Në Beograd janë zhvilluar takime lidhur me vazhdimësinë e projektit “Ballkani i Hapur”, ku pjesë e këtyre ka qenë edhe kryeministri shqiptar, Edi Rama.
Mirëpo, këtyre takimeve u parapriu edhe dorëheqja e kryeministrit të Maqedonisë, Zoran Zaev, gjë e cila ngjalli dyshime për ecurinë e këtij projekti.
Në Beograd janë zhvilluar takime lidhur me vazhdimësinë e projektit “Ballkani i Hapur”, ku pjesë e këtyre ka qenë edhe kryeministri shqiptar, Edi Rama.
Mirëpo, këtyre takimeve u parapriu edhe dorëheqja e kryeministrit të Maqedonisë, Zoran Zaev, gjë e cila ngjalli dyshime për ecurinë e këtij projekti.
Megjithatë, pavarësisht dorëheqjes së Zaevit, Maqedonia e përkrahi “Ballkanin e Hapur” dhe si përfaqësues e dërgoi zv/kryeministrin Nikolla Dimitrov.
Këto takime prodhuan deklarata të ndryshme, përfshirë edhe deklarata që ngriti tensione dhe polemika të ndryshme.
Ish-kryeredaktori i Radio Evropës së Lirë (REL), Melazim Koci, në një prononcim për gazetën “Bota sot” komentoi rrjedhën e Ballkanit të Hapur, pas dorëheqjes së kryeministrit maqedonas, Zoran Zaev.
Fillimisht, ai tha se dështimi për të hapur bisedimet me BE-në është arsyeja e dorëheqjes së Zaevit, dhe jo Ballkani i Hapur.
“Dorëheqja e Zaevit nuk besoj që ka të bëjë me Ballkanin e Hapur. Ajo është pasojë e dështimit të Zaevit për të hapur bisedimet me Bashkimin Evropian. Ky ka qenë premtimi kryesor i Zaevit dhe vetoja e Bullgarisë pamundësoi përmbushjen e këtij synimi të Shkupit. Pos dështimit në raportet me Brukselin, Zaev nuk arriti të jetësoj as premtimet tjera në planin e brendshëm dhe rrjedhimisht dorëheqja është pasojë e dështimit të tij në planin e brendshëm dhe të jashtëm”, deklaroi Koci.
Sipas tij, tjetër dështim i kryeministrit maqedonas është edhe përfshirja në Ballkanin e Hapur, pasi kjo nismë është projektuar nga Rama dhe Vuçiq dhe në këtë mënyrë është minuar rëndësia e Procesit të Berlinit.
“Në kuadër të dështimeve të Zaevit është edhe përfshirja në nismën Ballkani i Hapur. Kjo nismë nuk ka as kokë as bisht. Është ide dhe projekt i Ramës dhe Vuçiqit për qëllime të ndryshme. Vuçiq avancon këtë ide për të dëshmuar se Serbia nuk është e izoluar në Ballkan dhe këtë ia mundëson kryeministri i Shqipërisë. Përmes Ballkanit të Hapur është minuar Procesi i Berlinit që zhvillohej nën mbikëqyrjen e Bashkimit Evropian. Serbia ka minuar Procesin e Berlinit, sepse ai parasheh 6 subjekte të barabarta dhe Beogradi nuk është i gatshëm ta pranoj Kosovën të barabartë”, theksoi ish-kryeredaktori i REL-it.
Në vazhdim, Koci tregoi edhe pse Serbia po synon minimin e Procesit të Berlinit dhe formimin e Ballkanit të Hapur.
Ai tha se Vuçiq me këtë nismë po synon që Beogradi t’i kthehet politikës së vjetër shoviniste, që në të kaluarën kjo politikë ka shkaktuar ngatërresa dhe luftëra ballkanike.
“Për të zhvendosur vëmendjen nga përgjegjësia e Serbisë për minimin e Procesit të Berlinit është trilluar Ballkani i Hapur. Me këtë lëvizje Vuçiq dërgon mesazhin se e do bashkëpunimin me vendet e tjera të Ballkanit, por me diktatin e Beogradit dhe jo të Brukselit. Në këtë mënyrë Beogradi i kthehet politikës së vjetër shoviniste "Ballkani ballkanasve" që rëndom ka qenë rrugë e sigurt për ngatërresa dhe luftëra ballkanike.
Vuçiq përmes “Ballkanit të Hapur” dërgon mesazhin se çështjet kontestuese në këtë hapësirë do të zgjidhen nga vetë ballkanasit pa përzierje të faktorëve të jashtëm. Ndërkohë, Serbia armatoset nga Rusia dhe përgatitet për luftë. Ajo tashmë e ka bërë publike gati në formë zyrtare se synon aneksimin e Republikës Serbe në Bosnjë dhe Veriun e Kosovës. Ballkani i Hapur i shërben si mbulesë për aventurën e rradhës që është duke e përgatitur”, nënvizoi ai.
Tutje, ish-kryeredaktori e konsideroi shumë dëshpërues përkrahjen e Edi Ramës për Ballkanin e Hapur.
Ai tha se është vështirë të kuptohet qëllimi i Ramës, por ai po mashtrohet keq nëse mendon se me Beogradin e Vuçiqit mund të bashkëpunohet mbi bazat e barazisë.
“Në gjithë këtë lojë të rrezikshme politike mbetet befasues dhe shumë dëshpërues pozicionimi i Edi Ramës. Të bashkohesh në Ballkanin e Hapur duke qenë vend anëtar i NATO-s dhe këtë ta bësh me Serbinë si sateliti i fundit i Rusisë në këtë hapësirë, është vështirë e kuptueshme. Cili është synimi i fundit i Ramës në këtë lojë edhe më vështirë është të deshifrohet. Nëse Edi Rama mendon se me Beogradin e Vuçiqit mund të bashkëpunohet mbi bazat e barazisë mashtrohet keq”, potencoi Koci.
Krejt në fund, ai përkujtoi takimet e fshehta të Tugjman dhe Millosheviq, ku më pas shpërtheu edhe lufta kroato-serb.
Koci shpresoi që një gjë e tillë të mos ndodhë pas takimeve Rama-Vuçiq, pasi Ballkani i Hapur është nismë shumë e mjegullt dhe kontradiktore.
“Dyshja Rama-Vuçiq përkujtojnë shumë dyshen Tugjman - Millosheviq. Edhe Tugjman ishte takuar fshehur 50 herë me Millosheviqin dhe ishin marrë vesh për shumë gjëra, por që e gjitha përfundoj me një luftë të llahtarshme kroato - serbe.
Urojmë që një gjë e tillë të mos përsëritet në rastin e takimeve Rama-Vuçiq, përkatësisht Ballkanit të Hapur. Mjerisht ne jemi dëshmitarë të një nisme shumë të mjegullt dhe kontardiktore e cila nuk dimë se ku do e dërgojë Ballkanin”, përmbylli Melazim Koci për “Bota sot”.
