Këmbëngulja e Presidentit Trump në planin e tij për marrjen nën kontroll të Gazës dhe shpërnguljen e palestinezëve, mund ta shtyjë Lindjen e Mesme në një cikël të ri krizash me efekte shkatërruese mbi paqen dhe stabilitetin rajonal.
Trump ndezi tërbim në botën arabe kur papritur njoftoi se SHBA do të pushtonte Gazën, do të rivendoste më shumë se dy milionë palestinezë dhe do ta zhvillonte zonën siç e quan ai "Riviera e Lindjes së Mesme". Deklarata shkaktoi shqetësim të thellë në mesin e palestinezëve, të cilët kanë frikë nga një përsëritje e "Nakba" - katastrofës së vitit 1948 kur afro 800.000 palestinezë u larguan ose u dëbuan gjatë luftës që çoi në themelimin e Izraelit.
Yassem al-Budaiwi, sekretari i përgjithshëm i Këshillit të Bashkëpunimit të Gjirit, i kërkoi Trumpit të merrte parasysh marrëdhëniet e gjata midis vendeve arabe dhe Uashingtonit, por shtoi se bota arabe nuk do ta pranonte planin e tij.
Jordania dhe Egjipti e refuzojnë kategorikisht propozimin e Trumpit. Ai ka propozuar që palestinezët nga Gaza të zhvendosen në vendet fqinje si Jordania dhe Egjipti, por të dyja vendet e hodhën poshtë idenë.
Për Jordaninë, ku një numër i madh palestinezësh tashmë jetojnë, kjo ide të kujton planet e mëparshme të ultranacionalistëve izraelitë për të dëbuar plotësisht palestinezët nga Gaza dhe Bregu Perëndimor, duke e bërë në mënyrë efektive Jordaninë një zëvendësim për një shtet palestinez.
Presidenti egjiptian Abdel Fattah al-Sisi e konsideron planin një problem serioz sigurie. Ai beson se grupet islamike si Hamasi janë një kërcënim për Egjiptin dhe për të gjithë rajonin dhe kundërshton mundësinë që anëtarët e kësaj organizate të kalojnë kufirin dhe të vendosen në Egjipt.
Kajro do të presë një samit urgjent arab më 27 shkurt për të diskutuar zhvillimet serioze që përfshijnë palestinezët.
Sekretari i Përgjithshëm i Ligës Arabe, Abul Gheit la të kuptohet se një nismë e vitit 2002, në të cilën shtetet arabe i ofruan Izraelit normalizimin e marrëdhënieve në këmbim të shtetësisë palestineze dhe tërheqjes së plotë nga territoret e pushtuara në 1967, mund të riaktivizohej.
Plani i Trumpit përmbys politikën e SHBA-së për dekada. Ky propozimi përfaqëson një ndryshim rrënjësor në politikën aktuale të SHBA-së, e cila prej vitesh ka mbrojtur një zgjidhje me dy shtete - Izraeli dhe Palestina, që ekzistojnë krah për krah.
Si pjesë e armëpushimit, i cili duhej të zgjaste 42 ditë, 16 nga 33 të burgosurit izraelitë të rrëmbyer nga Hamasi deri më tani janë liruar, ndërsa pesë pengje tajlandeze janë liruar jashtë marrëveshjes së planifikuar.
Si pjesë e marrëveshjes, Izraeli liroi qindra të burgosur palestinezë, përfshirë ata që vuanin dënimin e përjetshëm për sulme vdekjeprurëse, si dhe njerëzit e arrestuar dhe mbajtur pa akuza gjatë luftës.
