Lidhja Demokratike e Kosovës, sot shënon 32 vjetorin e themelimit. Ishte koha kur Ballkani i ngulfatur nga kthetrat e komunizmit filloi të kërkonte frymën demokratike. Frymën demokratike e kërkonte edhe Kosova, e cila po përballej me dhunë, represion dhe shkelje të të drejtave nga regjimi serb.
Situatat e tilla, nxjerrin në pah edhe njerëzit mendjendritur, me ide dhe vizione të qarta.
I tillë ishte edhe presidenti historik dr. Ibrahim Rugova që më 23 dhjetor të vitit 1989 do të themelonte Lidhjen Demokratike të Kosovës. LDK ishte partia e parë demokratike në Ballkan.
Dr. Ibrahim Rugova së bashku me një numër të madh intelektualësh shqiptarë, krijuan Lidhjen Demokratike të Kosovës, e cila ishte edhe e para e rajonit që proklamonte aspiratën për liri dhe pavarësi.
Në këtë përvjetor, gazeta “Bota sot”, lidhur me ecurinë e LDK-së ka marrë mendime nga ata që këtë parti e njohin për së afërmi.
Lidhja Demokratike e Kosovës, sot shënon 32 vjetorin e themelimit. Ishte koha kur Ballkani i ngulfatur nga kthetrat e komunizmit filloi të kërkonte frymën demokratike.
Frymën demokratike e kërkonte edhe Kosova, e cila po përballej me dhunë, represion dhe shkelje të të drejtave nga regjimi serb. Situatat e tilla, nxjerrin në pah edhe njerëzit mendjendritur, me ide dhe vizione të qarta.
I tillë ishte edhe presidenti historik dr. Ibrahim Rugova që më 23 dhjetor të vitit 1989 do të themelonte Lidhjen Demokratike të Kosovës.
LDK ishte partia e parë demokratike në Ballkan.
Dr. Ibrahim Rugova së bashku me një numër të madh intelektualësh shqiptarë, krijuan Lidhjen Demokratike të Kosovës, e cila ishte edhe e para e rajonit që proklamonte aspiratën për liri dhe pavarësi.
Në këtë përvjetor, gazeta “Bota sot”, lidhur me ecurinë e LDK-së ka marrë mendime nga ata që këtë parti e njohin për së afërmi.
Bajraj: LDK, ngjizje e idealeve për liri dhe identitetit nacional të Kosovës!
Fatmir Bajraj
Për veprimtarin Fatmir Bajraj, LDK është ngjizje e idealeve për liri dhe identitetit nacional të Kosovës!
“Në një kontekst historik, pikërisht me 23 dhjetor 1989, lindi LDK si sinergji e ndërgjegjes kolektive nacionale ; gjakim i trurit të kombit në njërën anë, dhe ndjenjës për sakrificë sublime në anën tjetër, për t'a bërë realitet aspiratën shekullore të Dardanisë Antike-Kosovës. 32 vjet ne shërbim të kauzës nacionale të Dardanisë Antike-Kosovës”, thotë Bajraj për “Bota sot”.
Sipas tij, ditëlindja e 32-të e LDK-së është njëkohësisht edhe përvjetori i 32-të i inaugurimit të shpresës nacionale për Liri e Pavarësi të Dardanisë Antike-Kosovës.
“LDK-ja, aset dhe krenari kombëtare, lëvizje nacionale me mision historik, uragan që nuk ndalet në këtë mision deri sa të flitet shqip në këto troje dhe mbi këtë tokë, përkundër sfidave dhe fortunave jetësore, ajo shtynë tutje-para kauzën kombëtare.
LDK, lëvizje nacionale e cila bëri historinë dhe hyri aty si aset nacional unik i gjithë historisë kombëtare.
Rugova, njeriu-prijës, që materializoi në vepër, idealet nacionale të Dardanisë Antike Kosovës.
Dr. Rugova "Një Kosovë e lirë dhe e pavarur, e integruar në BE dhe n'struktuarat euro-atlantike (NATO), si dhe në miqësi të 'përhershme me SHBA-të"!”, thekson Bajraj.
