Afrim Imeri, së fundmi, ka kujtuar me mall dhe dhembje të atin e tij, Skender Imerin – ‘Kena’, në përvjetorin e parë të vdekjes së tij, duke shprehur ndjenjat e thella për mungesën e tij.
Skender Imeri, një njeri i dashur dhe i respektuar nga të gjithë, ndërroi jetë më 28 janar të vitit 2024, duke lënë pas një boshllëk të paharrueshëm për familjen dhe ata që e njohën. Për Afrimin, ky është një moment i mbushur me kujtime dhe dhimbje, një kujtim që do të mbetet gjithmonë i gjallë në zemrën e tij.
Në kujtim të babait tim të dashur, i cili u largua nga kjo botë një vit më parë, ndiej se fjalët nuk mjaftojnë për të shprehur dhembjen dhe boshllëkun që ka lënë pas. Që nga ajo ditë e zezë, gjithçka duket sikur ka humbur kuptimin, sepse jeta pa ty nuk është më e njëjtë. Më mungon çdo gjë tek ti, baba – zëri yt i ngrohtë, këshillat e tua të urta, buzëqeshja jote që ndriçonte çdo ambient dhe aroma jote që më bënte të ndihesha i sigurt.
Nuk je mungesë vetëm për ne si familje, por për gjithë qytetin e Gjilanit. Ti ishe dhe do të mbetesh një ikonë e vërtetë, një njeri i respektuar dhe i dashur nga të gjithë ata që të njohën. Prania jote ishte një bekim jo vetëm për ne, por për të gjithë ata që patën fatin të ndanin momente me ty. Gjilani nuk është më i njëjtë pa ty. Shpesh dëgjoj njerëzit që flasin për të mirat e tua, për zemrën tënde të madhe dhe për shpirtin tënd fisnik. Nuk ishe vetëm një baba për mua, por edhe një mik i mirë, një bashkëshort i përkushtuar, një gjysh i dashur për nipërit e mbesat, dhe një vjehërr i denjë që trajtonte të gjithë me drejtësi dhe dashuri.
I lindur më 1953, ti e jetove jetën me dinjitet, duke na lënë pas kujtime të paharrueshme dhe një trashëgimi të çmuar vlerash. Humbja jote na ka tronditur të gjithëve, dhe edhe sot, një vit më pas, unë ende e kam të vështirë të besoj se nuk je më këtu. Duket sikur çdo gjë është një ëndërr e keqe nga e cila dua të zgjohem. Baba, ti ishe dhe do të mbetesh krenaria jonë. Shpirti yt jeton në çdo kujtim, në çdo fjalë dhe në çdo lutje që bëj për ty. Të dua dhe do të dua gjithmonë. Pusho në paqe, babai im i shtrenjtë. Të gjithë të kujtojmë me mall të pashuar. Afrim Imeri përfundon letrën e tij me një mesazh të ndjerë dashurie dhe mirënjohjeje.
