Kryeministrja e Serbisë, Ana Bërnabiq këtë të hënë zhvilloi një vizitë në Mitrovicë të Veriut, ku u prit nga përfaqësues të Listës Serbe - subjektit më të madh politik të serbëve të Kosovës - si dhe nga përfaqësues të institucioneve që punojnë në sistemin e Serbisë.
Paraprakisht, aty u mblodhën edhe punonjës të institucioneve që financohen nga buxheti i shtetit serb. Ata mbanin në duar pankarta me fjalë përkrahëse, të tilla si: "Derisa e kemi [presidentin e Serbisë, Aleksandar] Vuçiq dhe Anën tonë, ne nuk i druhemi asgjëje".
Në delegacionin e Bërnabiqit ishte edhe drejtori i Zyrës për Kosovën në Qeverinë e Serbisë, Petar Petkoviq, dhe drejtori i Zyrës për Teknologji informative dhe e-Qeverisje, Mihaillo Jovanoviq.
"Kjo është një ditë e rëndësishme dhe e madhe për të gjithë ne", tha Petkoviq, duke komentuar vizitën e Bërnabiqit në Kosovë.
"Falë presidentit [të Serbisë] Aleksandar Vuçiq dhe kryeministres Ana Bërnabiq, kemi arritur të investojmë shumë fonde dhe t'i fuqizojmë komunitetet serbe", shtoi ai.
Gjatë vizitës, Bërnabiq nuk kurseu edhe deklarata tendencioze ndaj Kosovës.
E lidhur me këtë, në një prononcim për “Bota sot” foli eksperti i sigurisë, Drizan Shala.
Ai kritkoi lejimin e kësaj vizitë, për shkak të qqëndrimeve fashiste të kryeministres serbe në raport me shtetësinë e Kosovës.
“Ardhja e Kryeministres së Serbisë në Kosovë (Veri) nuk do duhej fare të ndodhte për arsyje të qëndrimeve të saj fashiste në raport me entitetin shqiptar por edhe në raport më shtëtësinë e Kosovës”, deklaroi Shala.
Sipas ekspertit të sigurisë, tendenca e Serbisë ndaj Kosovës nuk ka ndryshuar, në vazhdimësi dërgojnë mesazhe kundër sigurisë së përgjithshme.
“Deklarimet e saj dëshmuan që orinetimi politik nuk e ndryshoi në asnjë formë tendencën e interesave të Serbisë ndaj Kosovës e cila mund të përçojë edhe mesazh kundër rendit dhe sigurisë se përgjithshme”, tha ndër të tjera Drizan Shala për “Bota sot”.