Momenti më bazik e fundamantal në themelet e ndryshimit epokal të fateve tona
Bajraj foli edhe për “Profecinë” e prekshme: Kosova e lirë dhe e pavarur!
“Ajo që sot ka kuptimin e lirisë, ajo që sot ka emrin e pavarësisë, ajo që sot, synim ka demokracinë në Republikën e Kosovës; ka një emër, ka një ditë & datë ( e shtunë 23 dhjetor 1989), ka një histori të shkruar në vepër nga një brez, nga një elitë e një ndërgjegjeje të ndrydhur nacionale ë 'Dardaninë Antike-Kosovë nga robëruesi shekullor serbo-sllav, dhe kjo është : LDK!
Ajo ditë dhe datë e 23 dhjetorit 1989, është momenti më bazik e fundamantal në themelet e ndryshimit epokal të fateve tona, si komb & atdhe, është dita dhe data e ndarjes së epokave historike, e lindjes së resë mbi gërmadhat e së vjetrës, e ndërgjegjësimit të artikuluar nacional në një manifest vizionar ; idealesh dhe aspirate kombëtare për liri e të drejta”, shprehet ai.
Bajraj potencon se ajo ditë dhe datë, mban vulën edhe të përmbysjes së sistemit monist dhe ideologjisë sllavo komuniste në Kosovë, përmes së cilës populli shqiptar Kosovës, u sundua dhe robërua në mënyrën më të egër dhe barbare për gjysmë shekulli nën Jugosllavi.
“Konteksti historik, prodhoi brezin i cili përmes LDK-së, artikuloi qartë dhe guximshëm kërkesat si imanencë e këtij konteksti historik, dhe nxori në ballë të asaj lëvizje nacionale (LDK), emëruesin e imanencës, elitës dhe idalit nacional, liderin e pakontestueshëm historik, prijësin e palëkundur të asaj lëvizje nacionale, Kryetarin e parë të LDK-së, vizionarin dhe arkitektin e pavarësisë së Kosovës, Dr. Ibrahim Rugova”, shton ai.
“I falemi me respekt e nderim, brezit të rimëkëmbjes nacionale”
Bajraj thekson se filozofia largpamëse politike, orientimi perëndimor dhe stoicizmi konsekuent në arritjen e objektivave nacionale për një Kosovë të lirë e sovrane, bënë për vete edhe miqtë euro-perëndimor në krye me SHBA-të.
“Sot dhe gjithmonë, i falemi me respekt e nderim, brezit të rimëkëmbjes nacionale, rilindjes kombëtare, nismëtarëve të lëvizjes nacionale për Liri & Pavarësi, themeluesve të LDK-së, në përbërje të së cilës ishin eminenca e kohës nga bota akademike & shkencore; akademikët : Dervish Rozhaja, Idriz Ajeti, Fehmi Agani, Mark Krasniqi, pa dalluar gjithë firmëtaret-nismetarë tjerë të projektit nacional-shtetëror të Republikës së Kosovës, dhe në’veçanti, Presidentin Historik, Dr. Ibrahim Rugova.
- Sot nga nismetarët dhe themeluesit e LDK-së, shumë prej syrësh janë ndarë nga jeta dhe ikën në përjetësi duke u ngjitur në panteonin e burrave të lartësuar për komb & atdhe, përfshi edhe Presidentin Historik Rugova, ca prej tyre i ndau jeta nga LDK-ja dhe vet projekti nacional, por neve u detyrohemi shumë për meritën dhe kontributin e çmuar në dobi të kombit & atdheut, ngase pa kontributin e paçmueshëm të tyre, sot nuk do ishim këtu ku jemi, padyshim!”, thekson ai.
