Orkestra Simfonike e Melburnit (MSO) ka pranuar se ka bërë një “gabim” në anulimin e performancës së një pianisti të mirënjohur për shkak të komenteve që ai bëri për luftën Izrael-Gaza.
Të dielën, Jayson Gillham dha premierë një pjesë pesëminutëshe të quajtur Dëshmitari, shkruar nga kompozitori Connor D’Netto, e cila iu kushtua gazetarëve të Gazës.
Para fillimit të recitalit, Gillham tha se Izraeli kishte vrarë më shumë se 100 gazetarë palestinezë, shkruan BBC.
MSO më pas e hoqi pianistin britaniko-australian nga një koncert i ardhshëm të enjten, duke thënë se ai i vuri ata në një “situatë të vështirë”.
Tani i gjithë koncerti, që do të mbahej në Melbourne Town Hall, është anuluar për shkak të shqetësimeve të sigurisë.
MSO thotë se po përpiqen të riplanifikojnë performancën.
Në koncertin e së dielës, i cili u mbajt në Auditoriumin Iwaki në Melburn, Jayson Gillham performoi një sërë veprash të tjera, nga Beethoven te Chopin.
‘Dëshmitari’ ishte një shtesë e minutës së fundit, sipas MSO.
“Vrasja e gazetarëve është një krim lufte në të drejtën ndërkombëtare dhe është bërë në një përpjekje për të parandaluar dokumentimin dhe transmetimin e krimeve të luftës në botë”, ka thënë Gillham përpara se të fillonte të luante Dëshmitarin.
Në një deklaratë ku kërkoi falje të enjten, MSO tha “Ndërsa Orkestra Simfonike e Melburnit pohon se një platformë koncertesh nuk është një skenë e përshtatshme për komente politike, ne pranojmë shqetësimet e Jayson për ata në Lindjen e Mesme dhe gjetkë”.
“Ne e njohim forcën e ndjenjave të të gjitha palëve për këtë çështje dhe në veçanti njohim përkushtimin e treguar nga të gjithë muzikantët dhe stafi ynë këtë javë”.
Gillham ka pranuar faljen e MSO-së.
“Unë e mbaj marrëdhënien time me MSO-në dhe audiencën e saj me respektin më të lartë dhe pres me padurim marrëdhëniet tona të vazhdueshme të punës në vitet në vijim”, tha ai në një deklaratë.
Persona të armatosur të udhëhequr nga Hamasi vranë rreth 1200 njerëz në një sulm ndaj Izraelit më 7 tetor, duke marrë 251 të tjerë si pengje në Gaza.
Pas këtij sulmi, Izraeli nisi një ofensivë masive ushtarake izraelite në Gaza dhe luftën aktuale.
Gati 40,000 palestinezë janë vrarë në fushatën izraelite, sipas ministrisë së shëndetësisë të drejtuar nga Hamasi në Gaza.
Të paktën 113 prej tyre ishin gazetarë, sipas Komitetit për Mbrojtjen e Gazetarëve, një organizatë e pavarur që promovon lirinë e shtypit.
Vendimi i MSO-së dhe kërkimi i mëvonshëm i faljes së tyre ka bërë bujë në rrjetet sociale. Avokati i profilit të lartë Greg Barns tha se anulimi ishte “me të vërtetë i tmerrshëm”, duke shtuar më vonë se “arti është shpesh i fuqishëm sepse është politik”.
Kritiku i arteve dhe ish-kryetari i Orkestrës S-imfonike të Sidneit, Leo Schofield, tha për kërkimin e faljes së MSO-së, “Jo para kohe. Sa do doja që Gillham të jepte një koncert në Sydney. Ai do të merrte një ovacion të fortë këtu nga mbështetësit që e admirojnë guximin e tij pothuajse po aq sa e admirojnë talentin e tij”.
Lufta Izrael-Gaza është bërë një çështje e paqëndrueshme politike në Australi që të gjitha palët janë përpjekur ta menaxhojnë me kujdes.
Siç ka ndodhur në vende të tjera të panumërta, ka pasur protesta si nga komunitetet hebreje ashtu edhe nga ato myslimane, si dhe rritje të mprehta të islamofobisë dhe antisemitizmit.
