Si është e mundur që së paku dy shefa të AKI-së, shërbimit Inteligjent të Kosovës të jenë në mbrojtje të Hashim Thaçit.
Kalimi i ish dy shefave të AKI-së, nga veprimtaria në mbrojtje të shtetit, sipas detyrës zyrtare, në mbrojtje të së paku një të akuzuari nga gjykata speciale, i cili dyshohet kryekëput për dhënie të urdhrave apo mbështetje të ekzekutimeve me motive politike, është një ngjarje shqetësuese.
Si është e mundur që së paku dy shefa të AKI-së, shërbimit Inteligjent të Kosovës të jenë në mbrojtje të Hashim Thaçit.
Kalimi i ish dy shefave të AKI-së, nga veprimtaria në mbrojtje të shtetit, sipas detyrës zyrtare, në mbrojtje të së paku një të akuzuari nga gjykata speciale, i cili dyshohet kryekëput për dhënie të urdhrave apo mbështetje të ekzekutimeve me motive politike, është një ngjarje shqetësuese.
Sipas ligjit për AKI-në, është detyrë e saj, dhe drejtuesve të saj, që të mbledhin ‘informacione në lidhje me kërcënimet ndaj sigurisë së Kosovës. Në çdo rast kërcënim ndaj sigurisë së Kosovës konsiderohet kërcënimi ndaj integritetit territorial, integritetit të institucioneve, rendit kushtetues, stabilitetit dhe zhvillimit ekonomik, si dhe kërcënimet ndaj sigurisë globale në dëm të Kosovës’.
Shefi i AKI-së i raporton drejtpërdrejtë kryeministrit të vendit, si dhe e informon edhe presidentin, ndërsa zgjidhet në marrëveshje apo bashkëvendimmarrje të plotë nga të dy.
Reagimi i parë për angazhimin e dy ish drejtuesve të AKI-së, në mbrojtje të ish-presidentit të vendit është bërë nga familjarë të Haki Imerit, i vrarë para 2 vitesh.
“Është interesante kjo strategjia e ekipit të mbrojtjes së Gjarpnit. Në ekipin e mbrojtjes së Thaçit ka këso personalitetesh: Bashkim Smakaj ish-drejtor i AKI-së,
Driton Gashi ish drejtor i AKI-së”, shkruajnë në faqen e Haki e Imerit në Facebook.
Me të vërtetë familja Imeri pyet për legjitimitetin e udhëheqësve të AKI-së. “Shtrohen shumë pyetje këtu se çka kërkojnë ish shefat e shërbimit në ekipin e mbrojtjes së Hashim Thaçit?”
Më tej deklarimi i tyre se AKI-ja kishte kryer veprime të karakterit privat, pra për nevoja të mbrojtjes së interesave private dhe jo të shtetit, është mëse legjitime. “Ky është rrëfimi i vërtetë se si ishte privatizuar AKI-ja ose se si i kishte shërbyer interesave personale të Hashim Thaçit...! “, thuhet ne reagimin e familjes Imeri, por që njëkohësisht besojnë se këto veprime të vet ish presidentit, më shumë do ta kompromitojnë para gjykatës se sa që do ta mbrojnë. “Me këtë lojë ekipi i Thaçit vështirë se do ta bindë Gjykatën për mbrojtjen e tij në liri”.
Po në këtë frymë, se AKI, përkatësisht drejtues të saj kanë shfrytëzuar resurset shtetërore të sigurisë për nevoja private, madje duke abuzuar dhe shtrembëruar të vërtetën, argumentohet me skandalin e publikuar pak ditë më parë, se si ish kreu i Shërbimit të AKI-së Driton Gashi, ishte marrë vesh me ish-prokurorin special Sylë Hoxha, për t’i përfshirë dy agjentë të AKI-së si dëshmitarë në procesin gjyqësor të ashtuquajtur “Syri i Popullit”. Agjentët e AKI-së, kishin dhënë dëshmi të rreme në gjykatë kundër Dr.Sadri Ramabajës zyrtarë i Lëvizjes Vetëvendosje, i cili akuzohej se kishte ndihmuar Murat Jasharin, tanimë të ndjerë për dhënie të ndihmës në kryerjen e veprës terroriste.
Kjo situatë e fundit shpjegon, të parën, përkatësisht veprimet e mëhershme të Driton Gashit, ish shef i AKI-së, se pse ai ishte vënë kaq lehtësisht në shërbim të Thaçit, i cili sigurisht duke e ditur se me çfarë devotshmërie do t’i shërbente personalisht, e kishte emruar shef të njërës prej shtyllave kryesore të sigurisë dhe të vetë shtetit të Kosovës.
