Omicron në Kosovë/Cili është rreziku i përhapjes dhe a duhet të shtrëngohen masat?

Prej kohësh është përhapur një variant i ri i Covid 19, nëpër shumë shtete të botës, të cilat kanë kufizuar masat për mbrojtjen nga ai. Përhapja e tij, po vlerësohet se është dukshëm më e shpejtë se sa e të gjitha varianteve të deritashme. Sipas studiuesve rritja e përhapjes së tij është eksponenciale, ndërsa shpresa janë vaksina dhe preventivat tjera.

Bëhet fjalë për variantin e virusit Omicron, i cili për herë të parë u shfaq në Afrikë.

E të dielën u konfirmuan nëntë raste me këtë variant në Kosovë.

Instituti Kombëtar i Shëndetësisë Publike i Kosovës njoftoi se në laboratorin e Mikrobiologjisë molekulare, Departamenti i Mikrobiologjisë të IKShPK-së, ishin testuar 22 mostra pozitive me SARS-CoV-2, të periudhës kohore 15-25 dhjetor 2021, prej të cilave nëntë dolën se janë me Omicron.

Sipas Ministrisë së Shëndetësisë, “2 raste janë të importuara nga SHBA-të, 2 raste janë të importuara nga Londra, Mbretëria e Bashkuar, 1 rast është i importuar nga Franca; dhe 4 raste me variantin Omicron të detektuar janë në komunën e Mitrovicës, të cilët mohojnë historinë e udhëtimit dhe se kanë pasur kontakte me dikë nga jashtë”.

Simptomat dhe rreziqet

Drejtori i Klinikës Infektive në QKUK, Arben Vishaj.

Lidhur me këto raste ka folur të martën edhe drejtori i Klinikës Infektive në QKUK, Arben Vishaj.

Ai ka thënë se një nga qytetarët e infektuar, i cili kishte ardhur nga SHBA-të, me variantin Omicron, ka kërkuar trajtim mjekësor në këtë klinikë dhe se ai ka qenë i vaksinuar me të dy dozat e vaksinës Pfizer.

“Më datën 20 të këtij muaji janë diagnostikuar nëntë pacientë me Omicron. Në Klinikën Infektive ka qenë një pacient, i cili ka kërkuar trajtim dhe kolegët nga ambulanca e pranimit e kanë marrë mostrën dhe gjendja e tij ka qenë stabile dhe për këtë arsye pacienti është lëshuar në shtëpi. Ne aktualisht nuk kemi pacientë të hospitalizuar me... variantin Omicron. Dhe, jemi duke i trajtuar katër pacientë, të cilët janë pozitiv me COVID-19. Aspektet klinike kanë qenë të një aspekti me një formë të lehtë të COVID-19. Ky pacient, tri ditë më përpara ka ardhur nga ShBA-ja, ku edhe punon. Gjendja e tij e përgjithshme ka qenë një simptomatologji e prekjes të rrugëve të frymëmarrjes. Është marrë testi për COVID, të cilin e marrim në mënyrë rutinore, ka rezultuar pas testimit nga Instituti Kombëtar se është pozitiv me Omicron. Përndryshe, sot kemi komunikuar me të, gjendja e tij është stabile... Ka qenë i vaksinuar në ShBA, me dy doza Pfizer. Por, ka manifestuar një formë klinike të lehtë”, ka thënë ai.

Kur foli për ardhjen e mërgimtarëve ai tha se janë të gatshëm që të ofrojnë shërbime dhe se kanë kapacitet për të menaxhuar çdo situatë.

Ramadani: Të përcillet situata me Omicron në dy javët e ardhshme

Infektologu Hamdi Ramadani

Infektologu Hamdi Ramadani, duke folur për gazetën “Bota sot” për rastet me Omicron në Kosovë, ka thënë se ka qenë e pritshme që të kemi të infektuar, derisa thotë se nuk duhet bërë panik.

“Çdo gjë ka qenë e pritshme pasi në shumë vende të botës edhe në rajon kanë pasur variantin Omicron tash e sa kohë. Mendoj se situata epidemiologjike në vend me ardhjen e Omicron sigurisht që do të jetë më e rënduar pasi përhapet shpejt, është shumë ngjitës dhe ka një rritje eksponenciale në përgjithësi në nivel botëror dhe mundësia e përhapjes dhe e rëndimit të gjendjes me Omicronin është e mundur, mirëpo bazuar në të dhënat klinike deri tash për rastet me Omicron, ai nuk ka paraqitur situatë shumë serioze ta quajmë, të rrezikshme, janë paraqitur simptoma të lehta ose simptomatike dhe po shpresojmë që edhe në vendin tonë të ndodhë diçka e tillë, që të kemi forma asimptomatike apo forma të lehta”, është shprehur ai.

Se sa mund të ndikojë ardhja e mërgimtarëve nga vendet me Omicron në përhapjen në Kosovë të këtij varianti, ai ka thënë se mund të ndodhë, por që duhet të respektohen masat e vendosura.

“Mundësi ka që të kemi përhapje më të madhe nga personat që vijnë nga vende që Omicron është i pranishëm dhe mund të shkaktojë situatë më të rënduar epidemiologjike në vendin tonë dhe kjo është e pritshme, por ajo çka është me rëndësi është që të zbatohen masat anti-Covid të vendosura në nëntor, të respektohen në maksimum me përpikëri, pra maska të bartet në vende të mbyllura, pastaj higjiena personale dhe vaksina me dozën përforcuese, të cilat do ta bëjnë të mundur parandalimin e tij”, ka vlerësuar Ramadani.

Derisa tani kemi rastet e para me Omicron, infektologu ka thënë se në dy javët e ardhshme duhet të përcillet situata dhe nëse situata përkeqësohet, atëherë duhet të shtrëngohen edhe masat.

“Tash për tash, situata nuk është e rëndë, kemi 9 raste dhe duhet të përcillet në këto 2 javët e ardhshme se si do të jetë dinamika me virusin Omicron. Në qoftë se shihet se situata është më e përkeqësuar ose po përshkallëzohet, sigurisht se duhet të shkohet edhe me masa më rigoroze, më kufizuese, në ato vende ku shfaqen, qoftë në ato komuna që shfaqen por tash për tash duhet të respektohen masat që janë të vendosura dhe në qoftë se respektohen me përpikëri dhe qytetarët vaksinohen, atëherë do ta kalojmë këtë situatë me më pak të infektuar me variantin Omicron dhe të hospitalizuar. Por megjithatë mbetet që në dy javët e ardhshme se si do të dilet Omicroni në vendet tonë”, ka deklaruar për “Bota sot” infektologu Hamdi Ramadani.