Vlojnë e zhurmojnë ditë-natë deri në kupë të qiellit në kanalet televizive në Kosovë për dhe rreth politikës, por për fat të keq asnjë debat nuk iu kushtua fillimit të korrje-shirjeve të grurit dhe sigurimit të bukës së motmotit për banorët e Kosovës. Pra, hesht TV publik(RTK) dhe heshtin edhe ato kombëtare. Tmerr dhe turp.
Mirëpo, turpi më i madh gjithsesi shkon në adresë të Ministrisë së Bujqësisë e cila është shndërruar në memece. Nuk ka asnjë lëvizje nga kjo ministri, thuajse çdo gjë është në rregull, teksa autokombajnat zhurmojnë ndër ara.
Ministri Faton Peci është i zënë me Listën “Guxo” rreth zgjedhjeve komunale. Jo, kjo është tragjike. Për më shumë asnjë e dhënë nuk ka nga kjo ministri se sa hektarë me grurë pritet të korren kësaj vere, çfarë rendimente priten për një hektar, sa tonë do të vendosen në hambarët e bujqve dhe a do të mund Kosova të sigurojë me bollëk grurë nga arat tona për nevojat e 2 milionë banorëve të vendit.
Apo do të detyrohemi të importojmë si përherë sasi të mëdha gruri e mielli me çmime të larta nga shtetet e rajonit me qëllim të plotësimit të nevojave të qytetarëve me bukën e motmotit.
E Qeveria, Kuvendi i Kosovës, Ministria e Bujqësisë, pastaj Federata dhe Sindikata e bujqve të Kosovës si dhe televizionet tona le të vazhdojnë të heshtin në pa kufi për korrje-shirje të grurit, ndërkohë që le të llomotisin dhe ulërijnë deri në kupë të qiellit për dhe rreth politikës në Kosovë.
