Ragip Xhaka është babai i Granit Xhakës. Graniti shpalli se mbështet PDK-në për zgjedhjet e 9 shkurtit 2025. Ndërkaq djali i Shkurte Fejyës, Arbër Behluli, i është bashkuar po kësaj partie. Ka një lloj inversi në këtë lloj diagrame. I famshëm nuk është Ragipi, por Graniti. Po ashtu i famshëm nuk është Arbëri, por e ëma, Shkurtja. Graniti promovon PDK-në për shkak se babai I tij ishte dënuar nga regjimi serb dhe ai e percepton PDK-në si çlirimtare nga ky regjim. Nuk i ka hy në sy as AAK, as VV, as LDK e Rugovës, nëse ka mbetur diçka nga Rugova te kjo parti, as VV.
Shkurte Fejza ishte e famshme edhe para se të këndonte këngën kushtuar Adem Jasharit “Mora fjalë”! Por ajo pa këtë këngë do mbetej te fama e kolegeve të saj. Ishte “Mora fjalë”, kënga që e veçoi nga koleget e saj. Me këtë këngë Shkurte Fejza u bë hit. Në një farë mënyre hit e bëri akti heroik i Adem Jasharit. Po të mos ishte Adem Jashari dhe vepra e tij unike në botë e vetë sakrificës për kombin dhe atdheun, nuk do të ishte as Shkurte Fejza në podiumin e simpatisë së shqiptarëve. Po t’ia këndonte dikujt tjetër këtë këngë, Shkurta nuk do të nderohej kaq shumë.
Por Shkurta i ra shkurt. E bekoi djalin e saj, se ai iu bashkua Partisë Demokratike të Kosovës. Ndoshta bëri mirë. Askush nuk ka të drejtë të paragjykojë asnjë parti politike dhe asnjë pozicionim të qytetarëve ndaj tyre. Megjithatë është e drejta e gjithkujt ta japë mendimin e tij. PDK dhe Adem Jashari janë larg njëri-tjetrit. Sepse udhëheqësit e PDK-së e përdorën luftën për të grabit pasuritë e Kosovës dhe për t’iu bashkuar projekteve të ndarjes së saj, ndërkohë që Adem Jashari dhe familja e tij derdhën gjakun për themelet e shtetit të Kosovës.
Nuk e di ku qëndron tashmë Shkurte Fejza. Kë vlerëson ajo më shumë?! Gjakun e Adem Jasharit dhe të familjes së tij, pra këngën që i kushtohet heroizmit të tij, apo interesat e fshehta që lidhen me afera të dyshimta?! Nuk ka alternativë tjetër për një emër VIP në Kosovë e kudo gjetkë. Ose je me atë, të cilit i këndon për heroizmin dhe veprën e tij sublime në shërbim të atdheut e kombit, ose je me ata që punuan për zhbërjen e shtetit të Kosovës. Nëse lidershipi i sotëm i PDK-së do ta kishte dënuar aktin e paprecedentë të ish-liderit të saj për ndarjen e Kosovës, do të kishte kuptim ndoshta edhe që djali i Shkurte Fejzës t’i bashkohej kësaj partie. Por kjo nuk ka ndodhur.
Tani të kthehemi te akti i Granit Xhakës. Edhe futbollisti ikonë e shqiptarëve, por që luan për Zvicrën, bën fushatë dhe reklamë për Partinë Demokratike të Kosovës. Sepse në imazhin e vet kjo parti lidhet me Ushtrinë Çlirimtare të Kosovës. Pra, si Graniti dhe i ati, Ragipi, janë pozicionuar në emër të patriotizmit. Kanë marrë anën e PDK-së për shkak të UÇK-së. Për shkak se Ragipi është persekutuar nga regjimi serb në Kosovë. Deri këtu gjithçka është e natyrshme, e justifikuar. Por ndodh që emigrantët jetojnë më shumë me të kaluarën, sesa me të tashmen. Më duket se edhe Ragip Xhakës i ka ndodhur e njëta gjë. I ka mbetur ora te koha e dhimbjeve të mëdha të kohës së Milosheviçit. Ndaj dhe nuk ka mundur të gjykojë për kohën e mëpasme.
P.sh Ragipi nuk e ka përjetuar keq ose i mungon informacioni për aktet anti-Kosovë të disa krerëve të UÇK-së pas luftës. Nuk ka dijeni për faktin se shumë prej tyre grabitën Kosovën në emër të kontributeve në luftë, pra abuzuan me sakrificat e Ragipit dhe shumë shqiptarëve të tjerë që sakrifikuan për Kosovën. Nuk është i informuar Ragipi e as Graniti për bashkërendimin e përpjekjet midis kreut të PDK-së, Hashim Thaçi dhe presidentit të Serbisë, Aleksandër Vuçiq, me koordinim të Edi Ramës, për ndarjen e Kosovës. Pra, për t’ia dhuruar Serbisë territorin më jetik të saj, veriun e Kosovës. Po t’i dinte mirë dhe në thellësi këto fakte, Ragipi e as Graniti nuk do të bëheshin me PDK-në, së paku sa kohë kjo parti nuk distancohet nga Thaçi, Lushtakët, Grabivcët dhe të tjera figura që e kanë dëmtuar atë. Do të qëndronin neutralë.
Dhe për në fund: Granit Xhaka, nëse është aq patriot, e ka mundësinë ta dëshmojë patriotizmin e tij. Të lejë partitë mënjanë dhe të vijë në Kosovë e ta marrë në dorë kombëtaren e saj. Duke e forcuar kombëtaren e Kosovës i bën shërbimin më të madh të mundshëm shtetësisë së saj. Këtë e kam pritur gjithmonë nga Granit Xhaka. Nuk kisha prit që ai të bëhet pjesë e një subjekti politik. Ai është shumë më i madh sesa një subjekt politik, cilido qoftë ai. Gjynah që e uli veten në një rang të tillë! Ai dhe Shkurte Fejza duhej të ishin neutralë!
