Disa zëra nuk mund të heshten. Disa emra nuk mund të harrohen. Parashqevi Simaku, dikur një nga divat më të mëdha të muzikës shqiptare, duket se është gati për një kapitull të ri. Pas një periudhe të vështirë që e la të pastrehë në rrugët e Nju Jorkut, këngëtarja legjendare po rimerr veten dhe, ndoshta, edhe muzikën që dikur e bëri të pavdekshme.
Pamjet e fundit të publikuara nga biznesmeni Elton Ilirjani tregojnë një Parashqevi ndryshe: buzëqeshur, e rrethuar nga njerëz që e duan dhe e mbështesin, mes tyre këngëtarja Mira Konçi dhe mbesa e saj, Ina Simaku. Në një moment të ngrohtë e plot emocion, ajo këndon sërish, duke na kujtuar magjinë e zërit të saj.
Pas daljes nga spitali psikiatrik, ku qëndroi për katër javë, Simaku është takuar me miq dhe artistë, duke ndezur shpresat për një rikthim të mundshëm në muzikë. Ende nuk dihet nëse kjo është thjesht një mënyrë për t’u rilidhur me të kaluarën apo një hap drejt një projekti të ri. Por një gjë është e sigurt: arti dhe talenti nuk humbasin kurrë.
Nëse Parashqevi Simaku zgjedh të rikthehet në skenë, do të jetë një kthim jo vetëm për të, por për të gjithë ata që dikur e kënduan këngët e saj me zemër.
