ka kundërshtuar fuqishëm aktakuzën, duke e cilësuar atë të pavlefshme. "Teoria e prokurorisë mbetet e gabuar," deklaroi ai për E! News më 30 janar. "Qeveria ka shtuar një teori qesharake duke pretenduar se dy nga të dashurat e mëparshme të zotit Combs nuk kanë qenë në të vërtetë të dashurat e tij, por prostituta."
Avokati theksoi gjithashtu se në aktakuzën e re nuk ka asnjë vepër të re penale dhe se Combs është i vendosur ta luftojë këtë çështje në gjykatë.
Kujtojmë se themeluesi i Bad Boy Records më parë është deklaruar i pafajshëm ndaj akuzave për konspiracion dhe trafikim seksual pas arrestimit të tij më 17 shtator. Në dhjetor, ai reagoi në rrjetet sociale duke mohuar akuzat dhe duke i quajtur ato përpjekje për të shkatërruar reputacionin e tij.
"Le të jem absolutisht i qartë: Nuk kam bërë asnjë nga gjërat e tmerrshme për të cilat akuzohem," shkroi 55-vjeçari në Instagram më 6 dhjetor. "Do të luftoj për emrin tim, për familjen time dhe për të vërtetën."
