Rreth një muaj më parë, Departamenti i Thesarit të Shteteve të Bashkuara të Amerikës, vendosi të fus në listë të zezë disa nga kokat e krimit në pjesën veriore të Kosovës.
SHBA-ja ka vendosur sanksione ndaj grupit kriminal ndërkombëtar serb të Zvonko Veselinoviqit dhe Milan Radojiçiqit me seli në veri të Kosovës, derisa të mërkurën sanksione shtesë i kanë vënë edhe kreut të “Republika Srpskas”, Milorad Dodik, pasi ky i fundit, muajt e fundit ka intensifikuar përpjekjet për shkëputje dhe destabilizim të Bosnje e Hercegovinës.
Njëri nga të lartpërmendurit, Milan Radojiçiq është nënkryetar partisë politike Lista serbe në Kosovë. Ai njihet si person i afërt edhe me disa prej ish-udhëheqësve të shtetit të Kosovës me të cilët kishte raporte miqësore.
Përfaqësuesi Special i Shteteve të Bashkuara të Amerikës për Ballkanin Perëndimor, Gabriel Escobar, në një intervistë për agjencinë e lajmeve “MINA”, ka thënë se Uashingtoni nuk do të hezitojë shfrytëzimin e mekanizmit të sanksioneve për të çuar mesazh të fortë për personat e korruptuar dhe për ata që destabilizojnë rajonin.
Po ashtu, Escobar ka thënë se liderët ne Ballkanin Perëndimor duhet të punojnë për interesin e qytetarëve dhe jo për përfitime personale apo të partive të tyre.
“Ne nuk do të hezitojmë të shfrytëzojmë sanksionet dhe mekanizma të tjerë për të çuar një mesazh të fortë për akterë të korruptuar dhe që destabilizojnë”, ka thënë Escobar.
Se do të ketë emra të njohur nga Kosova, Serbia dhe rajoni që do të përfshihen në listën e zezë të SHBA-së, e ka thënë edhe Daniel Server, profesor në Universitetin John Hopkins në Uashington.
Këto vendime për sanksione po i konsideron si të mirëpritura, Ramazan Bekteshi, publicist dhe veprimtar në SHBA.
Bekteshi: Shenja serioze për një qasje të re ndaj problemeve në Ballkan
Ramazan Bekteshi
Në një prononcim për “Bota sot”, Bekteshi ka thënë se këto janë shenja serioze për një qasje të re të problemeve në Ballkan me theks të veçantë në Kosovë të administratës Biden.
“Vendimin e Departamentit të Thesarit të ShBA-së për të futur në listë e zezë grupin e paprekshëm të krimit të organizuar në veri të Kosovës që dyshohet se në rrjetin e vet ka pasur të përfshirë edhe politikanë nga Prishtina e Beogradi është një veprim shume i mirëpritur. Veprimi inkurajues që vjen nga Uashingtoni krahas edhe dy nominimeve të dy ambasadorëve premtues, Hill dhe Hovenier si dhe Gabriel Eskobarin, të dërguarin i ri amerikan për Ballkanin Perëndimor, janë shenja serioze për një qasje të re të problemeve në Ballkan me theks të veçantë në Kosovë të administratës Biden”, ka potencuar Bekteshi për “Bota sot”.
Ai ka thënë se, tashmë fjalën e ka drejtësia e Kosovës që këtij grupi kriminel t’ia pamundësojë veprimin e mëtutjeshëm, dhe t’ua konfiskoj pasurinë e paligjshme.
“Ky veprim amerikan është aq i nevojshëm për Ballkanin perëndimor për ti delegjitimuar bizneset dhe bosët që deri tani kanë qenë të patrazuar, të paprekshëm, bilës të mbrojtur edhe nga politika në këmbim të ndarjes së profitit dhe paqes së rrejshme”, ka nënvizuar Bekteshi.
Ai ka shtuar se vë vitin 2022 hymë me shpresë se lista e zezë e SHBA-ve do ta shkëpusë zinxhirin e krimit të organizuar në Ballkan, që Rama dhe Vuçiq duan ta zgjerojnë dhe të kenë kontroll ashtu si e kontrollojnë krimin në vendet e tyre respektive.
“Lërja anash e Rames dhe Vuçiqit në listën që po presim të publikohet do të ishte një padrejtësi historike. Pra, individët që e kanë pas të ndaluar hyrjen në Amerikë, si që janë Daçiq, Vuçiq, Nikoliq, për shkak të abuzimit masiv të të drejtave dhe lirive të njeriut. Fatkeqësisht, këtyre tre individëve, bashkëpunëtorë të Millosheviqit ndalesa e tyre është tërheq për shkak të statusit politik”, ka theksuar ai.
“Shpallja e Vuçiqit në këtë listë do t’ia shkurtonte agoninë Ballkanit”
Sipas Ramazan Bekteshit, SHBA-ja krahas rolit ushtarak që luan në Kosovë, ajo me ekipet e saja profesionale në terren përcjell dhe ndjek me vëmendje çdo zhvillim, çdo lëvizje, çdo ndikim që mund ta cenojë sigurinë dhe integritetin e vendit.
