Tashmë kur po afrohen zgjedhjet lokale, kryetari i Lidhjes Demokratike të Kosovës, Lumir Abdixhiku, ka filluar të jetë shumë aktiv në terren.
Pasi LDK ka zyrtarizuar shumicën e kandidatëve për kryetar komunash, Abdixhiku po viziton çdo Komunë të Kosovës duke prezantuar kandidatët e tij dhe duke u takuar me elektoratin e LDK-së.
E daljen në terren të Adixihikut, edhe pse jemi 4 muaj lar zgjedhjeve lokale, veprimtari dhe ish kryetari i LDK-së në Zvicër, Haki Latifi, e sheh si një nga hapat më të duhur të kryetarit të porsazgjedhur të LDK-së.
“Ditëve të fundit LDK ka filluar prezantimin e kandidatëve për kryetar të Komunave apo edhe për Kuvend Komunal. Besoj se do të shohim një garë interesante, duke marrë parasysh proceset e kaluara të zgjedhjeve lokale, edhe në këto zgjedhjet të këtij viti mijëra kandidatë do të garojnë për pozitën e kryetarit në gjithsej 38 komuna apo edhe për ulëse në Kuvendet Komunale. Ndërkohë, shumica e kryetarëve aktualë të LDK-së që udhëheqin nëpër komuna të Republikës së Kosovës, vetëm se janë rikandiduar për të garuar sërish për të parin e komunës. Në kuadër të takimit me degët e LDK-së, kryetari i LDK-së z. Lumir Abdixhiku sëbashku me kryesinë, po i bëjnë hapat e duhur duke u takuar me struktura të Degëve dhe votuesit e LDK-së”, thotë Latifi për “Bota sot”.
Sipas tij, LDK ka nevojë t‘i fuqizoj lidhjet me degët ose strukturën e saj nëpër komuna.
![Image](/media/botasot.info/images/2021/June/24/auto_auto_haki16053833151624562221.jpg)
“Mendoj se LDK në të kaluarën e afërt nuk është dëgjuar aq sa duhet zëri i qytetarëve dhe votuesve të LDK-së. Ku si pasojë ka disa elemente të cilat mund t’i atribuohen kësaj rënie në zgjedhjet parlamentare e mos mbështetjes qytetare. Andaj , LDK ka nevojë t‘i fuqizoj lidhjet me degët ose strukturën e saj të cilët i kanë, në mënyrë që të arrijnë të kuptojnë më mirë se cilat janë kërkesat e elektoratit në nivelin më të ulët, pra në nivelet e komunave dhe të fshatrave. Me një komunikim të tillë të daljes në terren dhe takimi me bazën, Kryetari i LDK -së z, Abdixhiku do t’i kuptoj më mirë se cilat janë kërkesat e qytetarëve”, shprehet Latifi.
Më tej, Latifi deklaron se pozita e LDK-së si opozitë, do ta ndihmojë që ta rikthejë elektoratin e saj.
“LDK tani është në opozitë dhe do të ketë më tepër kohë për të reflektuar, analizuar cilat kanë qenë problemet e organizimit brenda saj, në mënyrë që për ta rikthyer LDK-në në një afat të gjatë por me shumë vendosshmëri, me shpresë që votuesit e saj që kanë ikur në të kaluarën mund të kthehen”, thekson Latifi.
Për fund, Latifi shpreson që prishtinasit ta vlerësojnë kandidatin e LDK-së për kryetar komune, Përparim Rama.
“Sa i përket kandidimit për kryetar të Prishtinës të z. Përparim Rama edhe pse personalisht nuk e njohë, fletë për një personalitet me një biografi të pasur profesionale, një intelektual shqiptar me pikëpamje të vlerave të qytetërimit perëndimor. Duke shpresuar që qytetarët e Prishtinës do të dinë ta vlerësojnë”, përfundon për “Bota sot”, veprimtari dhe ish kryetari i LDK-së në Zvicër, Haki Latifi.