Institucioni i AKI-së, tash e sa muaj është me ushtrues detyre. Kjo për faktin se në tri vitet e fundit kjo Agjenci vitale për shtetin e Kosovës, ka ndërruar tre drejtorë.
E, drejtori i AKI-së emërohet nga presidenti dhe kryeministri së bashku, me mandat pesëvjeçar, me mundësi riemërimi edhe për një mandat.
E gjitha kjo ka mbetur si pasojë e situatës politike të ndodhur në vendin tonë.
Eksperti i sigurisë, Drizan Shala ka thënë se kjo është si pasojë e politikës e cila ka krijuar një pasqyrë jo e mirë në arenën ndërkombëtare të institucioneve mike të AKI-së.
“Ka afro 3 muaj që institucioni më i veçantë i shtetit ka mbetur me U.D dhe si pasojë e situatës politike është krijuar një pasqyrë jo e mirë në arenën ndërkombëtare të institucioneve mike të AKI-së, që është duke humbur kredibiliteti i punës së këtij institucioni si rezultat i lirimeve nga detyra dhe shkarkimeve të drejtorëve të këtij mekanizmi”, ka thënë Shala.
Sipas tij, kjo qeveri e re e cila sapo është krijuar duhet të ndërmerr hapa konkret për të zgjedhur drejtorin e ri të këtij institucioni.
“Qeveria e z.Kurtit me Presidentin e vendit sa më parë duhet të ndërmarrin hapa konkret për të zgjedhur drejtorin e ri të këtij institucioni, i cili duhet të jetë i pavarur në aspektin politik dhe me integritet të lartë profesional por edhe atij kombëtar”, përfundon Shala për “Bota sot”.