“Është SHBA-ja dhe merita e saj që krijoi Policinë e Kosovës ndër më të përgatiturat në rajon, është SHBA-ja që nga dita e parë e stërviti, TMK-në, FSK-në dhe Ushtrinë e ardhme të Kosovës (FAK-un) për mbrojtje të vendit dhe për nevoja paqësore në misione të përbashkëta me NATO-n, është SHBA-ja që përgatit kadetët tanë në akademitë e saja si West Point e gjetkë. Pra, është pikërisht SHBA-ja që e njeh Ballkanin edhe pse është në oborr të Evropës, më mirë se vetë Evropa”, potencoi Bekteshi.
Sipas tij, shpallja e emrave të krimit i hap rrugë demokracisë dhe paqes, sepse këto struktura janë politike, zinxhirore, me lidhje të forta lokale, rajonale dhe ndërkombëtare.
“Pra, shpallja e Vuçiqit në këtë listë do t’ia shkurtonte agoninë Ballkanit, do t’ia pakësonte vuajtjet Serbisë, dhe do të pushonte vetë Evropa nga lajkat dhe flirtet e tij herë me Borrellin, e herë me Putinin e herë me Kinën. Vuçiqi është një kriminel lufte, ai duhet të ikë sepse nuk është njeri i paqes, ai ka ndjell dhe po ndjell luftë. Të gjithë ata politikanë shqiptarë që besojnë se me Vuçiqin mund të bëjnë paqe është një mashtrim dhe një iluzion. Por, meqenëse Vuçiqin e përkrah Rama dhe nuk ka reagime të ashpra në Shqipëri kundër veprimeve antikombëtare të Ramës dhe me një opozitë inekzistente Shqipëria është me djallin”.
Me “djallin”, sipas Bekteshit janë edhe opozita në Kosovë, sepse të gjithë së bashku nuk kritikojnë veprimet e Vuçiqit, por të Kurtit, duke u lutur për dialog pa kushte, duke folur për kompromise të dhimbshme.
“Si për kob, edhe studentët heshtin, e heshtja është një aprovim i kërkesave të Borrellit e Vuçiqit për Zajednicën e kobshme që na e sollën ish politikanët tanë vasalë. E drejta është në anën tonë, edhe Amerika, e ne ende të përçarë”, ka përfunduar ai.
Gashi: Është e sigurt që së shpejti do të ketë edhe emra të tjerë që do të shënjestrohen nga departamenti i SHBA-së
Tomë Gashi
Kurse, avokati Tomë Gashi, në një prononcim për gazetën “Bota sot”, ka rikujtuar futjen në listë të zezë të ish kryeministrit të Shqipërisë Sali Berisha nga Departamenti i Shtetit.
Sipas tij, askush nuk e besonte se Berisha mund të ishte pjesë e kësaj liste.
“Edhe pse është ditur për një mori aferash korruptive të ish-presidentit dhe ish-kryeministrit të Shqipërisë Sali Berisha, para disa muajve nuk ka mund thuajse askush të besonte se departamenti shtetit amerikan do ta shënjestronte dhe ta vinte në listë të zezë bashkë me të gjithë anëtarët e familjes së tij të ngushtë.
Ajo që është më e çuditshme për ta, por që është e ditur, Salo me familje të tij janë në listë të zezë të SHBA-së për korrupsion, për pengim të drejtësisë dhe për keqpërdorim të pushtetit”, ka deklaruar Gashi.
Sipas tij, pas këtij veprimi Departamenti i SHBA-së bëri publike edhe një mori emrash, të cilët i futi në listën e zezë edhe në Kosovë.
Avokati Gashi ka theksuar me siguri se së shpejti do të ketë edhe emra të tjerë që do të përfshihen në listën e zezë të SHBA-së.
“Dhe këta janë të gjithë serbë të veriut të Kosovës të identifikuar si grupe të organizuara kriminale dhe banditë që janë destabilizues të regjionit të përfshirë nga kontrabanda deri tek vrasja e politikanit serb Oliver Ivanoviq. Dhe është e sigurt që së shpejti do të ketë edhe emra të tjerë që do të shënjestrohen nga departamenti i SHBA e që do të futen në liste të zezë të cilëve përveç që do të ju pamundësohet udhëtimi në ShBA, do të kenë edhe restrikcione të tjera specifike”, ka nënvizuar ai.
Pjesë e listës së zezë ish-udhëheqës të lartë shtetëror dhe politik të Kosovës?
E përpos kësaj, Gashi ka thënë se kjo do të jetë edhe indicie për hetime penale vendore, ndaj atyre që do të jenë në këtë listë të zezë SHBA.
“Sigurisht që unë nuk mund të spekuloj me emra që do të gjinden në këtë listë të SHBA-ve. Por ajo që dihet, asnjë zyrtar i qeverisë Kurti nuk do të jetë në këtë listë të zezë. Por, nuk përjashtohet mundësia që fatkeqësisht të kemi në këtë listë të zezë ish-udhëheqës të lartë shtetëror dhe politik të Kosovës”, ka përfunduar ai.
