Programi "Për Shqiptarët" rikthehet në ekranin e Top Channel me sezonin e tij të dytë, duke sjellë një ndryshim të rëndësishëm në moderim. Pas një sezoni të suksesshëm nën drejtimin e Marina Vjollcës, këtë vit emisioni do të prezantohet nga Bora Zemani.
Ky ndryshim vjen ndërsa Bora përfundon angazhimin e saj me programin "Piramida" dhe merr përsipër këtë mision të ri humanitar.
"Për Shqiptarët" është një program që synon të ndihmojë familjet shqiptare në nevojë, duke sjellë histori frymëzuese dhe duke mobilizuar komunitetin për të ofruar mbështetje.
Bora Zemani, e entuziazmuar për këtë sfidë të re, është shprehur: "Është ai programi që bëhen bashkë të gjithë shqiptarët për të dhënë mesazhe të bukura e për t’iu gjendur pranë njëri-tjetrit."
Ndërkohë, nuk ka informacione të detajuara mbi planet e ardhshme televizive të Marina Vjollcës. Megjithatë, ajo ka lançuar së fundmi linjën e saj kozmetike, çka mund të sugjerojë një fokus të ri në karrierën e saj.
Sezoni i ri i "Për Shqiptarët" pritet të fillojë transmetimin më 21 shkurt, çdo të premte në orën 21:00, duke premtuar emocione dhe histori që frymëzojnë.
