Fjala intelektual gjithmonë ka pasur dimension të gjerë në çdo familje Shqiptare. Gjeneratat e tëra kanë ëndërruar dhe kanë punuar që djemtë dhe vajzat ti shkollojnë dhe edukojnë duke e ndërtuar profilin e kuptimit intelektual si vlerë shoqërore dhe kombëtare. Domethënia dhe kuptimi i personalitetit intelektual, do të thotë njeri i shkolluar, i edukuar, i përcaktuar për punën dhe profesionin njeri me integritet, i drejtë, me vlera humane dhe njerëzore, njeri shembull në familjen dhe rrethin ku jeton.
Këto janë virtytet e një intelektuali i cili i duhet shoqërisë dhe i cili duhet të jetë udhë rrëfyes dhe shembull pozitivë i ndryshimeve të rrethanave në një shoqëri e cila është e ngulfatur nga servilizmi, nga interesat e ngushta, nga epshet e ulëta primitive, nga mendësia dhe mentaliteti konservativ. Intelektuali i mirëfilltë është vlerë e cila i ndihmon shoqërisë për të ecur ne hap me kohën, duke sjell frymë dhe ide të reja të progresit në të gjitha lamitë e jetës shoqërore.
Mjerisht këto vlera vite me radhë janë zbehur te një pjesë e madhe e njerëzve të cilët krenohen me tituj shkollor por në anën tjetër këtyre “intelektualeve” u mungojnë vlerat elementare të cilat i përmendem më lartë e të cilat e krijojnë personalitetin e njeriut të profilit intelektual. Pas luftës në Kosovë një pjesë e njerëzve pa integritet vrapuan pas lakmisë materialo financiare duke marruar diploma dhe tituj shkel e shko pa asnjë meritë duke humbur dhe përdhosur integritetin personal të individit intelektual. Këto sjellje të pamoralshme duke u shndërruar në karakter të servilit, të pulentit. Shumë individ arritën të marrin pozita, që nuk i meritonin.
Kështu individët e caktuar përmes klaneve dhe grupeve morën pozita në institucionet më të ndryshme të Shtetit të Kosovës. Njerëzit e padenjë, padije dhe pa integritet u futën në sistemin e arsimit deri në nivelin më të lartë akademik. Këta njerëz të padenjë, e degraduan sistemin edukativo arsimorë në të gjitha nivelet e sistemit të Arsimit. Sot niveli i dijes te shumica e nxënësve dhe studentëve është për tu dëshiruar, një pjesë e pseudo intelektualeve u rreshtuan pas partive politike për interesat personale. Kjo mënyrë e sjelljes dhe e veprimit e ka goditur rëndë integritetin dhe moralin e intelektualit njeri.
Të rrallë janë njerëzit që me të drejtë luftojnë përmes formave të demokracisë për ti mbrojtur vlerat tradicionale dhe kulturën e popullit që dikur ishte vlerë për lakmi. Sot njerëzit me tituj të ndryshëm shkollor të cilët ja arritën në kaosin e pas luftës kanë depërtuar thellë në institucionet shtetërore pa u vlerësuar me meritokracia. Dhe kështu po ja zënë frymën ardhmërinë e këtij vendi. Në fund po theksojmë se më shumë se asnjëherë më parë kemi nevojë për një vetëdijesim të gjithanshëm kombëtar.