Bajraj shprehet se 23 dhjetori si datë dhe 32 vjetori si përvjetor, në kontekstin aktual, është sfidë dhe test për brezin tonë
“Ikja dhe shmangia eventuale e akëcilit nga ky eveniment nacional-historik i klasës së sotme politike, dëshmon vetëm injorancën dhe shpirt-ngushtësinë partiake si mendësi e mykur dhe e mbarsur me paragjykime kompleksive; mendësi e cila duke mos respektuar të kaluarën, dëmton rëndë përespektivën e brezave dhe të vendit. Ata që nuk nderojnë sot meritoret, nuk do jenë të nderuar nesër, ngase : "Çfarë mbjellë, korr", thotë një maksimë e jona”, përfundon Bajraj.
“LDK erdhi si Lëvizja më e fuqishme bashkëkohore”
Gani Qarri
Kurse, për publicistin Gani Qarri, përvjetori jubilar i 32-vjetorit të themelimit të Lidhjes Demokratike të Kosovës, vijon të na vije si ringjallje dhe fllad i lehtë nga kujtimet më të mira dhe shpresëdhënëse, për daljen nga në vitet dhe zhvillimet më të vështira për të gjithë shqiptarët dhe trojet e tona etnike, nën pushtimin serbosllav .
“LDK erdhi si Lëvizja më e fuqishme bashkëkohore e kohëve kur sapo kishin filluar të frynin erërat e para të ndryshimeve demokratike gjithandej perandorisë së sistemit komunist. Dhe pak para shpërthimit të luftërave të reja në rajon, me 23 dhjetor të vitit 1989, pas rrëzimit të murit të Berlinit në Gjermani, edhe në Kosovën e asaj kohe, po shënohej historia e lëvizjeve të para unike dhe rrafshimi i ndasive ndër shqiptare, me formimin e LDK-së, në krye me presidentin historik Dr. Ibrahim Rugova. LDK, lindi si partia e parë demokratike mbarëshqiptare në ish Jugosllavi, e cila në programin e saj politik, kishte prioritet, bashkimin e shqiptarëve dhe pavarësinë e Kosovës”, potencon Qarri.
Sipas Qarrit, LDK nuk erdhi si një subjekt i thjeshtë politik por si Lëvizje mbarëkombëtare e cila u shndërrua në levën më të fuqishme të pluralizmit jo vetëm në Kosovë por në gjithë Evropën e atëhershme Juglindore.
“Erdhi dhe promovua si nismëtare e proceseve më të rëndësishme politike, ndër dekada, e cila doli me një zë të përbashkët, për të gjithë shqiptarët nën pushtimin sllav. Në këtë mënyrë, LDK u shndërrua në ideatorë të sakrificës dhe përkushtimit shtetëror e kombëtar, si dhe frymëzuesen më të madhe për mobilizimin e të gjithë shqiptarëve në atdhe e diasporën kudo, në përpjekjet për ti bërë edhe shqiptarët pjesë aktive dhe të barabartë të qytetërimit dhe botës së lirë demokratike evropiano-perëndimore”, shton ai.
LDK u bë bartësja më e përkushtuar e idesë së pavarësisë së Kosovës
Prandaj, ai thekson se LDK me Dr. Rugovën në krye, që nga themelimi i saj, u bë bartësja më e përkushtuar e idesë së pavarësisë së Kosovës, unifikimit shpirtëror e kombëtar të shqiptarëve dhe integrimit të tyre në shtëpinë e familjes së madhe të Evropës së lirë e demokratike, të cilës ne si popull dhe origjinë edhe i takojmë.
“LDK, ishte ajo që nisi dhe realizoi projektet më të mëdha, jo vetëm të identitetit politik, por edhe ato të subjektivitetit shtetërorë e kombëtar të shqiptarëve nën ish Jugosllavi, duke filluar me Deklaratën e 2 korrikut të vitit 1990, që ishte edhe gurthemel i shtetësisë së Kosovës. Po ashtu, LDK me Dr. Rugovën në krye, ishte ideatore, nismëtare dhe organizatore edhe e Kushtetutës së 7 shtatori të vitit 1990 kur në tubimin e Kuvendit të mbajtur në Kaçanik u shpall Republika e Kosovës.
