Aktori Michael Sheen ka blerë borxhet e fqinjëve të tij për 1 milion paund dhe i ka falur ato duke përdorur 100,000 paund të parave të tij. Sheen, i njohur për rolet e tij në "The Queen", "Frost/Nixon", "Masters of Sex" dhe "Good Omens", nisi këtë iniciativë dy vjet më parë, me qëllimin për të ndihmuar 900 njerëz në jug-perëndim të Uellsit dhe për të nxjerrë në pah rreziqet e industrisë së borxheve që kërkon interes të lartë për huatë afatshkurtra, raporton CNN.
Përpjekjet e tij do të paraqiten në një dokumentar titulluar “Michael Sheen’s One Million Pound Giveaway,” që do të transmetohet në stacionin televiziv britanik Channel 4 më vonë të hënën. Në dokumentar, ai shpjegon strukturat komplekse financiare të industrisë së borxheve që i lejuan atij të blinte borxhe me vlerë 10 herë më shumë se paratë e tij. "Borxhet e njerëzve vendosen në grupe dhe pastaj kompanitë që blejnë borxhe mund t’i blejnë këto grupe dhe t’i shesin ato te një tjetër kompani që blen borxhe për një çmim më të ulët, kështu që ata që mbajnë borxhin mund ta shesin për gjithnjë më pak," shpjegoi ai në një intervistë në BBC TV në “The One Show” javën e kaluar, pwrcjell KosovaPress.
“Kam mundur të krijoj një kompani dhe me 100,000 paund të parave të mia të blej 1 milion paund borxhe, sepse ato kishin rënë në vlerë në atë mënyrë.”
Sheen shtoi se ai nuk e di identitetin e atyre njerëzve, por di që ata jetojnë në rajonin rreth Port Talbot, qyteti i tij dhe një zonë që ekonomia e saj është shkatërruar nga rënia graduale e industrisë së çelikut.
“Nuk mund të jetë më reale, sa shumë po vuajnë njerëzit”, thotë ai në një fragment nga dokumentari që e tregon atë ulur në një kafene në Port Talbot dhe përshkruan si kamariere i thanë se punëtorët e çelikut hynin, u ulën në tavolinat e tyre dhe qanë, duke vajtuar humbjen e jetesës së tyre.
Sheen ka kërkuar prej kohësh rregullime më të rrepta të sistemit të kredive në MB, duke themeluar grupin e presionit "End High Cost Credit Alliance" në 2017.
Si pjesë e fushatës së tij të gjerë për dokumentarin, Sheen po lobon për kalimin e një Akti të Drejtë të Bankarisë nga qeveria britanike, që do të rrisë huadhënien e ndershme nga shërbimet financiare për njerëzit me të ardhura të ulëta, duke ulur varësinë e tyre nga kompanitë e huave me interes të lartë dhe fajdexhinjtë.
