Që nga viti 2005 është hapur Zyra Ndërlidhëse Ruse në Prishtinë. Madje siç raportohet dhjetëra diplomatë rus kanë qenë me mision në Prishtinë.
Kur u hap kjo zyrë, atë kohë prezent ishte edhe ministri i jashtëm rus Sergej Lavrov.
Por, në gjithë këto vite sa funksionon Zyra Ndërlidhëse Ruse në Prishtinë, ka ushtruar aktivitete kryesisht të heshtura.
Rasti i fundit që mori vëmendjen Zyra Ndërlidhëse Ruse ishte vitin e kaluar kur presidentja e Kosovës, Vjosa Osmani, njoftoi për shpalljen persona “non-grata” të dy diplomatëve rus që punonin për këtë zyre.
Lufta në Ukrainë e nisur me pushtimin nga Rusia, ka alarmuar botën duke i shtyrë vendet përparimtare që t’i vendosin sanksione shtetit rus. Këtë e kanë bërë thuaja të gjitha shtetet europiane përveç Serbisë, e cila ka thënë se e dënon sulimin por nuk i mbështet sanksionet.
Si pjesë e reagimeve diplomatike, a duhet të jetë një hap i duhur nga Kosova, mbyllja e zyrës në Kosovë?
Qarri: Mbyllja e zyrës ndërlidhëse Ruse në Prishtinë, Kosova duhet të koordinohet me SHBA-të
Analisti politik Gani Qarri në një përgjigje për “Bota sot” thotë se Kosova ka humbur hapin në raport me ato që kanë arritur të bëjnë shërbimet antishqiptare, prandaj do të duhej sipas tij të ndëshkohen të gjithë ata që mbajnë lidhje me spiun dhe shërbimet e fsheha ruse e serbe, në Kosovë dhe jashtë saj, dhe se ata duhet të largohen urgjentisht nga pozicionet udhëheqëse.
Gani Qarri
“Në fakt i ashtuquajturi ekip i "vogël" i FSB-së dhe GRU- ruse në Kosovë, jo vetëm se do të duhej të mbyllej që moti, por qysh kur u raportuan në fillim gushtin e vitit të kaluar, audio-incizimet në mediat e vendit se edhe kryeprokurori i shtetit Aleksandër Lumezi kishte kontakt apo edhe takime me spiun dhe agjent të shërbimit të fshehtë rus, do të duhej të arrestohej dhe vendosej para drejtësisë, ai dhe gjithë të tjerët, për të parë se për kënd punojnë këta njerëz dhe çfarë po ndodhë, në fakt me sigurinë e shtetit të Kosovës, e cila është shumë jetike për vendin tonë. Madje, të gjithë ata që mbajnë lidhje me spiun dhe shërbimet e fsheha ruse e serbe, në Kosovë dhe jashtë saj, duhet të largohen urgjentisht nga pozicionet udhëheqëse dhe të vendosen menjëher para drejtësisë, për të marrë dënimin e merituar dhe shpjeguar para popullit dhe ligjeve të Republikës së Kosovës, se çfarë tmerri duan ti sjellin vendit tonë njerëz të tillë, të cilët nuk janë thjesht vetëm të dyshimtë, por edhe të rrezikshëm për shtetin e Kosovës”, thotë ai.
Sa i përket mbylljes së Zyrës ndërlidhëse Ruse në Prishtinë, ai deklaron se Kosova duhet të koordinohet me SHBA-të, dhe ta studiojë edhe vet mirë se çfarë dhe kush janë njerëzit që infiltrohen nga Rusia, për të punuar në këtë zyrë, dhe organizatat ndërkombëtare në Kosovë si UNMIK-u OSBE- etj,
“Kurse, sa i takon Zyrës ndërlidhëse Ruse në Prishtinë, Kosova duhet të koordinohet me SHBA-të, të cilat kanë informacionet e duhura për të dërguarit si "diplomat" nga Rusia në vendin tonë, si dhe të shoh e studioj edhe vet mirë se çfarë dhe kush janë njerëzit që infiltrohen nga Rusia, për të punuar në këtë zyrë, dhe organizatat ndërkombëtare në Kosovë si UNMIK-u, OSCE- etj, duke mbajtur gjithmonë nën kontroll angazhimet e tyre publike dhe misionet sekrete, për të cilat ata mund të kenë ardhur në vendin tonë. Kjo për vet faktin se shumica e të deleguarve si diplomatë dhe përfaqësues rus edhe në vendet tjera evropiane dhe kudo në botë, pothuajse 90 % e tyre, kanë të kaluar agjentësh, grada oficerësh ushtarak a policor dhe bashkëpunëtorësh të shërbimeve të fshehta policore dhe ushtarake ruse, për ç ‘shkak shpesh ndodh edhe dëbimi i tyre, nga vendet mikpritëse. Prandaj duke ditur faktin se Kosova është shumë e atakuar në sferën e sigurisë, e cila në maj të vitit 2019 dhe dhjetor të vitit 2021, u detyrua ti dëbonte dy të ashtuquajtur diplomat rus, që u përfshinë drejtpërsëdrejti në çështjet e sigurisë së brendshme të Kosovës, duke mbajtur hapur anën e Serbisë, dhe jo qëndrim neutral, siç do duhej të sillen diplomatët kudo, megjithëse sipas ligjeve ndërkombëtare, diplomatët nuk guxojnë të dërgohen në asnjë vend mikpritës, për të punuar dhe bërë simpati për vendet e treta, siç ndodhë jo rrallë me "diplomatët" rus në shumë vende të botës, Kosova duhet të jetë shumë vigjilente në këtë drejtim”, ka thënë Qarri.
