Rusia po vazhdon ta mbështesë Serbinë me mjete ushtarake.
Vetëm pak ditë më parë, shteti rus i dhuroi Serbisë tanke të tipit “T-72MS” dhe makina të blinduara për qëllime zbulimi tip “BRDM-2MS” me vlerë rreth 75 milionë euro, dorëzimi i të cilave u bë në kazermën e Nishit “Mija Stanimiroviç”.
Ministri serb i Mbrojtjes, Stefanoviç bëri të ditur se ky donacion u bë me marrëveshje të Vuçiqit dhe Putinit.
“Ky është një donacion i Federatës Ruse për Ushtrinë e Serbisë në vlerë prej rreth 75 milionë eurosh, e cila përbëhet nga 30 transportues të blinduar tip ‘BRDM-2MS’ dhe 30 tanke të modernizuar tip ‘T-72 MS’, bazuar në marrëveshjen e rënë dakord në Soçi nga dy presidentët Vuçiq dhe Putin.
Ne i jemi shumë mirënjohës për Federatën Ruse, sepse ky është një përforcim i rëndësishëm për Ushtrinë e Serbisë”, tha ministri i Mbrojtjes, Nebojsa Stefanoviç pas marrjes në dorëzim.
Ky bashkëpunim mes Rusisë dhe Serbisë po shihet si një lloj kërcënimi për Kosovën dhe shtetet e rajonit, duke ditur se kjo po bëhet me qëllim të jetësimit të projektit ‘Serbia e Madhe’.
Këto bashkëpunime të Rusisë dhe Serbisë i ka komentuar në një prononcim për gazetën “Bota sot”, njohësi i çështjeve politike, Rexhep Shahu.
Ai u shpreh se Serbia është këmba e Rusisë në rajonin e Ballkanit, e që fatkeqësisht Kosova nuk mund ta ndalojë shtetin rus që t’i jap armë shtetit serb.
“Rusia do ta ketë këmbë të sajën Serbinë në Ballkan. Kufiri mes botës euroatlantike dhe asaj ish komuniste është në Kosovë. Kosova nuk e ndalon dot Rusinë që te mos i japë armë Serbisë”, deklaroi Shahu.
Në vazhdim, analisti kërkoi nga Kosova që të shtojë armatimin, ta edukojë popullin e saj dhe të bëhet ‘Izrael’ në Ballkan.
Mirëpo, Shahu tha se kjo arrihet vetëm nëse politikanët shqiptarë bashkëpunojnë me Amerikën dhe jo me Serbinë e Rusinë.
“Kosova mundet të shtojë armët e veta, mundet të edukojë e formojë popullin e vet, mundet që ta bëjë një shtet të fortë, mundet që Kosova të bëhet Izrael në Ballkan, nëse politikanët e Kosovës bashkëpunojnë me Amerikën dhe nuk bashkëpunojnë me Rusinë e Serbinë.
Këtë ka në dorë Kosova, të forcohet dhe nuk ka në dorë të pengojë bashkëpunimin ruso-serb”, përfundoi Rexhep Shahu.
Kujtojmë se disa ditë më parë, Shtetet e Bashkuara të Amerikës i kanë dhuruar Forcës së Sigurisë së Kosovës 55 automjete ushtarake.
Ku kjo dëshmon se marrëdhëniet Kosovë-SHBA janë më të forta se asnjëherë më parë./BS
