Publicisti dhe njohësi i ҫështjeve politike, që jeton dhe vepron në Gjermani, Idriz Zeqiraj në një prononcim të tij për ‘Bota sot’, ka folur lidhur me Fondin e Sigurisë. Ai këtë fond e ka quajtur si të nevojshëm, por sipas tij me një qasje të gabuar.
“Themelimi i Fondit për fuqizimin e Ushtrisë të Kosovës, ishte nismë e qëlluar, por, me një qasje të gabuar. Dy Fondet kryesore: Fondi shtetëror, i shprehur në 3 %-shin obligativ, të rrogës mujore dhe Fondi "Vendlindja thërret", të para luftës, tashmë janë lënduar skajshëm. Paradoksalisht e cinikisht, ky i fundit quhet edhe "Fondi i luftës", ndërkohë që kontrubutet e Fondit, siç mësojmë nga Procesi gjyqësor "Tokat", me krye të akuzuarin, shefin e SHP të UÇK-së të LPK-së, Azem Syla, u përdor për këto biznese dhe të tjera, por, jo për Luftën e Kosovës”, vlerëson ai.
Zeqiraj thotë më tutje se, Fondi shtetëror i 3 %-shit, përballoi shpenzimet e Luftës së Kosovës, por, disa miliona u abuzuan nga disa komandantë kriminelë dhe hajna zyrtarë.
“Administrimi ka qenë korrekt, shumë profesional, me inkasim bankar në Diasporën shqiptare. Por, abuzimi ka ndodhur në Tiranë, nën tytën e kallashëve të komandantëve dhe të bandave të tyre vrastare, të kundërshtarëve politikë”, thotë ai.
Ai thotë poashtu se qasja e gabuar në këtë raste është se, LVV duhej ta shtronte çështjen e Fondit për Ushtrinë, mbrojtjen, në Parlament, duke kërkuar dhe siguruar përkrahjen e njëzëshme të subjekteve partiake.
“Krejt njësoj, sigurimi i një procedure të përkryer, siç ka qenë begatimi dhe administrimi i Fondit shtetëror, në dhjetë-vjeçarin e viteve `90-a. Për mbikëqyrjen bankare, të drejtën e tërheqjes të depozitave, krijohet një komision, me përfaqësues të subjekteve politike, p.sh. prej 5 (pesë) vetësh. Sipas një përllogaritje, rezulton se 57 % të shqiptarëve jetojnë në Mërgatë. Tri dekada më parë, kur u themelua Fondi Shtetëror i 3 %-shit, punonin një ose dy pesona nga familja. Ndërsa tani punojnë disa anëtarë nga një familje, që depozitojnë mijëra euro në muaj”, vlerëson Zeqiraj.
Ai ka komentuar edhe deklarimet e opozitës sa i përket këtij fondit, duke thënë se Kosova ka nevoje jo vetëm për gjkaun e qytetarëve të saj, por edhe për të siguruar mbrojtje kundër armiqëve lakmitarë.
“Demagogët e opozitës, me kundërshtinë e tyre, për ta sabotuar - Fondin e Shenjtë të Mbrojtjes -, se, gjoja, "nuk mbahet ushtria me lëmosha", ngjallin frikë e disfatizëm, në vend të mobilizimit masiv, për begatimin e Fondit në fjalë. Atdheu - Kosovë ka nevojë, jo vetëm për gjakun e qytetarëve të saj, por edhe për xhepin e tyre, për ta siguar një mbrojtje e siguri efikase, kundër armiqëve lakmitarë. "Kurbani nuk majmët, në natën e "Bajramit", - thotë populli. Thirrja kushtrimtare, para skuadrës pushkatare fashiste, e poetit çek, Julius Fuçik: "Njerëz, ju kam dashur. Jini vigjilentë", vazhdon të jetë aktuale edhe sot dhe mot pas moti”, thekson Zeqiraj për ‘Bota sot’.
