Retorika e opozitës ndaj qeverisë për prishjen e raporteve të Kosovës me Amerikën është bërë monotone, e gërditshme dhe, besoj, pa sens. Në mungesë të skandalit të qeverisë, ata kanë shpikur këtë narracion të "antiamerikanizmit", nisur edhe nga ndjenjat e shqiptarëve të Kosovës ndaj SHBA.
Edhe nëse kjo është e vërtetë, pyetja e parë instinktive për çdo njeri do të ishte: ju që ishit në pushtet dhe nuk na ndërruat marrëdhëniet me Amerikën, çfarë të mira keni bërë për vendin, cilat janë rezultatet?
Sigurisht, rezultati është katastrofal: degradimi, shkatërrimi dhe humnera. Periudha ishte terror. Mitrovica ishte praktikisht e ndarë, kontrabanda dhe terrori kishin kapluar këtë pjesë të vendit, krimineli dhe bandat ishin sunduesit e veriut.
Situata është ndryshe sot: institucionet e Kosovës funksionojnë, kryetari është shqiptar dhe terroristët janë në kërkim. Gjithashtu, menaxhimi i parave publike është përmirësuar, niveli i korrupsionit është zvogëluar dhe besimi i qytetarëve në institucionet është rritur. Liberalizimi i vizave është rezultat i një qeverie të mirë, e cila ka vendosur bazat e nevojshme për investime të kompanive të mëdha.
Për të qenë pro-amerikan, duhet të çmoni veten, të mos vjedhni vendin tuaj dhe të mos japni tokën e shtetit për interesa personale, ashtu si ata që sot thirrën në amerikanizëm. Jam i bindur se amerikanët çmojnë dhe respektojnë më shumë dikë që nuk vjedh vendin e vet, sesa dikë që është servil dhe i korruptuar. Sa më shumë që vazhdoni me këtë qasje, aq më i pashpresë do të bëheni. Servilët nuk i do askush dhe nuk i çmon askush. Retorika e opozitës nuk e dëmton qeverinë dhe, rrjedhimisht, nuk i ndihmon ata të vijnë në pushtet."
