Amerika me mbështetje të veçantë për sovranitetin, integritetin territorial të Kosovës

Gjatë ditëve të fundit, Kosovën e vizitoi një delegacion i Shtëpisë së Bardhë i cili u kryesua nga Elizabeth Sherëood-Randall, Këshilltare për Sigurinë Kombëtare e Presidentit të SHBA-së, Joe Biden.

Pjesë e delegacionit ishin edhe Curtis Reid, drejtor i Lartë për Çështje Multilaterale në kuadër të Këshillit të Sigurisë Kombëtare, Hillary Hurd, këshilltare e Lartë në Këshillin për Siguri Kombëtare dhe Holly Holzer, koordinatore e Departamentit të Shtetit për Përpjekjet e Zhvendosjes nga Afganistani (CARE).

Delegacioni u shoqërua edhe nga ambasadori i SHBA-së në Kosovë, Jeffrey Hovenier.

Ky delegacion amerikan zhvilloi takime me dy udhëheqësit më të lartë të shtetit, presidenten Vjosa Osmani dhe kryeministrin Albin Kurti.

Dr. Sherwood-Randall, sipas njoftimit zyrtar të SHBA-ve, e ka përsëritur përkushtimin e palëkundur të Shteteve të Bashkuara për sovranitetin, integritetin territorial dhe sigurinë rajonale të Kosovës, siç është demonstruar përmes SHBA-së, udhëheqje e qëndrueshme në misionin e Forcës së Kosovës (KFOR) të NATO-s dhe mbështetje thelbësore për Forcën e Sigurisë së Kosovës (FSK), e cila po e vazhdon planin e saj 10-vjeçar të tranzicionit.

“Dr. Sherëood-Randall shprehu falënderime të thella për presidentin Osmani dhe kryeministrin Kurti për mbështetjen e vazhdueshme të Kosovës për pritjen e përkohshme të afganëve të cenueshëm në Kampin Liya, ndërsa ata kalojnë në shtëpitë e ardhshme, për partneritetin e Kosovës në luftën kundër terrorizmit dhe për aktet e solidaritetit të Kosovës me popullin ukrainas”, thuhet në njoftimin e Shtëpisë së Bardhë, në faqen e saj.

Pas takimeve, të dy krerët shtetëror reaguan me deklarata publike.

Presidentja Vjosa Osmani ka thënë se Kosova është duke e shtuar bashkëpunimin me Amerikën, veçanërisht në forcimin e marrëdhënieve politike, ushtarake dhe ekonomike”.

"Jemi krenarë për intensifikimin e bashkëpunimit tonë me Shtetet e Bashkuara. Kosova është transformuar nga një vend importues të paqes në një vend eksportues të paqes me mbështetjen tuaj dhe jemi të bindur se mund të ndërtojmë mbi këto arritje së bashku. Ashtu siç e përmendi presidenti Biden, gjatë vitit të kaluar Kosova ka demonstruar vazhdimisht lidership në skenën ndërkombëtare. Sot, Kosova është avokuese e fortë për paqe dhe siguri në rajon dhe më gjerë”, theksoi ndër të tjera, presidentja Osmani.

Kurse, kryeministri Kurti ka deklaruar se Kosova dhe populli i saj janë çdoherë të gatshëm për t'iu përgjigjur thirrjes për ndihmë nga Shtetet e Bashkuara të Amerikës.

"U bisedua për invazionin rus dhe agresionin ushtarak në Ukrainë, situatën e re politike dhe nevojën për kujdes të shtuar në këtë pjesë të Evropës”, thuhet në njoftimin e Kryeministrisë.

Ekspertët e sigurisë për “Bota sot” komentuan këtë vizitë të delegacionit amerikan në Kosovë dhe mesazhin që përçoi kjo vizitë.

Shala: Ardhja e delegacionit nga SHBA-ja ishte e pashmangshme

Eksperti i sigurisë, Drizan Shala

Eksperti i sigurisë, Drizan Shala në një prononcim për “Bota sot” thotë se vizita e delegacionit amerikan në Kosovë ishte e pashmangshme, duke parë mundësinë e përshkallëzimit të situatës në rajon.

“Ardhja e delegacionit nga SHBA-ja ishte e pashmangshme sepse qëndrimi i qeverisë që mos t’i lejoj që të mbahen zgjedhjet nacionale të Serbisë në vend dhe mundësisë së përshkallëzimit të situatës në rast se nuk do të lejoheshin nga ana e institucioneve të Republikës”, deklaroi ai.

Shala thotë se gjatë këtij takimi u diskutua pengimi i mbajtjes së zgjedhjeve serbe në Kosovë dhe përshkallëzimi i sigurisë nacionale.

“Pra, gjatë takimit me presidenten janë diskutuar patjetër edhe skenarët e mundshëm të dalur nga pengimi e mos lejimi i mbajtjes së zgjedhjeve serbe në Kosovë, ku siguria nacionale në njërën anë do të atakohej e në anën tjetër do të rritej mundësia që serbët në veri të vendit të shpallin ndonjë lëvizje, e cila do të kishte me reflektu në veprimet mbi të drejtën kushtetuese dhe asaj ndërkombëtare. Pas takimit qeveria lejoi që këto zgjedhje të organizohen, por që për modalitetet mbetet të shihen në ditët në vijim”, theksoi eksperti i sigurisë.

Në fund, ai thotë se Kosova ka rrugë të gjatë për të bërë deri te procedura për anëtarësimin në NATO.

“Kosova në rrugën drejt anëtarësimit në NATO ka para vetit një mori detyrash për t’i përmbushur nga përmbyllja e planit gjithëpërfshirës të Forcës deri te hapja e procedurës 5 pikëshe për t’u anëtarësuar në NATO”, potencoi Drizan Shala për “Bota sot”.

