Agjencia Kundër Korrupsionit (AKK), ka njoftuar se nga 1 janari e deri tash, ka përcjellë 60 kallëzime penale, 11 informata në Zyrën e Kryeprokurorit të Shtetit dhe 3 informata në Polici.
Këto kallëzime janë për veprën penale “Mos raportimi ose raportimi i rremë i pasurisë, i të ardhurave, i dhuratave i dobisë tjetër materiale ose i detyrimeve financiare”.
Po ashtu, thuhet se në mesin e zyrtarëve kundër të cilëve janë përcjellë këto raste ka edhe zyrtarë të lartë.
Lumnie Demi nga AKK-ja ka deklaruar se në këtë listë ka edhe: ministra - zëvendësministra, kryeprokurorë, gjyqtarë, anëtarë të këshillit drejtues të universiteteve publike, prodekanë, sekretarë fakultetesh, asambleistë dhe jo vetëm.
Vlen të theksohet, se nuk janë raste të pakta, ato të cilat zyrtarët publik kanë refuzuar ta deklarojnë pasurinë e tyre, apo edhe e kanë fshehur atë duke e deklaruar në mënyrë të rrejshme.
Mosdeklarimi i pasurisë nga zyrtarët shtetërorë në Kosovë, sipas Kodit Penal, dënohet me gjobë ose me burgim deri në tre vjet. Derisa deklarimi i rremë i pasurisë është i dënueshëm me gjobë dhe me burgim prej gjashtë muaj deri në pesë vjet.
Njohësit e çështjeve juridike për “Bota sot” analizuan raportet e nxjerra nga AKK-ja dhe sa mund të hetohen kallëzimet e tyre penale nga Prokuroria e Shtetit.
Kelmendi: AKK-ja duhet të riorganizohet
Muhamet Kelmendi
Njohësi i çështjeve kushtetuese, Muhamet Kelmendi në një prononcim për “Bota sot” Agjencinë Kundër Korrupsionit e cilësoi si jo profesionale dhe institucion të dështuar.
Fillimisht, ai u shpreh se deklarimet e pasurisë së zyrtarëve nuk përputhen me vlerat e pasurisë në treg.
“AKK-ja është një ndër dështimet më të mëdha në pushtet. Është agjenci e parregullt dhe shumë jo profesionale në çështjen e përcjelljes së pasurisë së zyrtarëve dhe të tjerëve në Kosovë.
Deklarimet e pasurisë nga zyrtarët nuk janë adekuate me vlerën e pasurisë në treg.
Dua këtu të sjelli një fakt. Deklarohet shtëpia nga zyrtarët që e ka vlerën prej 500 mijë eurove e në fakt ajo ka vlerë mbi 5 a 6 milionë euro, kështu është edhe për firmat, tokat etj. Këto raste nga AKK-ja nuk janë shikuar fare ose janë anashkaluar nga shkaqe të ndryshme”, deklaroi ai.
Krahas kësaj, Kelmendi thotë se AKK-ja ka bërë shkelje të rënda, duke ngritur kallëzime penale për pjesën formale të formularit për deklarim të pasurisë dhe jo përmbajtjes së tij.
“E keqja është kapja pas anëve formale të plotësimit të formularit me gabime formale. Me këtë është anashkaluar ana burimore dhe konflikti real në çështje.
Nga fletë informatat për kallëzim penal nuk kemi raste që tregojnë anën jo reale të pasurimit të rremë të deklaruar.
Kryesisht ka raste formale, përkatësisht të formës, e jo të përmbajtjes.
AKK-ja këtu ka bërë shkelje të rënda. Tregohen shtëpitë, fabrikat, tokat etj., që kanë vlerë qesharake me vlerën e tregut”, vlerësoi juristi.
Sipas tij, kallëzimet penale bëhen për gabime teknike dhe jo për fshehje të pasurisë reale. Ai përmendi disa raste që janë dërguar në Gjykatën e Apelit, ku vetë AKK-ja do tëmund t’i kishte zgjedhur, pa bërë harxhime të mjeteve të taksapaguesve.
“Kryesisht kallëzimet e tilla janë për rastet e gabimeve të bëra nga mosdija në deklarim. Nëpër kallëzime penale nuk ka raste të mos kallëzimit real të pasurisë ose të fshehjes së saj.
