I nderuar popull shqiptar, të nderuara intelektualë shqiptarë, e nderuara Qeveria e Shqipërisë, e nderuara Qeveria e Kosovës në shkuarje dhe në ajo në ardhje, të nderuar politikbërës shqiptar në të tëra trevat Shqiptare dhe botërore.
Të indinjuar thellë më rrjedhat e fundit rreth projektit famëkeq, të ashtuquajturit “Mini Shengen i Ballkanit”, ne intelektualët shqiptarë, që kemi dhënë dhe jemi duke dhënë kontribut në shkencë për të mirë të njerëzimit në tërë rruzullin tokësor, ngremë zërin lartë që ky projekt i ngutshëm dhe i pa reflektuar për pasojat negative që do sjellë për kombin shqiptar, të ndërpritet nga ana e udhëheqësisë së Shqipërisë menjëherë.
Asociacioni në fjalë është krijesë apo ide e Serbisë, që ka për qëllim të na rifut në kthetrat e saj ekonomike dhe politike dhe çuditërisht kjo ide përkrahet nga kryeministri i Shqipërisë. Ky projekt është një dëm serioz për Kosovën, bazuar në faktin që Serbia nuk e njeh Kosovën si shtet. Pra, sipas kushtetutës së Serbisë, kufiri i saj me Shqipërinë është ai që ndanë Kosovën me Shqipërinë. Rrjedhimisht kufi “zyrtar” i “Shengenit të Ballkanit” është ai që ndanë Kosovën dhe Shqipërinë. Kështu rezulton që kryeministri i Serbisë, si bashkë ideator apo promovues i kësaj ideje, pranon që nuk ekziston kufi ndërkombëtar në mes të Serbisë dhe Kosovës, e cila nga autoritetet serbe ende trajtohet si Krahinë e Serbisë.
Ky projekt vetëm dëmton Shqipërinë, Kosovën dhe tërë shqiptarët në viset Ballkanike dhe disaporën shqiptare. Shqiptaria, në kohën e Gjergj Kastriotit, por edhe më parë edhe më vonë ka dhënë shumë për krijimin e kësaj Evrope që ekziston sot. Ne nuk kemi nevojë për asociacione me Serbinë, e cila para 20 viteve bëri gjenocid mbi popullin tonë të pambrojtur, duke vrarë e përdhunuar fëmijë, gra e pleq të pa armatosur. Serbia ende nuk na ka kërkuar falje për të gjitha dëmet që na i ka shkaktuar.
Ne Shqiptarët e kemi vendin në Bashkimin Evropian, nuk kemi ndonjë dobi strategjike të bëjmë bashkim vëllazërim me popujt sllav që dem-babadem janë munduar të na shkatërrojnë dhe stopojnë të hapërojmë përpara.
Ne duam demokraci të mirëfilltë dhe marrëdhënie fqinjësore reciproke më të gjitha shtetet përreth, por strategjikisht ne duam të jemi pjesë përbërëse e Evropës demokratike.
Lusim të gjithë popullin shqiptar në tërë botën të ngrehin zërin kundër këtij projekti anti-shqiptar. Kërkojmë nga Akademitë e Shkencave të Shqipërisë dhe të Kosovës të dalin kundër këtij projekti të pa menduar mirë se çfarë pasojash do ketë për të ardhmen e Kombit tonë. Kërkojmë nga qeveritë e shteteve të Shqipërisë dhe të Kosovës që ky projekt të stopohet menjëherë.
Populli shqiptar nuk ka nevojë të vëllazërohet më lindjen, e drejtuar nga Rusia, që nuk njeh demokraci e të drejta të njeriut. Ne kemi aleatët tonë Shtetet e Bashkuara të Amerikës dhe vendet më të zhvilluara perëndimore, që praktikojnë vlera të mirëfillta demokratike , ne duam të hapërojmë bashkarisht me këto vende që janë garanci për prosperitetin tonë.
Historia nuk do të na i falë gabimet që bëjmë sot dhe që do shkaktojnë pasoja negative për gjeneratat tona të tanishme dhe për ato të ardhme. Nëse ne intelektualët heshtim sot, kemi devalvuar shkencën që ne bëjmë, kemi devalvuar të vërtetën që ne i kemi borxh ti tregojmë popullit tonë dhe tërë njerëzimit.
Politikbërësit e Shqipërisë, ata të Kosovës, të tërë vendeve shqiptaro-folëse të Ballkanit dhe më gjer i ftojmë të bashkëpunojnë më neve, ne do i këshillojmë që mos bëjnë gabime të cilat do na kushtojnë shtrenjtë dhe nuk mund të korrigjohen më.
Gjithë të mirat tërë kombit shqiptar dhe tërë njerëzimit, në emër të intelektualëve shqiptarë nga e tërë bota: Prof. Dr. Fadil Çitaku, PhD dhe Prof. Dr. Jahja Kokaj, PhD
