Projekti 2025 është një iniciativë e Fondacionit Heritage, e nisur në prill të vitit 2023, me synimin për të përgatitur një plan të detajuar për një administratë të ardhshme konservatore në SHBA. Ky projekt përfshin bashkëpunimin e mbi 45 organizatave të djathta dhe është ndërtuar mbi katër shtylla kryesore, ěshtë dokument gjithëpërfshirës prej 920 faqesh, i titulluar “Mandate for Leadership: The Conservative Promise”, që ofron rekomandime të detajuara për politikat që duhet të ndjekë administrata e ardhshme. Dokumenti ka bazën e të dhënave për Personelin: një bazë e të dhënave publike që synon të identifikojë dhe të rekrutojë individë të përkushtuar ndaj agjendës konservatore, të cilët mund të shërbejnë në pozita kyçe brenda qeverisë federale.
Kjo pritet te realizohet nga “Akademia e Administratës Presidenciale” një platformë edukative online që ofron trajnime për individët e përzgjedhur, duke i përgatitur ata për rolet e tyre të ardhshme në administratë. Substanca e këtij projekti është “Plani i Tranzicionit”, një plan i detajuar për të siguruar një kalim të qetë të pushtetit dhe për të zbatuar me efikasitet politikat e propozuara që në ditën e parë të administratës së re.
Ndër qëllimet kryesore të Projektit 2025 janë:
• Ristrukturimi i Qeverisë Federale: Propozimi për të zëvendësuar punonjësit civilë me individë të përkushtuar ndaj presidentit, duke marrë kontrollin partiak të agjencive kyçe si Departamenti i Drejtësisë dhe Komisioni Federal i Tregtisë.
• Reformat në Imigracion: Propozimi për shfuqizimin e Departamentit të Sigurisë Kombëtare dhe krijimin e një agjencie të re të fokusuar në çështjet e imigracionit, me qëllim forcimin e kufijve dhe zbatimin e rreptë të ligjeve të imigracionit.
• Promovimi i Vlerave Konservatore: Synimi për të integruar vlerat tradicionale familjare dhe fetare në politikat qeveritare dhe shoqëri, duke përfshirë kufizime në kërkimet me qeliza burimore dhe rregullime mjedisore që favorizojnë lëndët djegëse fosile.
Projekti 2025 është konceptuar për të siguruar që një administratë e ardhshme konservatore të jetë e përgatitur mirë për të zbatuar agjendën e saj që në fillim të mandatit.
Fondacioni Heritage dhe ndikimi i tij në politikën konservatore në SHBA dhe në botë
Fondacioni Heritage është një institut shumë me ndikim në politikën konservatore në SHBA, duke ndikuar në politikat qeveritare, emërimet gjyqësore dhe prioritetet legjislative. Ndikimi i tij në qeverinë amerikane mund të shihet në disa fusha kryesore:
Zhvillimi i politikave – Heritage ka luajtur një rol të madh në hartimin e politikave konservatore, përfshirë uljen e taksave, deregulimin dhe reformat në kujdesin shëndetësor. Ai ka qenë thelbësor në formësimin e politikave ekonomike të Presidentit Reagan dhe ka ndikuar në platformat e Partisë Republikane që nga ajo kohë.
Emërimet gjyqësore – Fondacioni ka pasur ndikim të madh në rekomandimin dhe përzgjedhjen e gjyqtarëve konservatorë, veçanërisht në Gjykatën e Lartë. Ai ka luajtur një rol në procesin e përzgjedhjes së gjyqtarëve si Neil Gorsuch dhe Brett Kavanaugh.
Ndikimi legjislativ – Shumë ligjvënës republikanë përdorin hulumtimet dhe dokumentet e politikave të Heritage si bazë për përpjekjet e tyre legjislative. Fondacioni shpesh harton legjislacion model që ndikon në ligjet shtetërore dhe federale.
Administratat presidenciale – Heritage ka një rrjet të fuqishëm të ish-anëtarëve të tij që shërbejnë në administratat republikane. Për shembull, ai pati një rol të rëndësishëm në plotësimin e stafit të administratës Trump, duke ofruar udhëzime për politika dhe duke ndikuar në vendime mbi çështje si politika e jashtme dhe emigracioni.
Pra “Heritage Foundation” ka rolin e një instituti kërkimor dhe avokues ndërmjetësues përmes raporteve, konferencave dhe përpjekjeve lobuese, Heritage promovon parimet konservatore në Kongres dhe tek organizatat me ndikim në terren, duke ndihmuar në formësimin e debatit publik mbi çështje kyçe.
