Lufta tashmë disa ditëshe në Ukrainë po vazhdon të jetë e ashpër, duke mos arritur të dimë se deri ku mund të shkoj mendja e presidentit rus Putin, ndaj shtetit të Ukrainës.
Kjo situatë e tensionuar ka bërë bashkë pothuajse të gjitha vendet e botës për ta ndaluar sa më parë këtë tension në Ukrainë, mirëpo e njëjta nuk po arrihet të vendoset sepse Rusia është e vendosur ta pushtoj Ukrainën.
Kjo krizë e krijuar po vë në lëvizje krejt vendet e botës, edhe Kosovën.
Së fundmi është kryeministri Kurti ai i cili në një intervistë për të përditshme “La Republica” tha se Ballkani është në rrezik pasi Rusia ka tentakulat e veta në këtë rajon.
Pas situatës së krijuar në Ukrainë, Kurti thotë se Putin e sheh veten si Stalini dhe qëllimi i tij është të rishkruajë historinë.
“Putin dështoi në operacionin blitz, por nuk dëshiron të ulet për të negociuar me Zelensky, dëshiron ta bëjë atë me Biden. Ai dëshiron të rishkruajë historinë dhe mendon se është në lartësinë për ta bërë këtë.
Lufta në Ukrainë, nuk do t’i mjaftojë, do të duhet ta zgjerojë atë nëse dëshiron të bisedojë me Bidenin.
Kjo është arsyeja pse ne jemi të shqetësuar, Ballkani Perëndimor është një rajon që ai mund të përpiqet ta bëjë këtë. Dhe ai mund ta përdorë armë kimike siç ka bërë tashmë në Siri”, ka thënë ai.
Mirëpo a është e rrezikuar Kosova?
Kuçi: Serbia çdo herë është një rrezik real për Kosovën dhe vazhdimisht tenton që ta destabilizojë
Doktori i marrëdhënieve ndërkombëtare, historisë e diplomacisë, Gurakuq Kuçi në një prononcim për “Bota sot”, u shpreh se Serbia është e gatshme në çdo kohë ta shfrytëzoj momentin, që ta sulmoj Kosovën dhe për këtë e ka përkrahjen e Rusisë.
Gurakuq Kuçi
Sipas Kuçit, kryeministri Kurti e ka të qartë këtë pjesë për këtë arsye është i shqetësuar.
“Serbia në situatë lufte si kjo tani është e gatshme t’i shfrytëzojë në çdo moment dhe për këtë e ka përkrahjen e Rusisë dhe madje kjo e fundit edhe insiston që të hapet një vatër e re lufte, si në Kosovë.
Kryeministri Kurti e ka të qartë këtë dhe duke e pasur parasysh se si kryeministër i vendit ka qasje edhe në informacione të klasifikuara kjo e bënë edhe më serioze tërheqjen e vërejtjes nga Kryeministri”, u shpreh ai.
Më tej, profesori thotë që Kosova gjendet para një rreziku real dhe duhet të jetë në gjendje gatishmërie që në rast të një eskalimi të situatës, qytetarët duhet ta mbrojnë shtetin e tyre.
“Rreziku bëhet edhe më real kur e dimë që Rusia dhe Serbia nuk po arrin në asnjë mënyrë të shtyjë përpara përfitime për dalje ekskluzive në Adriatik nëpërmjet Kosovës, ta arrijë asociacionin dhe deri në zhdukjen e shtetit të Kosovës.
Kosova gjendet para një rreziku real dhe duhet të jetë në gjendje gatishmërie që në rast të një eskalimi situate qytetarët duhet të mbrojnë shtetin e tyre, ashtu siç po bëjnë Ukrainasit. Serbia dhe Rusia në Ballkan po marrin më shumë kurajë nga qasja e BE-së ndaj Kosovës”, thotë Kuçi për “Bota sot”.
Krasniqi: Putini ka provuar disa herë që të përhapë konflikte në Ballkan nëpërmjet Serbisë, por që nuk kishte sukses asnjëherë
Ndërsa, analisti politik Islam Krasniqi në një bashkëbisedim me “Bota sot”, thotë që NATO-ja e ka nën mbikëqyrje shtetin e Kosovës dhe se një mundësi e tillë nuk do të lejohet.
Islam Krasniqi
“Unë nuk e besoj atë çfarë potencoi kryeministri Kurti, sepse Ballkani është nën mbikëqyrjen e NATO-s dhe gjithçka është nën kontroll. Putini ishte munduar disa herë që të përhap konflikte në Ballkan përmes Serbisë apo serbëve që jetojnë jashtë kufijve të saj, por që nuk kishte sukses asnjëherë, duke i shkuar kot gjithçka”, thotë analisti.
Ai në fund sugjeron që shteti i Kosovës të investojë në ushtrinë tonë dhe të blejë armatime derisa të bëhemi pjesë e NATO-s.
“Ne duhet të fillojmë ta përgatisim ushtrinë tonë, të blejmë armatime, po edhe të kërkojmë ndonjë falas, sepse vullneti i miqve tanë asnjëherë nuk ka munguar për të na ndihmuar. Ne duhet të kërkojmë që KFOR-i t’i ruajë kufijtë tanë derisa ne të bëhemi pjesë e NATO-s apo të furnizohemi me armatim dhe të barazohemi me shtetet fqinje në aspektin ushtarak”, është shprehur Krasniqi për “Bota sot”.