Kosova duhet të veprojë menjëherë
Më tej, ai thekson se Kosova duhet të veprojë menjëherë në këtë aspekt dhe po ashtu të jetë syhapur sidomos sa u takon të ashtuquajturve "diplomat" rus.
Ai madje përmend edhe dëbimin e dy “diplomatëve rus” të cilët njëri, Mikhail Krasnoschekov në maj të vitit 2019, ia bllokoi rrugën Policisë së Kosovës me veturën zyrtare të UNMIK-ut, kurse tjetri, Andrei Nkolaevich Antonov, i cili megjithëse ishte oficer i GRU-së ruse, po ashtu punonte pa asnjë pengesë, si zyrtar i UNMIK-ut, në Kosovë.
“Kështu që, Republika e Kosovës jo vetëm se duhet urgjentisht ta mbyllë çdo zyrë, apo vendqëndrim të mundshëm të FSB-së dhe GRU-ruse në vendin tonë, por është e detyruar për syçeltësi maksimale dhe angazhime të nivelit më të lartë, sidomos sa u takon të ashtuquajturve "diplomat" rus, në vendin tonë. Një veprim të tillë rigoroz, e bën të domosdoshëm vet fakti se oficerë të lartë të shërbimit të fshehtë ushtarak rus-GRU, megjithëse ishin agjent special të Rusisë, kanë mundur të infiltrohen pa asnjë pengesë, në misionin e UNMIK-ut, në Kosovë.
Kështu që Republika e Kosovës, pas dëbimit të Mikhail Krasnoschekov në maj të vitit 2019, i cili i bllokoi rrugën Policisë së Kosovës me veturën zyrtare të UNMIK-ut, për t’i penguar njësitë e tona policore që të kryenin detyrat rutinore në veri të Kosovës, pak kohë para përfundimit të vitit 2021, shteti i Kosovës u detyrua ta shpallte "person të padëshiruar" edhe Andrei Nkolaevich Antonov, i cili megjithëse ishte oficer i GRU-së- ruse, po ashtu punonte pa asnjë pengesë, si zyrtar i UNMIK-ut, në Kosovë dhe vetëm pak kohë para shpalljes së tij, "persona non-grata" në Kosovë, ai kishte ikur, kinse për pushime në Rusi gjë që duhet t’i vë në alarm organet e sigurisë së Kosovës, si për infiltrimin e agjentëve rus në vend, ashtu edhe për rrjedhjen e informacioneve të fshehta, të cilat edhe agjentët rus i mësojnë, para se organet tona shtetërore, të marrin vendime dhe të arrijnë të veprojnë e ndërmarrin masat përkatëse ligjore kundër tyre”, përfundon Gani Qarri.
Kelmendi: Kosova duhet të jetë gati!
Edhe juristi Muhamet Kelmendi, thotë se të gjitha veprimet duhet të jenë në përputhje me veprimet e NATO-s dhe SHBA-s.
Muhamet Kelmendi
“Veprimet e Kosovës kërkohet të jenë në përputhje me veprimet e NATO-s dhe të SHBA-ve. Pa i ndërprerë UE dhe SHBA lidhjet diplomatike me Rusinë nuk kërkohen veprime të tjera nga Kosova. Mbyllja e ambasadave ruse në UE dhe në SHBA është momenti kur Kosova e mbyll Zyrën Ruse në Kosovë. Ajo që Kosova duhet të bëjë është që njerëzit nga Rusia dhe Serbia në Kosove të përcillen dhe të mbesin nën kontroll të organeve të shtetit të Kosovës. Ata janë të rrezikshëm për sigurinë e Republikes. Natyrisht se Kosova ka punë tjera”, thotë ai.
Në fund Kelmendi shton se Rusia mund të kërkoj nga Serbia për të vepruar në Kosovë dhe në Bosnjë, duke deklaruar se mbi të gjitha është në shënjestër Kosova.
“Rusia mund ta shfrytëzojë rastin dhe të kërkoj nga Serbia për të vepruar në Kosovë dhe në Bosnje e Hercegovinë. Mundet edhe në Maqedoninë e Veriut dhe në Malin të Zi. Kjo, për t’i krijuar NATO-s dhe SHBA-ve konflikte të tjera luftarake. Mbi të gjitha është në shënjestër Kosova. Republika duhet të përgatitet dhe të rrisë funksionalitetin mbrojtës. Kjo është detyra esenciale”, përfundon juristi për “Bota sot”.
