Si e mohuan “çlirimtarët” Pavarësinë duke e refuzuar flamurin Dardan të Ibrahim Rugovës?

Të enjten, Kosova e feston 14 Vjetorin e Pavarësisë.

Pas shpalljes së pavarësisë, Kosova i miratoi edhe simbolet e saja.

Himnin, dhe flamurin me një sfond blu në të cilin i ka të vendosur mbi hartën e Kosovës edhe gjashtë yje.

Këto yje zyrtarisht nënkuptojnë gjashtë grupimet kryesore etnike në Kosovë: shqiptarët, serbët, turqit, goranët, romët dhe boshnjakët.

Para këtij flamuri, presidenti historik i Kosovës, Ibrahim Rugova, paraqiti flamurin e Dardanisë më 29 tetor 2000.

Ai flamur ishte blu, i brendashkruar nga një disk i kuq që brenda kishte shqiponjën, por edhe me një unazë të artë.

Flamuri i Rugovës, i quajtur flamuri Dardan, nuk u përkrah nga partitë e dala nga lufta në Kosovë, e që udhëhiqeshin po nga ‘liderët e luftës’ siç thoshin ata.

Megjithatë, në Kosovë, tek shqiptarët dashuria më e madhe është për flamurin Kuq e Zi. Flamurin me shqiponjën dy krenare.

E kur Kosova feston 14 Vjetorin e Pavarësisë, në institucionet tona, në sheshe dhe në duart e qytetarëve, krahas flamurit Kuq e Zi, qëndron edhe flamuri i shtetit tonë.

“Më mirë nuk e duam pavarësinë, sesa të pranojmë flamurin e Rugovës”!

Profesor dr. Enver Bytyçi

Në lidhje me këtë profesor dr. Enver Bytyçi thotë se, simbol aktual i shtetit është flamuri me simbolet e prezencës shumëkombëshe.

Sipas tij, presidenti historik i Kosovës, Ibrahim Rugova, kishte projektuar një flamur me simbolet e Dardanisë për shtetin e ri të Kosovës. Por, shton se, kur u shpall Pavarësia, Rugova kishte dy vite që kishte shkuar në amshim.

“Kundërshtarët e Ibrahim Rugovës e dogjën flamurin Dardan të tij. Ata thoshin se “më mirë nuk e duam pavarësinë, sesa të pranojmë flamurin e Rugovës”! Ajo ngjarje të kujtonte luftën e verës 1912 për çlirimin e Shkupit, kryeqytetit të Dardanisë, kur shqiptarët e çliruan atë dhe në fund ia dorëzuan me duart e tyre fqinjëve armiqësorë serbë. Sepse u zunë me njëri-tjetrin se kush do të ishte i pari i Shkupit dhe i Shqipërisë. Dhe në vend që të merrnin në administrim kryeqytetin e Dardanisë e ta shpallnin në gusht Pavarësinë e Shqipërisë, ia dorëzuan atë Serbisë! Simbolikisht e njëjta gjë ndodhi edhe me flamurin e Kosovës. Në vend që politikanët shqiptarë të Kosovës pas Rugovës ta pranonin flamurin Dardan, pranuan një flamur, të cilin e imponuan ndërkombëtarët dhe që ngjan me flamurin e Bosnjë-Hercegovinës. Sikur edhe Kosova të ishte federatë, njësoj si Bosnja”, thotë Bytyçi për gazetën “Bota sot”.

Ai shprehet se, komandantët e luftës që e bënë luftën nga Rogneri i Tiranës nuk kundërshtuan flamurin aktual, sepse siç thotë ai, për ta ishte fitore e madhe injorimi i projektit të Rugovës.

“Thaçi, në kundërshtim me çdo lloj protokolli imponoi që ta lexonte vetë Deklaratën e pavarësisë”

Ai thotë se "të gjitha përpjekjet e tyre u përqendruan në krijimin e kushteve që të mos venitej roli i Hashim Thaçit. Prandaj Thaçi, në kundërshtim me çdo lloj protokolli e rregulli imponoi që ta lexonte vetë deklaratën e Pavarësisë në Parlament. Ai, në detyrën e Kryeministrit, nuk do të duhej ta bënte këtë, sepse para tij ishin Presidenti dhe Kryetari i parlamentit. Por, etja për lavdi e bëri Hashim Thaçin të harrojë gjithçka. Madje ta refuzojë flamurin Dardan e ta pranojë një flamur të llojit të Bosnjë-Hercegovinës, e cila nuk kishte histori shtetformuese, siç kishte Dardania, përkatësisht Kosova”, shton ai.