Tërnava: Vizita e delegacionit të madh amerikan për çështje të Sigurisë është një mesazh i fortë përkrahës për Kosovën

Eksperti i sigurisë, Hajrullah Tërnava

Ndërsa, eksperti tjetër i sigurisë, Hajrullah Tërnava në një prononcim për “Bota sot” thotë se e gjithë bota është trazuar nga lufta e Rusisë në Ukrainë.

Sipas tij, në rast se zgjerohen sulmet ushtarake ruse, atëherë mund edhe të përballemi me një luftë të tretë botërore.

“Rrethanat, të cilat po i përjetojmë, në këto situata të luftës kur e tërë bota është trazuar me sulmet luftarake që i ka bërë ndaj Ukrainës, Rusia, tash gati po bëhet një muaj, që është duke u zhvilluar lufta, e që kjo luftë mundet të zgjerohet sipas kërcënimeve që po i bënë vetë Rusia. Me këto veprime luftarake nëse zgjerohet edhe ndaj tjera shteteve të Evropës, atëherë mund të ndodhë edhe lufta e tretë botërore që në këto kohëra do të ndodhte një gjendje kaotike-tragjike që s’do t’i dihej fundi i kësaj lufte, meqë në pyetje është edhe arsenali atomik që e posedojnë shtetet e ndryshme të botes e sidomos vetë Rusia si iniciatore që e ka filluar këtë luftë, e para”, deklaroi ai.

Krahas këtyre zhvillimeve, Tërnava përmendi faktin se kufijtë e Kosovës i garanton KFOR-i, që nga viti 1999.

“Duke e pasur parasysh këtë situatë në të cilën tani gjendemi ne si Kosovë, edhe që territorin e Kosovës pas luftës së viteve 1998-99 dhe kapitullimit të Serbisë me marrëveshjen e Kumanovës, e garanton KFOR-i si forcë ushtarake e OKB-së e sipas Rezolutës 1244, e që sigurinë e brendshme të jetësimeve të Kushtetutës dhe ligjeve të Kosovës e ushtron Policia e Kosovës dhe FSK-ja, e cila forcë ushtarake edhe kryen stërvitje miqësore të përbashkëta edhe me NATO-n, si brenda ashtu edhe jashtë vendit tonë”, theksoi eksperti i sigurisë.

Po ashtu, ai thotë se të gjithë aleatët e Kosovës po bëjnë çmos që të na përkrahin dhe sa më parë të anëtarësohemi në ato institucione ndërkombëtare sikur që është NATO-ja dhe BE-ja si dhe anëtarësimi në OKB.

“Tani pavarësinë e Kosovës e kanë njohur 117 shtete të botës dhe Kosova në rrugëtimin e saj ka pretendime t’i bashkëngjitet NATO-s dhe të bëhet anëtare e BE-së. Mirëpo, pesë shtete të BE-së ende se kanë njohur pavarësinë e Kosovës, dhe po janë si pengesë për anëtarësimin e saj në këto institucione ndërkombëtare, edhe që miqtë tonë po bëjnë çmos që të na përkrahin dhe sa më parë të anëtarësohemi në ato institucione ndërkombëtare sikur që është NATO-ja dhe BE-ja si dhe anëtarësimi në OKB”, nënvizoi Tërnava.

Kosova e pavarur është produkt i Amerikës

Më tej, ai e vlerësoi lartë vizitën e delegacionit amerikan për çështje të Sigurisë në Kosovë.

Sipas, ekspertit të sigurisë kjo vizitë është sinjal i fortë se Amerika me forcat që i ka në posedim, është një garantues për shtetin e Kosovës.

“Tani kjo luftë e filluar mes Rusisë dhe Ukrainës ka shkaktuar çrregullime të sigurisë evropiane si dhe botërore. Prandaj, edhe ka indikacione se lufta mund të zgjerohet në shtetet e Ballkanit Perëndimor. Tani në këto kohëra neve na nevojitet të na qëndrojnë pranë miqtë tanë të përbetuar sikur që është Amerika. Prandaj, vizita e delegacionit të madh amerikan për çështje të Sigurisë është një mesazh i fortë përkrahës për Kosovën, si i pari dhe si zyrtar i këtij lloji. Kjo vizitë është edhe një sinjal i fortë sepse Amerika me forcat që i ka në posedim, është një garantuese për shtetin e Kosovës si dhe përkrahja e anëtarësimit të saj në NATO, në bazë të programit të paraparë që i lejon procedurat e anëtarësimit në këtë institucion, e sidomos tani që ekziston rreziku i sigurisë të shtetit tonë dhe i shumë shteteve të tjera tani të Ballkanit, e sidomos të Ballkanit Perëndimor”, potencoi ai.

Ndër të tjera, Tërnava shtoi se vizita e delegacionit amerikan dëshmon se SHBA-ja i qëndron pranë Kosovës, në këtë kohë kur lufta e Rusisë, ka shkaktuar kriza të mëdha jo vetëm evropiane, por edhe botërore.

“Një përkrahje nga ana e Amerikës si kjo e këtyre ditëve, të këtij delegacioni amerikan e dëshmon faktin se përkrahja dhe afërsia e shtetit mik është e sinqertë, sepse edhe nga ajo luftë që e kishim me Serbinë, ishte Amerika që na qëndroi tërë kohën pranë, dhe pa ndihmën e saj vështirë se do të çliroheshim. Kështu që ndihma e saj tani do të na qëndroj prapë pranë sepse Kosova e pavarur është produkt i Amerikës dhe në këto kohëra sikur që po shihet është duke na qëndruar pran dhe në përkrahje të plotë”, përmbylli Hajrullah Tërnava për “Bota sot”.