LDK ishte iniciues dhe organizatore edhe e Referendumit të 30 shtatorit të vitit 1991, kur me një pjesëmarrje masive prej 89.87 përqind të qytetarëve në referendum, rreth 90 përqind e tyre votuan për Kosovën shtet të pavarur e sovran dhe për herë të parë u shpreh dhe u vërtetua në formë plebishitare vullneti politik i popullit shqiptar, për liri e mëvetësi dhe pavarësi shtetërore të Republikës së Kosovës”, kujton ai.
Kjo sipas Qarrit ishte edhe arsyeja madhështore, e cila bëri që LDK e udhëhequr nga Dr. Ibrahim Rugova, të shndërrohej në Lëvizje Mbarëkombëtare, kurse programi politik i tij, të përqafohej nga të gjithë shqiptarët dhe të kthehej në program të veprimit mbarëkombëtar për të gjithë shqiptarët nën ish Jugosllavinë komuniste.
“Nën drejtimin e Dr. Ibrahim Rugovës, edhe pse ende nën pushtim, për herë të parë, nga LDK u krijua sistemi i mëvetësimit shtetëror e institucional, ai i arsimit, shëndetësisë, mbështetjes sociale dhe financimit të pavarur të Republikës së Kosovës. Fal LDK-së, u arrit organizimi më i mirë i mundshëm i shqiptarëve në vend dhe atyre në diasporën kudo, brenda një projekti nga më të mëdhenjtë kombëtar, që ka njohur historia e veprimit tonë politik, që nga vendet e Evropës Perëndimore deri në SHBA dhe vendet më të largëta anë e këndë globit, ideale për të cilat shumë aktivist të devotshëm të kësaj partie kanë dhënë edhe jetën”, thekson ai.
Histori kombëtare e shtet ndërtimit
Qarri ka kujtuar se vullneti, dëshira, organizimi i papërsëritshëm e i pashembullt i LDK-së së udhëhequr nga Dr. Rugova bindën Fuqitë më të mëdha që nga SHBA e Mbretëria e Bashkuar, deri te Gjermania dhe vendet më demokratike të botës se Kosova dhe populli i saj, vërtetë meritojnë lirinë, çlirimin e pavarësinë dhe trajtimin e barabartë me të gjithë popujt tjerë.
“Ndaj përpjekjeve paqësore të Dr.Ibrahim Rugovës iu bashkua edhe lufta për liri e popullit të Kosovës, si dhe ndihma e NATO-së me në krye SHBA-të, për çlirimin dhe kurorëzimin me sukses të pavarësisë tonë, të cilën fatkeqësisht, një pjesë e komandantëve nuk e kuptuan si mundësi për të udhëhequr me nderë e devotshmëri vendin e vet, por si rast për tu ngritur në pozita, dhe vjedhur e plaçkitur çdo gjë të tij, deri te pazaret me tokat tona”, shprehet Qarri.
Sipas tij, LDK e Ibrahim Rugovës, e cila me ndryshmin e kryetarëve të sjellë në mënyrë konspirative në krye të saj, ka vite që ka humbur jo vetëm rolin figurativ e veprues, por edhe fuqinë dhe kuptimin jetik, që kishte dikur për vendin dhe të gjithë shqiptarët.
”LDK e Dr. Ibrahim Rugovës, ishte histori kombëtare e shtet ndërtimit, Lëvizje Mbarëshqiptare, segment nga më të fuqishmit politik dhe frymë unifikimi për të gjithë shqiptarët, e cila në idealet, organizimin dhe përmasat që lindi e u kurorëzua, nën udhëheqjen e presidentit historik Dr. Ibrahim Rugova, vështirë se mund të ekzistojë dhe përsëritet më, për mote dhe periudha të shkurta kohore, duke mbetur më tepër si relikt, i një legjende të madhe udhëheqëse dikur dhe sot, kujtim i përjetshëm i ditëve të mira shtet ndërtuese të saj”, përfundoi ai.