Por, sipas tij, tashmë gjithçka ka marrë fund.

“Serbët e urrejnë simbolin Dardan”

“Vështirë se do të rikthehet flamuri Dardan i Rugovës dhe simbolet e tij të shtetësisë së Kosovës. Kjo për faktin se po kalon gjithnjë e më shumë kohë dhe se tashmë është vështirë të ndryshohet Kushtetuta e vendit. Për ndryshimin e këtyre simboleve duhet ndryshuar vetë Kushtetuta, gjë e cila nuk mund të bëhet pa votat e deputetëve serbë të Kosovës. Mirëpo, nuk besoj se do të gjendet ndonjë deputet serb që do ta votonte ndryshimin e flamurit dhe ta votonte një flamur dardan për Kosovën. Serbët e urrejnë simbolin Dardan të flamurit për shumë arsye. Së pari, sepse ata mbrojnë tezën se shqiptarët nuk janë autoktonë, por të ardhur në territoret e Kosovës. Së dyti, sepse nuk e pranojnë Kosovën si territor njëetnik, ose nuk pajtohen me homogjenitetin shqiptar të saj. Së treti, sepse ata edhe nëse do ta njohin Pavarësinë e Kosovës, nuk do ta legjitimojnë kurrë identitetin jo serb të saj për nga kultura dhe trashëgimia”, thekson profesori.

Bytyçi shton se, për këto arsye nuk ka gjasa që flamuri të ndryshojë.

“Në fakt në Beograd janë dakord që Kosova ta përdorë flamurin shqiptar. Shpeshherë këtë e ka theksuar p.sh. Ivica Daciqi, duke thënë se shqiptarët do të duhej ta përdornin flamurin kuq e zi. Por, kjo është një intrigë serbe, sepse përdorimi i flamurit të Shqipërisë në Kosovë do të jepte mesazhe se shteti i Kosovës është një shtet fals, pasi ajo është pjesë e Shqipërisë. Qëllimi ishte dhe mbetet që shqiptarët në Kosovë të shtyhen drejt kërkesës për t’u bashkuar me Shqipërinë dhe në këtë rast do të realizohej kërkesa e përhershme e Beogradit për ndarjen e Kosovës midis Shqipërisë dhe Serbisë! Prandaj, mendoj dhe besoj se flamuri aktual do të vazhdojë të pranohet në Kosovë, ndonëse është një flamur i imponuar”, përfundon prof. Dr. Enver Bytyçi.

Huliganët dogjën flamurin Dardan!

Analisti politik Gani Qarri

Në anën tjetër, analisti politik Gani Qarri, thekson se, me rastin e Shpalljes së Pavarësisë së Kosovës më 17 shkurt të vitit 2008, siç thuhet Kuvendi dhe institucionet vendimmarrëse, janë dakorduar paraprakisht, që himni dhe flamuri i Kosovës, të simbolizojnë përfaqësimin e të gjitha komuniteteve dhe të tregojnë orientimin e integrimeve evropiane dhe euro-atlantike të Kosovës si shtet i pavarur.

Por, sipas tij, shqiptarët sot e atëherë, disi të lënë anash në përfaqësim, si shumicë dërmuese e popullsisë autoktone, nuk është se janë fascinuar shumë nga ky flamur, i cili përveç hartës që paraqet shtrirjen e shtetit aktual të Kosovës, nuk përmban asnjë simbolikë kombëtare.

