Se, pse Edi Rama dhe qeveria socialiste e korrrupsionit, hajdutërisë dhe e papërgjegjshmërisë vazhdon të qeverisë kjo vjen kryesisht prej gjëndjes mjerane ku ndodhet aktualisht Partia Demokratike e cila politikisht është pothuajse e asfiksuar nga autokracia, servilizmi, korrupsioni dhe nga pandryshueshmëria.
Nuk ka se si shpjegohet ndryshe pse realiteti shqiptar është kaq i zymtë dhe kur shoqëria dhe shteti janë kaq shumë të kërcënuar nga korrupsioni i lartë gjithinstitucional, a thua se nuk ekziston fare opozita. Problemi kryesor në Shqipëri është pushteti por nuk kishte pse të jetë problem opozita, kur opozita duhet të pretendojë që të japë zgjidhje duke e larguar nga pushteti pozitën aktuale.
Nuk u besohet alibive dhe as fantazive të atyre demokratëve, ishdeputetëve dhe deputetëve, as ishshtetarëve e pushtetarëve të Partisë Demokratike, dhe as mediave matrapaze e sahanlëpirëse të cilët mbështesin ose bëjnë sikur e mbështesin Sali Berishën; nuk u besohet as atyre që duken sikur protestojnë duke djegur disa kopertona apo goma makinash para Bashkisë së Tiranës. Nuk janë arsyetim dhe as justifikim alibirat duke akuzuar per ndërkombëtarët.
Nuk u besohet se ata e kanë sinqerisht protestën kundër qeverisë, por ata e bëjnë këtë sa për t’u dukur dhe për ta mbajtur sa të munden rreth vetës antarësinë demokratike dhe vetëm për favore dhe për të ruajtur privilegjet dhe për t’i siguruar dhe mbrojtur politikisht privilegjet dhe favoret personale, familjare dhe grupale të tyre.
Këtë rezyme të shkurtër të mësipërme po e paraqes unë që vij nga një familje nacionaliste dhe kundërshtare e regjimit komunist, vjen prej një demokrati të hershëm që në vitin 1991, dhe e di se kjo që paraqita më sipër nuk u pëlqen ishkomunistëve dhe ishsigurimsave të shtetit dhe as atyre të zhytur në korrupsion të cilët vetëm sa e kanë shfrytëzuar dhe vjelur Partinë Demokratike për interesa personale.
Në Partinë Demokratike, gjatë këtyre 30 viteve ka pasur orvajtje dhe tendeca për devijanca për t’u ndarë e shkëputur nga e kaluara dhe për ndryshimin, por përfundimisht edhe ata këto i kanë bërë për interesa personale, sepse të gjithë u rikthyen përsëri në PD dhe u bënë shërbëtorë e superservilë të joshjeve dhe të lëmoshave që moren nga pushteti i Berishës, gjë e cila është aktuale edhe sot, kur pavarësisht se Berisha është i shpallur non grata nga SHBA dhe Britania e Madhe dhe në arrest shtëpie, superservilët dhe ish të korruptuarit, pra të gjithë ata që ia kanë parë hajrin pushtetit të Berishës, ai rrethi i ngushtë i perfituesve nga pushteti i tij, pikërisht këta e mbajnë peng dhe e kanë përcarë Partinë Demokratike vetëm e vetëm për të mbrojtur interesat, privilegjet dhe bizneset e tyre që i kanë edhe në bashkëortakëri me pushtetin dhe me pushtetarët e pushtetit aktual.