Në Gjykatën e Apelit janë mbi 30 raste nga ajo pse është harruar të deklarohet ndonjë e ardhur zyrtare nga shteti. Këtë mundësi lehtë mundet vetë AKK-ja ta vërtetojë. Nuk duhet ato të shkojnë në gjykata. Janë harxhime të mëdha të mjeteve të taksapaguesve. E kjo bëhet pse të punësuarit në AKK nuk punojnë”, theksoi Kelmendi.
Në fund, ai potencoi se AAK-ja nuk ka raportuar asnjë denoncim për deklarim të rrejshëm të pasurisë nga ana e zyrtarëve, ndonëse ka shumë raste kur vlera arrin milionat, ndërsa deklarohet nën mesatare të saj.
“Ndërsa, nuk është asnjë rast i ikjes së deklarimit real të pasurisë. Nuk kemi asnjë rast të deklarimit jo real të vlerës së pasurisë, tokës së shtëpisë dhe të sendeve e të mallrave. Vlera është me miliona e deklarohen vlera nën mesataren e saj. Këto janë për AKK-në raste të rënda. Dhe, këto fare nuk shqyrtohen.
AKK-ja nuk e meriton pagesën që i bëhet, për punën që kryen, ajo duhet të riorganizohet tërësisht. Punëtorët në AKK janë shumë burokrat, të anshëm dhe janë nën ndikimin e politikës dhe të grupeve të ndryshme të interesit. AKK-ja i ka ikur rasteve domethënëse, pa riorganizim nuk kemi punë reale dhe të ligjshme në AKK”, përfundoi Muhamet Kelmendi për “Bota sot”.
Burjani: AKK-ja nuk ka efikasitet
Blerim Burjani
Ndërsa, juristi Blerim Burjani në një prononcim për “Bota sot” thotë se Agjencioni Kundër Korrupsionit ka rol administrativ e jo penal.
Ai konsideron se AKK-ja nuk ka kapacitete të mbledhë fakte për kallëzim penal, pasi nuk është i specializuar.
“Është me rëndësi që agjencia të vërtetoi jo harresën e zyrtarëve kur të deklarojnë pasurinë, por të adresojnë mashtrimin në deklarim dhe fshehje. Kjo agjenci nuk ka kapacitete ta bëjë këtë, pra vetëm prokuroria dhe policia, pra kjo agjenci ka rol administrativ e jo penal, për të mbledhë fakte për kallëzim penal ky organ administrativ nuk është i specializuar, por s’ka as kapacitete ta bëjë”, deklaroi juristi.
Krahas kësaj, Burjani potencoi se ky institucion ka mangësi, dërgon letra, mirëpo sa aktakuza mund të ngriten në bazë të të dhënave të Agjencisë?
“Pra, kjo Agjenci dërgon letra e dëshmi vetëm aq, ndërsa vërtetimin e pasurisë së rrejshme apo të fshehur këtë e bënë prokuroria me ngritje të aktakuzës. Ky institucion ka mangësi, është organ administrativ, ky institucion dërgon letra, por sa aktakuza mund të ngriten në bazë të të dhënave të Agjencisë lë për të dëshiruar”, nënvizoi ai.
Në fund, juristi thotë se AKK-ja bën vetëm spektakël, pasi deri tash të gjithë zyrtarët që janë dyshuar për fshehje të pasurisë janë liruar.
Si i tillë, ai vlerëson se ky organ nuk është efikas.
“Disa zyrtarë të lartë harrojnë të deklarojnë të dhëna ose nuk i dinë datat, ndoshta pasurinë kur e kanë blerë. Pra, ka shumë, deri tash nga zyrtarë të lart të tanishëm asnjë nuk është dënuar, krejt janë liruar.
Pra, ka lajme bombastike, por s’ka gjë, tjetër. Ka lajm spektakulare, por s’ka gjë. Kur të fillojnë procedura gjyqësore del harresë e zyrtarëve apo dështim i Agjencisë, pra deri tash ky organ nuk ka pas kurrfarë efikasiteti”, përmbylli Blerim Burjani për “Bota sot”.