“Madje pranimin e këtij flamuri nga shqiptarët, e bëri edhe më të rëndë e komplekse, djegia publike nga huliganët e vetëquajtur veteranë e "çlirimtarë", të flamujve të Dardanisë, përderisa flamujt e Serbisë vazhdonin të ngriheshin e valonin lirshëm anë e këndë Kosovës, vetëm pse flamurin Dardan e kishte dizajnuar Presidenti historik i Kosovës, Dr. Ibrahim Rugova, i cili në sfond kishte stemën e Dardanisë së vjetër dhe në qendër shqiponjën dykrenore dhe si nga pamja ashtu edhe me përmbajtjen, ngjyrat dhe konfiguracionin ishte shumë më afër përkatësisë kombëtare të shqiptarëve, se sa flamuri aktual shtetëror i Kosovës. Në fakt flamuri shtetëror i Kosovës, si simbol i shtetësisë, ka zënë vendin e vet, sipas funksionit që i takon dhe sot Kosova si shtet i pavarur, përfaqësohet me të, në shumë organizata evropiane e botërore, udhëheqja politike dhe shtetërore e vendit, me këtë simbol, përfaqëson Kosovën, në takime të ndryshme rajonale e ndërkombëtare dhe po me këtë flamur, synohet të bëhet edhe anëtarësimi i Kosovës në OKB, si simbol i shtetësisë tonë”, thotë Qarri për gazetën “Bota sot”.

“Kërkesa tradhtare e Thaçit”

Sipas tij, përveç hartës në këtë flamur me të cilën shfaqet Kosova si shtet dhe vendi ynë me të, përfaqësohet edhe në marrëdhëniet ndërkombëtare.

“Sa u takon shqiptarëve, ai nuk shprehte atëherë, e nuk shpreh as tani, atdhetarizmin, ndjesitë shpirtërore, idealet, si dhe asnjë simbolikë të tyre patriotike e kombëtare, ndaj as sot nuk i tërheq shumë shqiptarët, kështu që flamuri shtetëror i Kosovës, ka vazhduar të ngelë nën domenin e flamurit kombëtar shqiptar. Flamuri me fushë të kaltër e hartën e verdhë në mes, mbi të cilën janë vendosur edhe 6 yje, nuk e ka gëzuar asnjëherë dashurinë e plotë të shumicës shqiptare, kurse flamuri kombëtar gjithmonë mbetet “Një” dhe i pazëvendësueshëm për shqiptarët kudo. Madje megjithëse tanimë po bëhen plot 14 vite nga Shpallja e Pavarësisë së vendit tonë, flamuri i Kosovës, vijon të mbetet element i diskutueshëm tek shumica e qytetarëve, sidomos tek gjeneratat e vjetra dhe të mesme, që janë rritur e identifikuar me flamurin kombëtar të Gjergj Kastriotit –Skënderbeut. Për aq më tepër, me paraqitjen e kërkesës publike nga kuislingu Hashim Thaçi për ndarjen e Kosovës, i humbi tërësisht edhe ajo pak shije që i kishte ngelur flamurit në fjalë, nga frika dhe paniku që u përhap tek qytetarët e Kosovës, për rrezikun që sillte me vete, kërkesa tradhtare e Thaçit, për shuarjen e shtetit dhe zhvlerësimin e Pavarësisë së Kosovës”, thotë ai.

Ai thekson se, shto kësaj aktin brutal të harambashëve, të cilët përvetësuan meritat e SHBA-ve dhe të NATO-s, për çlirimin e Kosovës, dhe përveçse filluan të vetëquhen si "çlirimtarë", ata nisën t’i digjnin në qendër të kryeqytetit të gjithë flamujt Dardan, të dizajnuar nga Presidenti Historik i Kosovës Dr. Ibrahim Rugova, i cili ishte shumë më origjinal dhe më i përafërt me traditat, ndjesitë, atdhetarizmin dhe idealet tona kombëtare të shqiptarëve, se sa flamuri aktual shtetëror i Kosovës.

