Zyrtarët e lartë të Serbisë, duke përmendur këtu edhe presidentin e Serbisë, Aleksandër Vuçiq, e ka kërcënuar dhe shantazhuar Kosovën me luftë.
Pjesa e dytë e vitit që e lamë pas ka qenë më e tensionuar se sa ajo e para. Kjo pasi që Serbia ka vazhduar me provokimet ndaj Kosovës.
Në shtatorë të vitit të kaluar, Qeveria e Kosovës e udhëhequr nga Albin Kurti, vendosi masat e reciprocitetit për makinat me targa të Serbisë. Ky vendim e përshkallëzoi situatën në veri të vendit, dhe në shenjë pakënaqësie serbët e manipuluar nga Beogradi dhe grupet kriminale serbe ndërkombëtare, të cilët protestuan vendosën edhe bllokada në rrugë.
Pas këtij vendimi, Serbia i bëri gati forcat ushtarake, gjithashtu mediat serbe raportuan se ato ishin vendosur afër kufirit me Kosovën, ndërsa dy aeroplanë të saj të prodhimit rus Mig 29, e shkelën hapësirën ajrore të Kosovës.
Pas kësaj u angazhua KFOR-i për sigurinë në këtë pjesë të Kosovës.
Ndërkaq, në muajin tetor të 2021-tës, Policia e Kosovës zhvilloi një aksion të madh kundër kontrabandës dhe krimit në disa komuna të Kosovës, duke përfshirë edhe ato në veriun e vendit.
Po ashtu, edhe për këtë aksion të policisë së Kosovës pati protesta. Në këto protesta pati edhe përplasje ndërmjet protestuesve dhe policisë, ku 10 policë dhe një pjesëtar i komunitetit serb mbetën të plagosur.
Gjatë këtij aksioni, janë sekuestruar edhe mallra në vlerë prej qindra mijëra euro, si dhe dëshmi të ndryshme të kontrabanduara për prova materiale, të cilat kanë qenë të vendosura në lokacione të ndryshme, lokale afariste, etj.
Por, Serbia ka vazhduar të projektojë rritjen e fuqisë ushtarake, duke e çuar drejt dyfishimit të saj, dhe të një fuqie që do të jetë dominonte ndaj ushtrive të marra së bashku, të Shqipërisë, Kosovës, Kroacisë e Maqedonisë.
Tërnava: Serbia do t`i vazhdojë veprimet e njëjta edhe në 2022-tën
Lidhur me këto ndodhi ka folur ish-zëvendësministri në Ministrinë e Punëve të Brendshme dhe njohësi i çështjeve të sigurisë, Hajrullah Tërnava.
Hajrullah Tërnava
“Sikur Kosova t`i qeveriste këto territore në veri, si pjesë të saj me plotë kuptimin e fjalës, sikur që i qeverisë edhe komunat e tjera të Kosovës, atëherë sot nuk do të kishim pasur nevojë të flasim për këtë temë. Sepse aty ku ushtrohen kompetencat ligjore të përditshme në tërë territorin e Kosovës, ligjshmëria funksionon pa u vërejt fare, dhe opinioni i tërë i pranon ato jetësime të ligjeve apo intervenime policore në baza të shëndosha. Me vetë faktin sikur e shpjegova e kur e përmendim që gjatë këtij viti ka pasur aksion nga Policia e Kosovës në veri të Kosovës, i bie sikur ato pjesë nuk i takojnë Kosovës, apo që ato pjesë nuk janë në kompetencë ligjore të Policisë së Kosovës, dhe vetë fakti po e dëshmon këtë çfarë e shpjegova deri më tani”, ka shpjeguar ai.
Gjithashtu, Tërnava ka folur edhe për sjelljen e Serbisë karshi Kosovës, që nga paslufta.
“Sjelljet e shtetit fqinj të Serbisë ndaj shtetit të Kosovës qysh nga çlirimi e deri më tani kanë qenë jo korrekte dhe jo të ligjshme dhe nonstop kanë krijuar konflikte kufitare, prandaj edhe nuk është për t`u habitur që në ato pjesë të veriut është rritur veprimtaria kriminale në mënyrë të dukshme, sepse atje ku nuk funksionojnë ligjet, mbretëron krimi, është një arsyetim që e pranon edhe shkenca e kriminalistikes”, ka thënë ai për “Bota sot”.
Më tej, Tërnava ka treguar se cili është qëllimi i Serbisë në pjesët veriore të Kosovës.
