Kryeministrit Kurti është shprehur se mund të ketë një marrëveshje gjithëpërfshirëse me Serbinë brenda mandatit të tij.
Ai tha që normalizimi i raporteve midis Kosovës dhe Serbisë është i tillë që varet shumë më tepër nga gatishmëria e Serbisë për të ndryshuar qasjen dhe veten e saj.
“Unë nuk mund të parashikoj se kur do të ndodhë, por nëse kemi parasysh që mandati i presidentit amerikan, (Joe) Biden, mandati i zëvendëskryetarit të Komisionit Evropian, Borrell dhe mandati im përafërsisht do ta kenë të njëjtën kohëzgjatje, është e pritshme që në kuadër të këtyre mandateve, që në kohë janë pak a shumë të njëjta, ta përmbyllim marrëveshjen gjithëpërfshirëse me Serbinë. Pra, te ne ekziston vullneti dhe interesimi, varet a ekziston gatishmëria te Serbia”, është shprehur kryeministri Kurti.
Menjëherë pas kësaj deklarate reagimet qenë të mëdha, e në lidhje me këtë deklaratë në një prononcim për “Bota sot”, ka folur analisti politik, Faton Mehmeti.
Ai u shpreh që kryeministri Kurti ka të drejtë të deklaroj kështu mirëpo Serbia është ajo e cila po vonon një marrëveshje finale dhe derisa në pushtet është Vuçiq do të vazhdoj të ketë vonesa.
“I takon kryeministrit Kurti të thotë një gjë të tillë pavarësisht se një gjë e tillë vështirë të arrihet, besoj këtë gjë e ka parasysh z.Kurti. Marrëveshja do ishte arritur qysh moti nëse do varet nga Kosova, është Serbia ajo që gjithnjë bën një hapë para e tre pas. Me Vuçiqin në pushtet, jam shumë skeptik se do të arrihet një marrëveshje me Serbinë”, u shpreh analisti.
Ai thotë se Vuçiq me qëllim po shmangë arritjen e një marrëveshje finale dhe sipas tij ky proces do të zvarritet edhe për shumë takime.
“Vuçiqi po shmangë me qëllim arritjen e një marrëveshje përfundimtare me Kosovën, e di se kjo nënkupton njohjen e Kosovës nga Serbia për të cilën ai nuk ka guxim ta bëjë. Procesi do të zvarritet, do ketë takime, marrëveshje që pjesërisht do zbatohen, mirëpo e shoh të largët arritjen e një marrëveshje përfundimtare me njohjen brenda saj”, përfundoi Faton Mehmeti për “Bota sot”.