Flamuri kombëtar është i ngulitur thellë në zemrat e shqiptarëve

“Kështu që, megjithëse në përfaqësimin e vendit dhe ceremonitë e ndryshme shtetërore, sipas rendit dhe ligjit, përdoret flamuri i Kosovës, flamuri kombëtar dhe ai dardan sipas dizajnit të Dr. Ibrahim Rugovës, gjithmonë kanë qëndruar më afër me ndjesitë tona shpirtërore e kombëtare dhe kanë mbetur për herë më të adhuruar për shqiptarët. Flamuri kombëtar veçanërisht për pjesën e ndarë të popullit shqiptar nga shteti amë, është i ngulitur thellë në zemrat dhe ndërgjegjen e çdo bashkëkombësi, si simbol që i ka paraprirë cilësdo nisme kombëtare, duke filluar nga demonstrata kundër pushtuesit, festat e gëzimet e tyre, me të cilin kanë varrosur të rënët për liri dhe kanë shkuar edhe në luftë për çlirimin e Kosovës nga Serbia okupatore, ndaj shqiptarët edhe sot e kanë shumë të vështirë apo edhe të pamundur ta zëvendësojnë flamurin kombëtar me flamurin e Kosovës. Flamuri shtetëror, megjithëse në fakt është miratuar si simbol i përfaqësimit të shtetit tonë të ri, asnjëherë nuk ka mundur t’i ulë e zvogëloj ndjenjat dhe as t’i shkëpusë lidhjet e forta të shqiptarëve me flamurin kombëtar, i cili është dhe mbetet simbol që në çdo kohë dhe moment bashkon të gjithë shqiptarët”, potencon ai.

Qarri thekson se, flamuri kombëtar, ishte përherë dhe kudo që ishin edhe shqiptarët, të cilët gjatë gjithë historisë dhe peripecive të kaluara shekullore, janë shoqëruar, përfaqësuar, simbolizuar dhe martirizuar gjithmonë me flamur kombëtar.

“Prandaj me gjithë respektin dhe refleksionin e organizimit shtetëror e politik që paraqet flamuri i Kosovës për simbolizimin e shtetit tonë të lirë e të pavarur, duke qenë se me flamurin kombëtar jemi të lidhur që nga koha e Skënderbeut dhe Lidhja Shqiptare e Prizrenit e këndej, i cili në vete ngërthen historinë, traditën, luftën dhe rrugëtimin tonë të vështirë e plot vuajtje kombëtare, lidhjet shpirtërore me flamurin kombëtar mbeten të pashkëputura dhe gjithmonë aq të mëdha e të fuqishme, sa që zëvendësimi i tij, apo edhe distancimi sado i vogël, bëhet i pamundur për shqiptarët, kudo që jetojnë ata, në trojet tona etnike dhe diasporën tonë anë e mbanë globit”, përfundon ai.

Historiani kërkon ndërrimin e flamurit të Kosovës me atë të Rugovës

Shkodran Imeraj, bashkëpunëtor shkencor në Departamentin e Historisë Bashkëkohore të Institutit të Historisë në Prishtinë

Ndërsa, Shkodran Imeraj, bashkëpunëtor shkencor në Departamentin e Historisë Bashkëkohore të Institutit të Historisë në Prishtinë, thotë se, flamuri shtetërore i Republikës së Kosovës, u përzgjodh pas një konkursi publik, kriteret e të cilit ishin caktuar nga një komision të cilin e kishte emëruar Ekipi i Unitetit i udhëhequr nga Presidenti i atëhershëm i Kosovës, Prof.dr.Fatmir Sejdiu.

Ai tregon se, procedurat e mëtejmë për përzgjedhjen e simboleve shtetëror, përfshirë flamurin dhe himnin i ka kryer Kuvendi i Kosovës.

“Mendoj se flamuri Dardan i propozuar nga Presidenti historike Dr.Ibrahim Rugova, ka qenë propozim më i mirë se sa flamuri aktual, kur dihet se ai ka pasur më shumë simbole kombëtare shqiptare se sa ky i sotshmi”, thotë Imeraj për gazetën “Bota sot”.

Sipas tij, flamuri i sotshëm është më shumë flamur i zorit dhe i imponuar, se sa pasqyrim i identitetit tonë kombëtar.

“Flamuri aktual i Kosovës është mirë që të ndryshohet dhe të zyrtarizohet si simbol - propozim i Presidenti Dr.Rugovës. Ndjesia ndaj flamurit kombëtar do të jetë çdo herë më e madhe, sesa ndaj çdo flamuri tjetër. Pra, me flamurin kuq e zi e shqiponjën dykrenore, janë të ndërlidhura çdo ngjarje me peshë në historinë tonë më të re”, përfundon historiani Shkodran Imeraj.