“Qëllimi i shtetit të Serbisë është që opinionin ndërkombëtar ta bindë me situatat të tilla në ato pjesë të veriut, duke e bindur opinionin se në ato pjesë nuk kanë fare qasje ligjet e Kosovës, prandaj nisur nga kjo këto pjesë duhet t`i takojnë Serbisë, që gjatë negociatave dhe bisedave mes dy shteteve që do të ndodhin për zgjidhjen e çështjes dhe njohjeve reciproke mes veti”, ka nënvizuar ai.
Po ashtu, Tërnava ka përmendur edhe shantazhimet dhe veprimet e Serbisë, duke sjellë afër kufirit të Kosovës mjete ushtarake gjatë kohës kur Policia e Kosovës po “luftonte” krimin në veri të vendit.
“Gjatë këtij viti zyrtarë të lartë të Serbisë, kanë kërcënuar e shantazhuar Kosovën duke i sjellë afër kufirit mjete ushtarake, e sidomos në kohëra kur policia e Kosovës intervenonte për jetësimin e ligjeve të Kosovës, e sidomos kur duhej që individ të ndryshëm të burgosen si kriminel për veprat që i kanë kryer në ato pjesë sikur që ishin tregti të jashtëligjshme, si kontrabandat etj”, thotë ai.
Ndërkaq, Tërnava ka paralajmëruar se edhe gjatë këtij viti, do të vazhdojnë provokimet e Serbisë ndaj Kosovës.
“Në bazë të sjelljeve të deritanishme Serbia prapë do të insistoj të përzihet në ato pjesë të territorit të Kosovës që janë të banuara kryesisht me popullatë serbe, prandaj pritet të vazhdojë me këto veprime edhe në 2022, e deri në pajtimin e plotë që po e ndërmjetësojnë edhe ndërkombëtarët. Në këtë situatë të tanishme sikur që është Kosova, deri në pajtimin e plotë të tyre, gjithsesi se do të jetë e rrezikuar nga Serbia”, ka cekur ai.
Në fund, Tërnava ka treguar se çfarë duhet të shfrytëzojë Policia e Kosovës që të arrijë t`i shpërbëjë grupet kriminale në veri të vendit.
“Por tani, situata po ndryshon sepse me kërkesën nga SHBA-të që të burgosen kriminelet ordinar me emra e mbiemra, që gjinden në Listën e zezë, tani besohet se policia e Kosovës do t`ia arrijë të shpërbejë grupin kriminal ndërkombëtar serb me bazë në veri, por policia e Kosovës duhet ta shfrytëzojë këtë situatë, dhe të jetë më e pranishme në ato pjesë të Kosovës, dhe t`i ushtroj ditë e përditë kompetencat e saj ligjore, si pjesë të Kosovës që janë, dhe qytetarët të mësohen me njerëzit që i kontribuojnë të mirave dhe jetësimeve të ligjeve në ato pjesë. E mira e të mirës në këtë situatë është se SHBA-të janë mjaftë të interesuara që t`i spastrojnë nga krimet në përgjithësi shtetet e Ballkanit, prandaj pritet nga ata që kjo ndihmë të jetë permanente”, ka përfunduar Tërnava për “Bota sot”.
Mehmeti: Kosova s`do të jetë asnjëherë e qetë nga Serbia
Kurse, analisti politik, Faton Mehmeti, në një prononcim për “Bota sot”, ka treguar se pse Kosova nuk do të jetë asnjëherë e qetë nga Serbia.
Faton Mehmeti
“Kosova s`do të jetë asnjëherë e qetë nga Serbia, e cila e ka kthyer në obsesion kolektiv Kosovën. Vështirë të çlirohet nga ky obsesion, me Kosovën që nuk duhet të jetë inferiore karshi veprimeve të Serbisë”, ka thënë ai.
Po ashtu, ai ka numëruar disa mënyra se si Kosova duhet t`i përgjigjet provokimeve të Serbisë.
“Provokimeve të Serbisë duhet t'i përgjigjemi me blerje të armëve, fuqizim të FSK-së me të gjitha kapacitetet e saja. Kjo nënkupton që Kosova të përgatitet për çdo rast, gjithashtu të fuqizojë diplomacinë për të deklasuar Serbinë dhe idetë e saja nacionaliste për dominim mbi kurrizin e shqiptarëve. Pa harruar këtu vazhdimin e shtrirjes së sovranitetit të saj në tërë territorin, duke luftuar kriminelët kudo që janë ata. Këto duhet të jenë prioritetet e Kosovës gjatë 2022-ës në raport me Serbinë”, ka përfunduar Krasniqi për “Bota sot”.
