Kryeministri i Kosovës, Albin Kurti, gjatë një interviste për “Die Ëelt”, ka kërkuar shtim të forcave të KFOR-it në Kosovë.
Ai ka thënë se shtimi i ushtarëve dhe pajisjeve ushtarake të NATO-s në Kosovë do të ndihmonin në paqe në gjithë Ballkanin Perëndimor.
“Një rritje e konsiderueshme e numrit të ushtarëve dhe pajisjeve ushtarake të NATO-s në vendin tonë do të përmirësonin sigurinë dhe paqen në Kosovë dhe gjithë Ballkanin Perëndimor”, ka deklaruar Kurti.
Ai tha se Kosova ka rritur buxhetin për mbrojtje e po ashtu edhe numrin e ushtarëve rezervistë.
“Një rritje e numrit të ushtarëve në forcën paqëruajtëse të NATO-s, KFOR, do të mbështeste përpjekjet tona në aspektin e mbrojtjes”, theksoi Kurti.
Analisti Sylejman Mehazi e konsideron si të arsyeshme kërkesën e kryeministrit Kurti për shtimin e numrit të ushtarëve të KFOR-it në Kosovë, duke thënë se rrezikshmëria nga Serbia e ndikimi rus në tërë Ballkanin u vërejt ditëve të fundit me ngjarjet në veriun e Kosovës.
“Kërkesa e kryeministrit të Kosovës, Albin Kurtit, për shtimin e forcave të NATO-s në Kosovë është e patjetërsueshme për paqën jo vetëm në Kosovë, por në tërë rajonin e shteteve të Ballkanit Perëndimor. Se sa të rrezikshëm janë grupet kriminele serbe për të kallur prushin e luftës në veri të Kosovës e sa shpejt do mundte që lufta ruse nga Ukraina të përhapej edhe në Kosovë u verejt ditëve të fundit me barrikadat e kriminelëve të presidentit serb, Aleksandar Vuçiqit. Këtë prush të zjarrit të luftës serbe-ruse në Kosovën mund ta shuajnë përgjithmonë vetëm forcat e NATO-s”, u shpreh ai.
Ai ka thënë se kryeministri i Kosovës, Albin Kurti është i vetëdijshëm se hovin e cenimit territorial të Kosovës, Serbisë mund t'ia ndalin vetëm fuqia më e madhe luftarake e NATO-s.
“Shtimi i forcave të NATO-s nuk do binte paqën vetëm në Kosovë e në shtetet e Ballkanit Perëndimor, por do ndalonte edhe përhapjen e luftës ruse në gjithë Evropën, prandaj gjasat e shtimit të forcave të NATO-s nga ana e kryeministrit të Kosovës, Kurtit, mund të merren parasyshë, pasi vetë Republika e Kosovës është çliruar e krijuar nga NATO, dhe lirisht mund të themi se Kosova është republikë e pavarur e NATO-s në mes të Ballkanit, kjo argumentohet me bazën e fuqishme ushtarake të NAT0-s të Bondstillin në mes të Kosovës”, ka nënvizuar ai.
Ai theksoi se dallimi i Kosovës nga shtetet tjera anëtare të NATO-s është, se NATO është brenda Kosovës, kurse shtetet tjera me kërkesën e tyre kanë hyrë në NATO.
Kujtojmë se aktualisht në Kosovë janë rreth 3800 ushtarë të KFOR-it, rreth 70 gjermanë. Sipas një vendimi të Bundestagut gjerman, deri në 400 ushtarë shtesë mund të dërgohen me urgjencë në Kosovë.
