Gjilani është një nga komunat që në zgjedhjet lokale ndryshoi kryetarin e tij. Ishte Alban Hyseni nga Lëvizja Vetëvendosje që arriti ta mposhtë Lutfi Hazirin e LDK-së, pas disa vitesh udhëheqje.
Për 859 vota Hyseni i LVV-së fitoi në qytetin e Gjilanit, duke e mposhtur Lutfi Hazirin. Hyseni i mori 21,374 vota, kurse Haziri i mori 20,515 vota.
Shumëkush humbjen e Hazirit e vlerësoi si një ndëshkim për qeverisjen e tij dhe përkrahjen e tij për shkëmbimin e territoreve. Madje, analistët e shohin këtë humbje si sinjal që Haziri duhet të tërhiqet nga politika.
Kujtojmë se muaj më parë, Lutfi Haziri e humbi edhe betejën për tu zgjedhur kryetar i Lidhjes Demokratike të Kosovës (LDK).
Duke u bazuar në rezultat e këtyre dy garave, mund të thuhet se karriera politike e Lutfi Hazirit është në një pozitë jo të favorshme për të.
Mulliqi: Lutfi Haziri duhet të pensionohet nga politika!
Analisti politik, Skënder Mulliqi në një prononcim për gazetën “Bota sot” komentoi humbjen e Lutfi Hazirit në Gjilan dhe karrierën e tij politike.
Sipas tij, ishte vendim i duhur zgjedhja e Lumir Abdixhikut si kryetar i ri i LDK-së, pasi çdo ditë po largohen njerëzit e Isa Mustafës, të ‘gardës së vjetër’.
“Largimi i strukturës së vjetër e burokratike të LDK-së, të cilët bënë aleanca të panatyrshme me PDK-në, ka sjellur freski në subjektin politikë të themeluar nga dr. Ibrahim Rugova. Largimi i tyre nga postet udhëheqëse, dhe sidomos të Isa Mustafës dhe ardhja e Lumir Abdixhikut në krye të partisë, po shihet se ka qenë potez i qëlluar i LDK-së, edhe pse ende kërkohen të bëhen reforma duke i larguar njerëzit e Isa Mustafës, deri te nëndegët e këtij subjekti politik”, deklaroi analisti.
Mulliqi vlerëson se Isa Mustafa, Skënder Hyseni, Agim Veliu dhe Lutfi Haziri e dëmtuan Lidhjen Demokratike të Kosovës (LDK), pasi u bënë argatë të Hashim Thaçit.
Dhe, sipas tij njëra nga arsyet e humbjes së Lutfi Hazirit është edhe përkrahja e idesë së Thaçit për shkëmbimin e territoreve.
“Mustafa, Veliu, Hyseni dhe Luta ende i pa larguar, shumë i kanë dëmtuar proceset e reformimit të partisë dhe të Kosovës, duke u bërë pa fije turpi, argat i huaj. E bëra pikërisht këtë hyrje, për shkak se argatin Hashim Thaçit që ishte pro shkëmbimeve territoriale me Serbinë, ia bëri nënkryetari i LDK-së, Lutfi Haziri. Duket se të gjitha këto gabime në koketim me PDK-në, bën që Luta të dënohet nga elektorati dhe mos të jetë në krye të Gjilanit, edhe për një mandat”, theksoi ai.
Në vazhdim, analisti kërkoi nga Haziri që t’ia lëshojë ‘rrugën’ forcave të reja politike brenda LDK-së, pasi mjaft e ka shfrytëzuar partinë për interesa personale.
“Moti Haziri ka qenë pro ndarjes së Kosovës mbi bazat etnike, apo për shkëmbime territoriale duke i dhënë pjesët më vitale të Kosovës, por do katunde të Kosovës Lindore, që edhe ato nuk do t’i jepte Serbia, pos që do të mashtronte. Dihet se historikisht ky shtet i ka zgjeruar territoret e veta me tokat shqiptare. Mirë do të ishte nga ana e Lutës t’ua lëshon rrugën forcave përparimtare brenda LDK-së, se mjaftë gjatë e ka shfrytëzuar LDK-në dhe shtetin e ri të Kosovës për interesa personale”, nënvizoi Mulliqi.
