Kuvendi i Kosovës ka miratuar sot me 76 vota për rezolutën për ndalimin e mbajtjes së referendumit serb në Kosovë.
Përkrahje rezolutës i dhanë edhe dy partitë opozitare, Lidhja Demokratike e Kosovës dhe Aleanca për Ardhmërinë e Kosovës.
Në lidhje me këtë temë në një prononcim për “Bota sot’, ka folur publicisti nga Gjermania, Idriz Zeqiraj, i cili u shpreh se miratimi i rezolutës nga ana e qeverisë Kurti i dha një “goditje” Serbisë duke i kujtuar që pazaret që janë bërë më herët të njejtat nuk mund të bëhen më.
“Serbia kishte shpallur mbajtjen e Referendumit, për ndryshimet kushtetuese, kryesisht, në drejtësi. Si përherë, edhe kësaj radhe, zgjedhjet do të organizoheshin edhe në Republikën e Kosovës! Por, "pazaret ishin bërë pa hanxhinë!" Pra, nuk ishte pyetur i zoti i shtëpis, Albin Kurti me shtetarët e tij. Presidentja Vjosë Osmani, kryeparlamentari Glauk Konjufca, kryeminstri Albin Kurti, u konsultuan për rastin në fjalë. Dhe, dolën me një deklaratë të përbashkët publike: Zgjedhjet për mbajtjen e Referendumit, për ndryshimet kushtetuese në Serbi, nuk mund të organizohen në qendrat e votimit, ku jetojnë komuniteti serb, përveç se në Zyrën Ndërlidhëse të Serbisë, në Prishtinë, si dhe me postë, ashtu siç voton edhe Mërgata jonë e përbotshme”, u shpreh ai.
Zeqiraj më tej, citon presidenten Osmani duke thënë se qeveria tashmë është e vendosur të mbroj kushtetushëmrinë e pavarur të Kosovës.
“Ngulmimi i shtetarëve të Serbisë se "ne i kemi organizuar zgjedhjet qendrore e komunale në Kosovë gjithmonë dhe pa pengesa", duke numëruar edhe datimet ndër vite, përgjigja ishte e gatshme dhe bindshëm e arsyetuar: Pa e cituar kryekuvendaren Vjosë Osmani, kur në një seancë parlamentare, ua kujtoi deputetëve, një shprehje amerikane, se "Qyteti ka një sherif tjetër", kryeministri Albin Kurti deklaroi prerazi: Vërtet, Serbia, në të kaluarën, ka livadhisur në Kosovë, sepse nuk ka pasur kush ta ndalojë. Por, Qeveria ime është e vendosur, ta mbrojë kushtetueshmërinë dhe sovranitetin e shtetit të pavarur të Kosovës”, thotë ai.
Publicisti thotë që edhe shtetet e Quintit në takim me krerët e Kosovës u bindën që të njejtën qëndrim do ta mbajnë dhe se nuk do të lejojnë që organizimin e zgjedhjeve për Referendumin e Serbisë, brenda territorit sovran të Kosovës.
“Shtetet e Quintit, paradoksalisht, përmes përfaqësuesëve të tyre në Prishtinë, ishin të njëzëshëm, se Referendumi i Serbisë, për ndryshimet kushtetuese atje, duhet të organizohet edhe në Kosovë, ashtu siç ishin organizuar edhe zgjedhjet serbe më parë. Shtetarët aktual të Kosovës, pa asnjë befasi nga deklarata e përfaqësuesëve të shteteve të Quintit, i pritën në takim ata, duke ua konfirmuar, por, edhe shpjeguar arsyeshmërinë e vendimit, absolutisht, sa të drejtë, aq edhe të ligjshëm, refuzimin e organizimit të zgjedhjeve për Referendumin e Serbisë, brenda territorit sovran të Kosovës. Dhe, palët në takim, mbetën në qendrimet e tyre”, thekson publicisti.
Rezoluta ishte e një rëndësie të veçantë, për ta parë edhe partnerët dhe miqtë tanë ndërkombëtarë, se kjo nuk është vetëm kërkesë e Qeverisë, por edhe kuvendarëve, shton Zeqiraj.
“Shtetarët e Kosovës, unik në vendimet e dhe veprimet e tyre, duke parë seriozitetin e çështjes, kërkuan thirrjen e një seance të jashtëzakonshme të Parlamentit, për nxjerrjen e një Rezolute, që pamundëson mbajtjen e Referendumit serb në Kosovë. Rezoluta ishte e një rëndësie të veçantë, për ta parë edhe partnerët dhe miqtë tanë ndërkombëtarë, se kjo nuk është vetëm kërkesë e Qeverisë, por edhe kuvendarëve, si përfaqësues të drejtëpërdrejtë të popullit të Kosovës”, potencoi ai.
Rezoluta ishte e qëlluar andaj, edhe u votua me 76 vota për, një abstenim dhe asnjë kundër, thekson Zeqiraj.
“Deputetët, me zërin e tyre, të përkthyer në votë, betononte vendimin e tre shtetarëve, përkatësisht, presidentës Vjosë Osmani, kryekuvendarit Glauk Konjufca, kryeminstrit Albin Kurti. Dhe, vetëvetiu, amortizonte kundërshtinë e nxituar të zyrtarëve të lartë ndërkombëtarë, që rreshtoheshin, apriori, në anën e Serbisë. Rezoluta ishte e qëlluar, përmbante 8 (pika), të cilat plotësonin njëra-tjetrën. Andaj, edhe u votua me 76 vota për, një abstenim dhe asnjë kundër, të deputetëve të pranishëm në sallën kuvendore”, thotë publicisti.
Në fund ai thotë se reagimi i menjëhershëm i ambasadorit amerikan, Carpentar duke përkrahë këtë veprim të Kosovës, tregon edhe njëhere që qeveria po vazhdon të kryej punën si duhet.
“I pari nga ndërkombëtarët, që do të reflektonte pozitivisht, ishte ambasadori amerikan, në Organizatën për Siguri dhe Bashkëpunim në Evropë, Michael Carpenter, duke thënë se "Kosova , si shtet i pavarur, ka të drejtë të përcaktojë kushtet, për organizimin e zgjedhjeve të shteteve të tjera në territorin e saj". Dhe, "sipari" u mbyll mrekullisht mirë”, përfundoi Zeqiraj për “Bota sot”.
