Janë bërë disa muaj, që nga shkuarja e ish-krerëve të UÇK-së, Hashim Thaçi, Jakup Krasniqi, Kadri Veseli e Rexhep Selimi në Hagë.
Atyre iu konfirmuan aktakuzat e ngritura nga Gjykata Speciale, për krime lufte.
Mirëpo, mbështetja financiare për avokatët mbrojtës të të akuzuarve nga Dhomat e Specializuar me seli në Hagë, buxhetit të Kosovës i ka kushtuar mbi 464 mijë euro.
Natyrisht, kjo është një shumë e madhe, por nga buxheti i vendit pritet të ndahen edhe shuma të tjera, për përkrahjen financiare të avokatëve mbrojtës të të akuzuarve në Hagë.
Profesori dhe njohësi i çështjeve kushtetuese, Muhamet Kelmendi, në një prononcim për gazetën “Bota sot” ka komentuar shumën e parave të ndara nga shteti, për mbrojtjen e ish-krerëve të UÇK-së, që gjenden në Hagë.
Kelmendi tha se shteti ka detyrë që t’i përkrah me ndihma financiare dhe juridike, shtetasit e saj.
“Është detyrë e shtetit që shtetasit e vetë kudo ku gjenden, t’i mbrojë dhe t’i jap përkrahje financiare dhe ndihmë juridike.
Kjo edhe më tepër, nëse krerët e shtetit kapen dhe vihen në karrigen e të akuzuarve dhe ku implikohet shteti nga ata janë”, deklaroi ai.
Profesori u shpreh se është një e drejtë kushtetuese, ku nuk e lë askënd pa mbrojtje juridike, pasi nuk ka procese gjyqësore që zhvillohen pa avokatë.
“Është e drejtë kushtetuese se në gjykatë askush nuk lejohet pa mbrojtje të kualifikuar juridike. Këtë mbrojtje e kanë qytetarët tanë në Kosovë dhe në botën e jashtme, nuk ka procese pa avokatë”, theksoi Kelmendi.
Në fund, ai tha se mbrojtja në gjyq është e drejtë elementare e lirive të njeriut, mirëpo në rastin e ish-krerëve të UÇK-së, duhet të kërkohet arsyeja pse janë ndarë kaq shumë mjete.
‘E drejtë elementare e lirive të njeriut dhe të qytetarëve është dinjiteti dhe mbrojtja në gjyq. Këtu duhet kërkuar shkakun pse u ndanë kaq shumë mjete nga Kosova për mbrojtjen e të akuzuarve në Hagë”, përfundoi Muhamet Kelmendi.
