“Shkatërron Republikën e Kosovës”/Vjen thirrja për mos tërheqje për Asociacionin – këto shtete mund të na përkrahin

Tema e Asociacionit të komunave me shumicë serbe vazhdon të jetë një nga temat më të përfolura.

Derisa Serbia kërkon formimin e tij, Kosova vazhdimisht është kundër dhe ai është hedhur poshtë si jokushtetues nga Gjykata Kushtetuese e Kosovës.

Gjatë ditës së djeshme, zëdhënësi i Bashkimit Evropian, Peter Stano, deklaroi se BE pret zbatimin e të gjitha marrëveshjeve të nënshkruara nga të dyja palët në dialog, përfshirë dhe Asociacionin dhe se kjo i ishte bërë e ditur edhe kryeministrit Kurti në takimin e 30 shtatorit.

Së fundmi edhe presidentja Osmani ka deklaruar se Asociacioni nuk do të formohet dhe se është jokushtetues.

Por, sa do të arrijë Kosova që ta përballojë presionin për formimin e tij dhe si duhet të veprojë?

Lidhur me këtë, për gazetën “Bota sot” ka folur profesori dhe juristi Muhamet Kelmendi.

Ai ka thënë se Asociacioni serb e shkatërron Republikën e Kosovës dhe se iniciativa për formimin e tij vjen nga BE dhe ish udhëheqës të Kosovës por që ai nuk duhet të formohet.

Muhamet Kelmendi

“Iniciativa për organizimin e Asociacionit serb në Kosovë është vepër e UE dhe të disa forcave të kaluara politike në Kosovë. Si vepër e UE, jo vetëm Peter Stano, si zëdhënës, ku z. Borrell dhe z. Lajçak, po vendosin për dialog, por edhe disa shtete janë për Asociacion. Mirëpo, Asociacioni nuk duhet të formohet. Nga vet natyra e vetë politiko-juridike, ky organizim krijon shtet të ri serb dhe kështu shkatërrohet përfundimisht Republika”, është shprehur ai.

Sipas Kelmendit, Borrell dhe Lajçak kanë humbur besueshmëri dhe BE nuk e ka forcën e presionit që ta detyrojë Kosovën për Asociacionin, derisa përmend se për çka duhet të bisedohet me Serbinë në dialog.

“Tash UE me z.Borrell dhe z. Lajçak kanë humbur shumë në besueshmëri. Edhe vetë UE nuk e ka forcën e presionit që të detyrojë Kosovën në organizimin e Asociacionit. Kosova i ka temat e dialogimit. Nuk mund të dialogohen çështjet e brendshme me shtetin serb. Mund te dialogohen raportet ndërshtetërore mbi bazën e reciprocitetit. Me reciprocitet nuk zgjidhet çështja e 1600 personave të zhdukur dhe që janë nëpër Serbi. Nuk bëhet kompensimi dhe as reparacioni i dëmit material dhe të atyre morale. Janë mbi 1 milion shqiptarë të dëbuar nga regjimi serb me dhunë dhe me terror nga Kosova. Kolonat e dëbimit masovik nuk duhet të harrohen kurrë. Po çka dhe si mund të ecet me shtetin serb kur ai është shteti që në mënyrë të organizuar, sipas planit të Vaso Cubrillovit, me titull: Shpërngulja e Shqiptarëve, të Akademisë së Serbisë, mbi 20 mije femra shqiptare i kanë përdhunuar kriminelët serbë. Mbi këto çështje duhet të dialogohet. Temat tjera janë fare të parëndësishme”, ka vlerësuar profesori.

Ai shton se Serbia duhet të paditet sa më shpejt, derisa shton se për dialogun në anën e Kosovës do të dalin edhe shtete si SHBA-të, Angli, Gjermania dhe Austria.

“Nuk mund të krahasohen çështjet inekzistente me gjenocidin serbomadh në Kosovë. Serbia duhet sa më parë të paditet. Këto janë temat e dialogut. Kam besim se do të dalin sigurisht në anën e Kosovës SHBA-të, Anglia, ndoshta Austria e Gjermania”, ka potencuar ai.

Kelmendi ka thënë se serbët i kanë të drejtat në Kosovë më shumë se çdo minoritet tjetër në botë dhe çdo organizim tjetër është vdekje për Kosovën, që nuk duhet lejuar.

“Po me një përkushtim dhe qëndrim të patundur mund të ecet përpara, pa ndonjë subjekt juridik. Minoriteti serb i ka të gjitha të drejtat. Ata kanë më shumë se çdo minoritet tjetër në botë të drejta. Nuk gjendet as vend me këto të drejta të pakufizuara për minoritetin serb. Çdo organizim tjetër është vdekje për Kosovën. Këtë nuk duhet lejuar”, ka deklaruar Muhamet Kelmendi për gazetën “Bota sot”.