Javë më parë, Departamenti i Thesarit të Shteteve të Bashkuara të Amerikës i futi në "listën e zezë" Zvonko Veselinoviqin dhe Milan Radoiçiqin.
Arsyeja se pse këtë persona janë shpallur “non grata” është lidhshmëria e tyre me skema të korrupsionit dhe krimit të organizuar në Kosovë.
Por, kërkesat janë që në këtë listë të futet edhe presidenti i Serbisë, Aleksandër Vuçiq.
Njohësi i çështjeve politike, Gani Qarri, në një prononcim për “Bota sot” është shprehur se grupi kriminal i serbëve në Veri i sanksionuar nga SHBA, janë në shërbim të plotë të Vuçiqit.
“Kjo për vet faktin se grupi kriminal i serbëve në Veri i sanksionuar nga SHBA, në krye me Zvonko Veselinoviqin dhe Milan Radoiçiqin, janë në shërbim të plotë të Serbisë së "madhe" dhe dirigjohen drejtpërsëdrejti nga ministri i informatave të Sllobodan Millosheviqit, krimineli Aleksandër Vuçiq”, ka theksuar ai.
Gjithashtu, Qarri i ka numëruar veprimet e Vuçiqit për të cilat thotë, se duhet t`i parandalojë SHBA-ja.
“Vuçiq edhe sot udhëhiqet nga idetë e Millosheviqit për gllabërimin me forcë, të territoreve të huaja, për krijimin e Serbisë së madhe”, duke aneksuar pjesë nga njësitë tjera të ish federatës jugosllave, sidomos nga Bosnja dhe Kosova, e pse jo ta aneksoj edhe gjithë Malin e Zi, për daljen e Serbisë së madhe në Detin Adriatik, gjë që SHBA-të, duhet me çdo mjet, ta parandalojnë”, ka thënë ai.
