Serbët në Bosnje po tentojnë që ta ndajnë këtë shtet. Njeriu kryesor i cili është duke marrë veprime për ndarjen e Bosnjës dhe Hercegovinës është Millorad Dodik, anëtari serb i presidencës së Bosnje-Hercegovinës dhe kreu i partisë kryesore të Republikës Sërpska, Partisë së Social-Demokratëve të Pavarur (SNSD).
Për këto veprime, Shtetet e Bashkuara të Amerikës kanë vendosur sanksione ndaj Dodik-ut.
Po ashtu, sipas departamentit të Thesarit të SHBA-ve, Dodik ka keqpërdorur pozitën e zyrtare.
“Dodiku ka minuar institucionet e Bosnje e Hercegovinës duke bërë thirrje për marrjen e kompetencave shtetërore dhe duke iniciuar krijimin e institucioneve paralele në entitetin e Republikës Sërpska të Bosnje-Hercegovinës. Për më tepër, Dodik ka përdorur pozitën e tij zyrtare që ka në Bosnje për të përfituar pasuri për vete përmes ryshfetit dhe formave të tjera të korrupsionit. Retorika e tij ndarëse ento-nacionaliste reflekton në përpjekjet e tij për të avancuar këto qëllime politike dhe për të shpërqendruar vëmendjen nga aktivitetet e tij korruptive”, thuhet në deklaratën e Departamentit amerikan të Thesarit.
Këto sanksione të SHBA-ve i ka përkrahur edhe Britania e Madhe.
Sekretarja e Jashtme britanike, Elizabeth Truss ka deklaruar se do ta vazhdojnë bashkëpunimin me aleatët për të mbështetur Bosnjë e Hercegovinën.
“Korrupsioni është kërcënim për lirinë, demokracinë dhe paqen në Bosnjë e Hercegovinë. Mbretëria e Bashkuar mirëpret sanksionet e shënjestruara nga Shtetet e Bashkuara të Amerikës sot, të cilat i mbajnë përgjegjësit në llogari. Ne vazhdojmë të punojmë me aleatët për të mbështetur Bosnjë e Hercegovinën dhe kauzën e lirisë në rajon.”
Po ashtu, SHBA-së i ka dalë në krahë edhe Gjermania, ku ministrja e Jashtme gjermane, Annalena Baerbock, ku kishte deklaruar se sanksionet duhet të përdoren kundër Dodik-ut.
Ndërkaq, në Kosovë po kërkohet që të këtë sanksione edhe më të rënda ndaj Dodik-ut, si dhe Serbisë.
Njohësit e çështjeve politike shprehen se këto sanksione nuk janë të mjaftueshme, pasi që rrezikohet edhe stabiliteti i Ballkanit.
Krasniqi: Serbia po mundohet që përmes asociacionit të ndajë Republikën e Kosovës
Islam Krasniqi
Njohësi i çështjeve politike dhe juridike, Islam Krasniqi, në një prononcim për “Bota sot”, ka treguar se ç’po mundohet të bëjë Serbia në Kosovë.
“Sanksionet e SHBA-ve ndaj liderit serb në Republikën e Bosnjes nuk janë të mjaftueshme, sepse pavarësisht sanksioneve, paralajmërimeve shteti i Bosnjës është jo funksional, saktësisht buzë ndarjes, e që politika në Serbi po mundohet që përmes asociacionit të ndajë Republikën e Kosovës, më një mini-autonomi, që edhe Ballkani jo të jetë vatër e destabilizimit”, ka thënë ai.
Më tej, Krasniqi ka thënë se sanksionet do ta gjunjëzonin politikën serbe dhe se Kosova do të ishte më e qetë.
“Çdo sanksion nga SHBA-ja, BE-ja apo edhe siç priten sanksione nga Britania e Madhe, politikën serbe do ta gjunjëzojnë dhe që edhe republika e Kosovës do të jetë më e qetë duke mos pasur në tryezën e ndërkombëtarëve ide të cilat e dëmtojnë sovranitetin e shtetit tonë”, ka theksuar ai.
Po ashtu, ai e ka drejtuar gishtin nga bashkësia ndërkombëtare për veprimet e Dodikut.
“Gabimet e Bashkësisë Ndërkombëtare i kanë dhënë këtë rehati Dodikut, i cili nga pozita e tij në Bosnje po e kërcënon tërë Ballkanin”, ka deklaruar Krasniqi për “Bota sot”
Qarri: Të zgjerohen masat
Gani Qarri
Ndërkaq, analisti politik, Gani Qarri, në një bashkëbisedim për “Bota sot” ka folur për paralajmërimin e SHBA-ve për zgjerimin e sanksioneve.
“Në fakt, Shtetet e Bashkuara të Amerikës, kanë paralajmëruar zgjerimin e sanksioneve të reja, ndaj individëve të korruptuar dhe politikanëve të kriminalizuar në Bosnje, qysh kur Zyra e Kontrollit për Pasuritë e Huaja e Departamentit të Thesarit të SHBA-ve, vendosën sanksione ndaj dhjetëra politikanëve dhe subjekteve të inkriminuara serbe, duke shenjëstruar grupin e krimit të organizuar në krye me Zvonko Veselinoviqin dhe Milan Radoiçiqin në Veri të Kosovës”, ka thënë ai.
Gjithashtu, Qarri duke folur për situatën e krijuar nga Dodik në Bosnje, ka thënë se masat duhet të zgjerohen.
“Kështu që me qëllim të parandalimit të destabilitetit rajonal, të cilin në vijimësi e kërcënon prijësi ekstrem i serbëve të Bosnjës, në kuadër të sanksionimit të udhëheqësve të korruptuar dhe politikanëve të kriminalizuar që tentojnë krijimin e trazirave dhe gjakderdhje të reja, ndëretnike në Ballkanin Perëndimor, SHBA-të vendosën sanksione edhe ndaj Millorad Dodik-ut, liderit të ekzaltuar të serbëve të Bosnjës, i cili inspiruar nga Aleksandër Vuçiqi, ka kohë që paralajmëron eskalimin e situatës dhe ndarjen e Bosnjës, me qëllim të bashkimit të të ashtuquajturës "Republika srpska" me Serbinë hegjemoniste të Vuçiqit.
Prandaj, duke ditur se strumbullari i të gjitha të këqijave në Ballkan dhe rajon, tash e sa kohë, është vet krimineli Vuçiqi, për të parandaluar eskalimin e vërtetë të gjendjes dhe gjakderdhjet e reja në rajon, siguruar paqe të qëndrueshme dhe stabilitet afatgjatë në Ballkanin Perëndimor, masat e deritanishme të DASH, medoemos, urgjentisht duhet të zgjerohen”, ka nënvizuar ai.
Më tej, Qarri është shprehur se sanksionet e deritanishme nuk janë të mjaftueshme dhe ka shtuar se duhet të merren masa edhe ndaj Vuçiqit.
“Ngase po dëshmohet publikisht, se sanksionet e deritanishme, jo vetëm që nuk janë të mjaftueshme, por ato duhet të jenë edhe më të rënda, veçanërisht kundër Aleksandër Vuçiqit si mentori kryesor i Milorad Dodikut, ideatori i trazirave në Mal të Zi dhe nxitësi i pasionuar i tensioneve të pareshtura në Kosovën Veriore”, ka përfunduar Qarri për “Bota sot”.
