Një burrë nga New Yorku bëri një udhëtim prej 3162 miljesh (5088 kilometra) me skateboard gjatë 57 ditëve, 6 orëve dhe 56 minutave për të përshkuar Shtetet e Bashkuara dhe për të vendosur një Rekord Botëror Guinness.
Chad Caruso, i pajisur vetëm me skateboardin e tij, një çantë të vogël dhe një palë rroba, e nisi udhëtimin nga Venice Beach, Kaliforni, dhe e përfundoi atë në bregdetin e Oqeanit Atlantik në Virginia Beach.
Kjo arritje i siguroi atij Rekordin Botëror Guinness për përshkimin më të shpejtë të Amerikës me skateboard (meshkuj), raporton upi.com.
“Teksa afrohesha drejt vijës së fundit në Virginia Beach, me qindra njerëz duke më brohoritur, eskortë policore dhe skaterë lokalë duke më mbështetur, nuk mund të mos ndjeja emocione të forta”, tha Caruso për Guinness World Records.
“Vazhdimisht mendoja për versionin tim adoleshent, i cili e la shkollën për të ndjekur pasionin për skateboard dhe luftoi për të kaluar të gjitha zërat që i thoshin të hiqte dorë gjatë viteve”, shtoi ai.
Caruso, i cili ka 25 vite përvojë në skateboard, synonte të ngrinte ndërgjegjësimin për varësinë dhe problemet e shëndetit mendor. Ai tha se skateboardingu e ndihmoi të bëhej i pastër nga varësia para nëntë vitesh dhe shpreson që historia të frymëzojë të tjerët të bëjnë të njëjtën gjë.
Caruso e festoi mbërritjen në vijën e fundit duke hedhur skateboardin në oqean. Kryetari i Bashkisë së Virginia Beach, Robert M. Dyer, më pas mbajti një fjalim duke shpallur 19 Majin si Ditën e Chad Caruso.