Tutje, ai tha se Lutfi Haziri duhet të pensionohet nga politika dhe t’i bashkëngjitet gardës së vjetër.
Madje, ai tha se dorëheqja nga ana e Hazirit do të ishte një gjest moral.
“Luta i Gjilanit, duhet t’i bashkohet gardës së vjetër të pensionuar. LDK-ja duhet t’i zbatojë reformat deri në fund, nëse dëshiron që të kthehet si parti e parë në Kosovë. Këto zgjedhje lokale, LDK-ja i ka fituar, pasi që e ka fituar Prishtinën. Nga ana e autokratit dhe përfituesit Lutfi Haziri, është shumë morale nga ana e tij të jap dorëheqje nga të gjitha strukturat e partisë. Deklaratat e Lutfi Hazirit për shkëmbime territoriale, i kanë kryer shërbime të mira mediave dhe politikës shoviniste të Serbisë, që mos ta pranojnë pavarësinë e Kosovës”, tha ndër të tjera analisti.
Në fund, Mulliqi tha se nuk duhet harruar se deklarimet e Lutfi Hazirit për shkëmbimin e territoreve i kanë shkaktuar dëme Kosovës, pasi kufijtë nuk duhet të vihen në peshore nga askush.
“Deklarimet e Hazirit natyrisht se shkojnë në dëm të Kosovës, për faktin se Kosova e fitoi pavarësinë dhe lirinë në kufijtë e saj ekzistues, duke u pranuar nga shtetet më demokratike të botës. Luta sikur ka harruar se pavarësia në kufijtë ekzistues është projekt edhe ndërkombëtar, që nuk bënë të vihet në peshore nga askush”, përfundoi Skënder Mulliqi për “Bota sot”.
Mehmeti: Lutfi Haziri si njeri i afërt me PDK-në e meritoi humbjen
Kurse, analisti tjetër politik, Faton Mehmeti thotë se me plotë meritë Lutfi Haziri i ka humbur zgjedhjet në Gjilan. Ai kërkoi nga Haziri që ai t’i bashkëngjitet në pensionim Veliut dhe Mustafës.
“Karvanit të Agim Veliut dhe Isa Mustafës iu bashkëngjit edhe Lutfi Haziri, në karvanin e pensionimit nga politika. Luta, i njohur ndryshe edhe si njëri i afërt me PDK-në me plotë meritë ka humbur, meqenëse nuk ka bërë diçka që ia vlen për tu mbajtur mend”, vlerësoi Mehmeti.
Në vazhdim, analisti kërkoi nga LDK-ja që të mos avancojë Hazirin në organet vendimmarrëse, pasi do të jetë mesazh i keq për qytetarët.
“Besoj, se kryetari i LDK-së duhet të jetë i vëmendshëm ndaj atyre që kanë humbur dhe atyre që kanë fituar. Nëse LDK-ja vazhdon ta avantazhoj Lutën në krye të saj, në organet vendimmarrëse do të jetë mesazh i keq për qytetarët, dhe krejt e kundërta. Kështu që, mund të them se karriera e Lutës ka përfunduar më 14 nëntor 2021”, deklaroi ai.
Ndër të tjera, Mehmeti tha se ka ende persona të tjerë, të cilët duhet të largohen nga LDK-ja, por fundi i tyre të mos jetë si i Hazirit, Veliut dhe Mustafës.
“Ka edhe disa të tjerë që meritojnë të jenë në këtë karavan, me Lutën që e ka shtyrë tepër shumë. Edhe në politikë ka një fund, por me rëndësi që ky fund të jetë i lavdishëm, jo i turpshëm si i Lutës, Agim Veliut dhe Isa Mustafës”, përfundon Faton Mehmeti për “Bota sot”.