Paraprakisht, në mars të vitit 2018 e kishte nxjerrë një vendim për shkarkimin e Gashit, kryeministri i asaj kohe Ramush Haradinaj.
Rast tjetër flagrant, por tashmë si ish shef – AKI-së, është ndërhyrja e Gashit në dokumentet sekrete në Presidencë, përkatësisht përpjekja e tij për të marrë disa dosje nga kasaforta e Presidencës, në bashkëpunim me shefin e AKI-së të asaj kohe, Kreshnik Gashin.
Kjo ndërhyrje flagrante e tij, çoi në përjashtimin nga detyra e sekretarit të Presidencës.
“Komisioni i themeluar me vendim ad hoc për nivelin e lartë drejtues, me vendim të u.d. Presidentes Osmani, më 20 janar 2021, në rastin disiplinor ndaj z.Driton Gashi, sekretar në zyrën e Presidencës, ka përmbyllur shqyrtimin e këtij rasti dhe ka vendosur unanimisht shqiptimin e masës disiplinore: largim nga shërbimi civil dhe e ka obliguar zyrën e Presidentes për zbatimin e këtij vendimi”, thuhej në një njëoftim zyrtar të Presidencës.
Ky incident pat çuar në shkarkimin e shefit tjetër të AKI-së, Kreshnik Gashit, në dhjetor të vitit 2020, kur në krye të Qeverisë ishte Avdullah Hoti.
Sipas Ligjit për AKI-në, ajo është e autorizuar të mbledhë informacion, mbajë dhe shpërndajë për qëllime të ligjshme qeveritare, e përcaktuar që në nenin 2 të këtij Ligji.
Por, siç dëshmojnë veprimtaritë e tre ish shefave të AKI-së, çojnë në një konkludim të padiskutueshëm se ata ishin në shërbim privat të Hashim Thaçit, ashtu siç po veprojnë tani dy prej tyre.
Hashim Thaçi, pra jo rastësisht ka marrë në ekipin e tij dy ish krerë të AKI-së. Duke i pasur në ekip dy shefa të Agjencisë që mbledhnin informacion, ata mund të jenë në dijeni të lëvizjes dhe se ku jeton çdo dëshmitar potencial kundër Thaçit në gjykatën speciale.
Në këtë sens janë legjitime apelet dhe frika e familjeve të viktimave të vrasjeve politike, që të mos lirohen përkohësisht nga Haga, të arrestuarit për këto vrasje, dje nga familja Imeri, dhe sot nga familja Dajaku, biri i së cilës Besimi u vra sepse ishte truproje e presidentit Ibrahim Rugova.
“Vetë fakti se është pa mëse e nevojshme për gjykimin e të dyshuarve të krimit në një gjykatë jashtë vendit, tregon se është shumë e rrezikshme dhe jo serioze, lirimi i tyre të mbrohen në liri!”, i tha “Bota sot”, Xhevat Dajaku, vëllai i Besimit të vrarë në atentatin e vitit 2001, ku mbet i vrarë edhe gazetari i “Bota sot”, Bekim Kastrati.
Vetë Xhevati, pas vrasjes së Besimit ka shërbyer në sigurimin fizik të presidentit Rugova.
Xhevati, vlerëson se lirimi i ‘ndërmarrjes së përbashkët kriminale’ do të nënkuptonte fitore të krimit. “Të kërkohet lirimi i ndërmarrjes kriminale, ose eventualisht të gabohet e të lirohen nga gjykata, alfa e omega e asaj ndërmarrje famkeqe, është sikur të futet në funksion lokomativa e qindra vagonave të krimit!”, thotë Xhevati.
Këto ngjarje dhe shqetësimet e viktimave të familjeve të vrasjeve politike e bëjnë të pashmangshme nevojën për një hetim të punës së Agjencisë, përkatësisht të abuzimeve nga Agjencia dhe drejtuesit e saj.
Një gjë të tillë e parasheh edhe Ligji: “Nëse komisioni mbikëqyrës parlamentar ka bazë të besojë se AKI-ja po kryen detyrat e veta në mënyrë të paligjshme, të papërshtatshme apo joprofesionale, ai mund të kryejë një hetim gjatë të cilit komisioni mbikëqyrës parlamentar mund të marrë në pyetje Punonjësit e AKI-së dhe të ketë qasje në dokumentet relevante të AKI-së”.
